ВЕШЕНДСТЬ СЕРАФИМОНДИ РЬВЯ

Весть илять сувась пялонк сусед цёра ялгазе Митя и корхтай:
—Серафим, тонь фкя стирь пяк кельктянза. Мялец мархтот васедемс. Пилетнень тяйть нувафта. Пара стирсь. Кие? Да тон, шять, содасак. Гаврянь Вера. Сон ошса тонафни. Тяни сась куду.
—Гаврянь Вера?!—Мон и кенярдень, и дивандань.—Кали Гаврянь Вера монь кельгсамань?!
—Кельктянза!—азозе Митя.—Аде срхкак. Васедят мархтонза клубса и тонць кульсак, конашкава кельктянза.
Тунь Митянь мархта клубу, коста кулевсь музыка. Суваме и няине—Верань мархта кштись Сёма Костин. Сон чипордась тейне сельмот, шять, мялецоль азомс: «Ватт, Серафим, кодама мазы стирь мархта кштиян!» А Вера, мярьгат, афи няемань, афи ванць ширезон. Митя, пади, васькафнесь—Вера кельгсамань. Мзярда лоткасть кштимда, Веранди маладсь Митя, и тяни сонь мархтонза ушедсь кштима. Мон обжавонь и лисекшнень клубста. Митя мрдафтомань и корхтай:
—Серафим, тят кяжия, мес кштинь Верань мархта монга. Сон кельктянза и тяни учи эсот скомнять лангса. Архт малазонза.
Мон, кода отькорь кавалер, тунь инголи кельгомазти. Ашень пачкоде стирти, эвондась военнай моряк, сюконясь теенза, сявозе кядьнучкта, и Вера, ширезон апак варжакснек, тусь морякть мархта кштима.
—Серафим, тят пичеде!—Митя кундазе кядезень, ушедсь лясьнемон.—Вера кельктянза. Аделасы морякть мархта кштиманц, кургцень тяк келепне. Малатт и азк, тонга кельгсак!
Тя пингть моряксь сявозе Верань кядьнучкта, и синь кафцьке пеетькшнезь-рахсезь лиссть клубста. Цють ашесть ту сельмоведне. Митя, шять, шарьхкодезе, конашкава киськордавсь седиезе, мярьгсь:
—Тят пичеде. Вера кельктянза аньцек тонь.
Лисеме клубста. Вера и моряксь келуть эшксса мезе-бди корхнесть.
—Аде,—мярьгонь Митянди,—тутама. Пади, синь тевсна ладяф ни.
Тя пингть Вера и моряксь лиссть келуть алда и тусть аф серцек, а фкя-фкянь эзда башка, меле моряксь аськолдась фкя шири, а Вера—лия шири.
—Месть ванондат? Сатк!—кошардомань Митя.—Вера кельктянза, а тон учсят, кода вазня.
Мон тунь Верань мельге пцтай ласькозь. Сон, кодак няемань, пяк дивандась.
—Серафим, тон коза тяшкава вишкста ласькат?
—Вера, мялезе мархтот корхтамс!
—Эрь ина корхтак, Серафим! Мезе мяльце азомс тейне?
Ашине сода, кода ушедомс Верань мархта кельгомать колга корхтамать. Пади, мярьгомс: «Эх, Вера, ватта, кода валдоптыхть тяшттне! А ковсь кодама! Мярьгат, венчкя уи!» Сатфтыне смелшизень, кизефтине:
—Вера, афкукс кельгсамак?
—А кие тейть мярьгсь, што  мон келькте?
—Шанин Митя азондозе тейне, тон пяк кельгсамак.
Вера шуказе прянц, а меле кодак рахазеви, маластонь кальть пряста нльне кафта варсихне лийкстасть.
—Серафим, а мезенкса тонь кельгомс?
Азондыне стирти, мезенкса кельгован. Цёрась отькорян. Маштан кодама кельк машинаса покодема. Озан тракторс, сокан, видян.
—Тонцень машинаце ули? «Мерседес» или «Тойота»?
Савсь виденцямс, кодамовок машиназе аш, покодян учань фермаса, касфнян шуваня понань учат.
Вера пяк ашезь кенярде, мес касфнян шуваня понань учат, арьсезевсь, кизефтемань:
—Серафим, а тонць кельгсамак?—И тусь цютькада инголи. Мон аськолдань мельганза, ушедонь азондома, конашкава кельгса, мезе мярьги, анокан сянь тиемс. Вера цють пеедезь мярьгсь:
—Серафим, а кда мярьголень—комотть седть лангста, комотелеть? Тя пингть ётаме седнява. Варжакстонь алу. Ведсь аф ичкозель. Сяшкава элякодсь седиезе и кодак юпадян—жолль!—ведть кучкас. Седть ала аф крхкаль. Кода начка сараз, эсток уень берякти.
Вера сась малазон и, мезть ёфси ашине учсе—паламань. Мярьгат, ёндол ётась пачкан. А прясон кфчядсь: «Вов кода сатневи афкуксонь кельгомась!» А Вера нинге весть паламань и мярьгсь:
—Молодецат, Серафим! Отькорят цёрась. Прважамс тонь куду али тонць пачкодят?
