ЛЕМНЕМАНЬ ТЁЗКАКС

Тя ульсь 1998 кизоня. Атери сашендсть Финляндияста ломатть: учёнайсь Мерья Сало, студенткась Регина Турунен. Мархтост Мордовиянь учёнайсь В.К.Маркина. Сявине А.С.Малькинонь калмонц лангс. Пачкодеме. Поэтть памятникстонза фотографиясь тапаф. Аф пара нльне арась. Инжиеньковок нолдазь пряснон.
—Кинди поэтсь тись кальдяв?—ушедоме кизефнема фкя-фкянь.
—Киндивок аш,—саме фкя мяльс.—Улихть кальдяв, казяма седи ломатть.
Сяшкава обжавонь, тяштень «Мокшень правдав». И васенцекс гайфтсь, музе сёрматфозень И.М.Девин.
—Кали тя афкукс, тёзка?—кизефтезе писательсь.
—Афкукс, Илья Максимович. Материалсь газетаса, сельминголет. Эздонза лац няеви тапаф фотографиясь.
И.М.Девин юмафтозе покоенц. Гайфнесь сидеста, кизефнесь тянь колга фалу. Сяльде велень Советсь полафтозе фотографиять. Мзярда И.М.Девин сась Кяшалу Малькинскяй лувомас, семботь няезе эсь сельмосонза, кенярдеманцты певок ашель.
Тяфтамоль ломанць. И.М.Девинонь мархта ламоль марстонь раднядонк. Кепотьксонди, Сире Теризморгань эряйсь Л.Н.Макаров, а сонь рьванц, Любовь Серафимовнань, Девин оцяцоль, азонкшнезе, кда, кле, пачфтьсайть сярятьфнень, прябалатнень Илья Максимовиченди, писательсь гайфти, ризнай-пичеди. И кизефтьсы, кодама лезкс эряви.
Ашезь кяжиякшне вестевок прянь няихнень, мяштень шавихнень лангс.
Лятфтан тяфтама кепотькс. Тя ульсь Саранскяйса, Советскяй ульцяса, 55№ кудса. Эста тосотольхть «Мокша» и «Якстерь тяштеня» журналхне. Сувась И.М.Девинонь кабинетс тяшти ломань. Ушедсь казямста Илья Максимовичень эса сюцема, мезенкса-бди муворгофнема. Лиясь няфтель кенкшти, мархтонзовок афоль корхта. Тейневок арась аф пара.
—Пади, прважасаськ инжить?—кизефтине И.М.Девинонь.—Прянь вятема аф машты.
—Аф эряви прважамс,—отвечась Илья Максимович.—Эрь ломанть сонцень прянь вятемац. Суваль лия кабинетс, няфтельхть кенкшть шири, а сон сувась тейне. Содасы, што аф прважаса, кулхцондса и, кда тейне вийс коре, лездан.
И.М.Девин кельгозе рахсеманц, пеетькшнеманц. Кда мезевок аф мялезонзоль, сёрмадсь фельетотт газетав, журналу. Саранскяйса, аф ичкозе Илья Максимовичень эряма вастонц эзда, работасть частонь петема мастерскойхть. Мезе-бди ашезь ту писательть мяльс, качафтсь «Мокшень правдав» фельетон. И мезе арьсетяда, мокшень кяльса газетать эстокиге пачфтезь частонь петихненди. Сят музь Илья Максимовичень, корхтайхть:
—Кодама-бди афпармор сёрмадсь колганк «Мокшень правдав». Эстейнек аф ётафтови рузкс. Тон, корхтайхть, мокшат. Пароль ётафтомс рузонь кяльс.
И.М.Девин сявозе кядезонза газетать. Няезе, конешна, эсь фамилиянц, сёрматфонц, ушедсь:
—Вай-вай-вай! Ломаттне аф кельктядязь. Вдна, обжасасть, кальдявста частснон петьсасть.
Семботь ётафтозе рузонь кяльс. Нинге мезе-бди азсь эсь эздонза. Алятнень шамасновок равчкодсть, тусть обжафста, кяжиста. Илья Максимович аньцек рахась лангсост. Кенярдсь сяс, мес сёрматфоц пачкодсь кедьста лисендихненди.
—Ашеть повонда тяфтама историяс, тёзка?—кизефтемань писательсь.
—Повондонь, Илья Максимович, и аф весть.
Кой-мезе пачфтень теенза.
Илья Максимович кулхцондозе азксозень пеедезь, а меколи поладозе:
—Тянь эзда лиси цебярь пеетькс.
И.М.Девин А.С.Малькинонь колга тяшнесь аф лама. Кепотьксонди, 1959 кизонь 11 октябрьста лиссь «Мокшень правдаса» «Поэтть прозац» лем ала статьяц. «Мокша» журналса лисендсть поэт ялганц колга «Шкабаваз, тяст юкстав ялгане» и «Москуву, Писателень союзу» лем ала статьянза. Меле синь сувафтфтольхть колма томса кочкаф произведениянзонды, конат лиссть Саранскяйса 2002 кизоня.
И.М.Девинонь козя биографияц, мялень салай творчествац. Синь тонафневихть вузса, училищаса, школаса. Учёнайхне сёрмадыхть научнай работат, студенттне—рефератт и дипломнай тефт. Шачема-касома велесонза, Сире Шайгавонь Сире Теризморгаса, эрь кизоня кармасть ётафневома Девинскяй лувомат. Тя кеняртьфти и кеподи мяль.
Тяддень 13 ноябрьста топоди кевейхксые киза, кода аш мархтонк учителеньке, содаф поэтсь и писательсь, ялганьке И.М.Девин. Июльста топоди 95 киза шачема шистонза. Кармайхть оцю илат. Кармайхть сёрмадома колганза газетаса, журналса. Аноклайхть передачат телевидениясь, радиось. Тяфтама цебярь, ару вайме ломаттне аф эрявихть юкснемс. Марян гордость сянкса, што содайне И.М.Девинонь, сон лемнемань тёзкакс, лувондомань ялгакс. Мархтонза эрь васьфтемась тейне ульсь оцю праздникокс. Тяни ня васьфтематнень лятфнесайне прянь шнафтозь.