—Вера, мон прважате!—мярьгонь теенза.—Цютькада начконь, а мзярда паламайть, сяшкава псилгодонь, щамне эстокиге коськсть. Варжак пиджакозень!
Вера варжазе пиджакозень, сон нинге начколь. И тяса минь явоме.
Вальмалонк скомня лангс озафоль Митя ялгазе. Кизефтемань:
—Ну кода? Кельктянза вдь. Мезе тейть корхнень!
—Кельгсамань,—мярьгонь и эзк каяйне пиджакозень, ушедонь пуворямонза эздонза ведть. А меле каяйне штананень, сятка эрявсть пувордамс.
Омбоце шиня шобдава лисень кудста, маладсь тейне нараф пря цёрокш, венептсь каготкя. Ваныне, и комболгодсь седиезе. Сёрмась Верань эзда. Сон тяштсь: «Кельгома Серафим, сак, пожалняста, пялонк».
Вера васьфтемань крыленцяснон лангса. Кядьсонза кшнинь кайме.
—Серафим, тядязе сяряди, сиреня ни, а тингоц апак сокак. Вешендень трактор, ашезь мув. Сави тядязень переняц кшнинь каймоса шувомс. Модамарьхть путомат. Пади, лездат шувомс?
Кода атказат? Кали аф лездат эсь кельгомацти! Вера максозе тейне каймонц, лихтемань перезост. И кинь тоса няян! Морякть. Кядьсонза кайме. Шуви. Вера тусь, а минь, аф ламос корхнемда меле, ушедоме работама. Сась Вера, вятезе Костин Сёмань. Клубса исяконь кштий ялганц. Соньге кядьсонза кшнинь кайме.
—Шумбратада, ялгат!—пшкядсь Сёма и люпштазень кяденьконь.— Лезттама, братцы, Вера Гавриловнанди шувомс переняснон. Модамарьхть путыхть, дынят видихть. Сёксенда  дыняда порема сатама.
—Видетяма дынятка,—надияфтсь Вера.—Аф содаса аньцек, касыхть али аф. Дынясь лямбе ширдень касыкс.
—Касыхть, касыхть!—мярьгсь Сёма Костин, бта сон тя тевса ульсь ни содай ломань.
Вера аськолксса ункстазе апак шуфт переняснон, явозе колмова и мярьгсь кажнайти шувомс эсь уманц. И азозе: кие сяда курок аделасы шувоманц, сянди инь питни казнеть казьсы.
Тя кеподезе мяленьконь.  Пади, Вера арьсесь, няемс женихонзон асуснон, кие сяда отькорь, кие сяда машты аф аньцек кштима, но и кшнинь каймоса шувома. Сяс старандаме, шувоме, кржа корхнеме. Кажнайсь пельсь лядомс фталу.
Мзярда переть пяледа ламоц шувфоль, Вера серьгядемазь обедама. Шра лангоц аноколь ни. Тувонь сивольня керсефоль, алхт пуштфтольхть. Вера каннесь шаваняса лям, путсь кажнайти куцю.
—Ули «Столичнай» сюлеказе,—азозе сон.—Кода, цёрат, сиптяда или иляденди кадсаськ, мзярда тевоньке аделави?
Сембе люкштядеськ пряньконь—кадомс сюлекать иляденди.  Ярхцамда меле тага кярьмодеме каймоньконди. Стане старандаме, шувоманьконь аделаськ фкя пингть—киньге ашель мялец лядомс фталу. Вера шнамазь тянкса, но савсь тейнек каземс фкя лацонь казнет—кажнайть кргас повфтась серень уськоня, а уськонять песа куцькан—пяк вярьге лиенди нармонь!
Верань колма женихонзон эзда переснон шувомста конацка ашезь лисе инголи. Пади, сонць Вера кочкасы эстеенза сянь, кона сембода пяк туй мялезонза, кона сембода пяк кельгови. Митя ялгазень валонзон коряс, инь кельговиксан теенза мон.
Но, ялгат, цютькада эльбядень. Мзярда илять клубса Верань мархта кштимста кизефтине, лиси тейне рьвакс али аф, сон азозе:
—Кельгома Серафим, монь ули женихозе. Сон эряй Санкт-Петербургса, марса мархтон тонафни институтса. А Тургайкин моряксь кие тейне? Тургайкин радняньке: алязень брадонц племянникоц. Саме велезонк—мон тядязень, а сон—шабрань велеса эряй щаванц варжама. Спасиба, Серафим, тонга лездоть шувондомс переняньконь. Парцень аф юкстасаськ.
Колма шида меле Вера Гавриловна и моряксь  Фёдор Тургайкин  тусть меки Санкт-Петербургу. А минь—Костин Сёма, Шанин Митя и мон—лядоме эсь Келу велезонк.
—Серафим, тят пичеде! Пряцень вярьгак киртьк!—корхтась тейне Митя ялгазе.—Нинге мутама тейть рьвя. Мутама мазы нармоння!
Пяк мялезель каямс Митянди пилети, мес апак арьсек эцесь прязонза мяльхть, бта пяк кельгсамань Гаврянь Вера. Пяк мялезель, да кирдине кяжнень эсь потмосон. Ялга вдь тейне Митя. Шять, рьвянь вешендемста и рьвяямста эсь пряце улеза сяда ёню и смекай, а аф кати-кинь лангс надиякшнемс.