«ТОНАФТТАМА ЛОМАТТНЕНЬ ЭСА ПАТРИОТИЗМАТИ!»

Финно-угорскяй народонь культурань Поволжскяй центрать директороц, филологическяй наукань кандидатсь Р.И.Акашкина:
—Раиса Ивановна, пара улель лятфтамс лувити  сянь, кодама тефт тиенди и вяти Финно-угорскяй народонь культурань Поволжскяй центрась Мордовияса и Россиянь лия региоттнень эса.
—2006 кизонь 28 апрельста сявомок, мзярда Российскяй Федерациянь Правительствать решениянц коряс Мордовиять столицаса панчфоль «Финно-угорскяй народонь культурань Поволжскяй центра» Аф коммерческяй ассоциациясь, сон региональнай, межрегиональнай и международнай уровеньца тиенди-вяти тефт, конат аф аньцек ванфтсазь, но и касфтсазь-виияфтсазь финно-угорскяй нароттнень культураснон, наукаснон, кяльснон, национальнай койснон-обуцяснон, литератураснон и журналистикаснон. Тяда башка, ня и лия тефнень вельде Поволжскяй центрась маласькофты финно-угорскяй народонь национальнай и профессиональнай культуратнень российскяй нациянь лия нароттнень культураснонды, кемокстамок етксост ялгаксшинь, религиознай и лия соткснень.
Поволжскяй центрась сембе тевонзон эса аноклакшни и тиенди Мордовия Республикань Культурань и национальнай политикань и лия министерстватнень и ведомстватнень, Мокшэрзянь народть Межрегиональнай общественнай организациянц, общественнай лия организациятнень  лезксснон вельде кода Мордовияса, стане и Россиянь лия региоттнень эса.
—Маластонь пингть кодама пуромксса кармай работама Поволжскяй центрась?
—Мордовия Республикань Культурань и национальнай политикань министерствась, Мокшэрзянь народть Межрегиональнай общественнай организацияц и Финно-угорскяй народонь культурань Поволжскяй центрась аделазь Международнай этнокультурнай экспедицияти-фестивальти анокламатнень. Тяддень 13-18 августста «Волгась—ялгаксшинь ляй. Волжскяй нароттнень культураснон диалогсна» лем ала сон етай Саранск-Самара-Казань-Чебоксары-Нижний Новгород-Болгар-Самара-Саранск маршрутова.
Международнай экспедициять-фестивальть—«Гражданскяй марстоньшись и патриотизмась—Россиянь нароттнень мяльсна-кочкамасна»—девизонц коряс, койсон, лувись шарьхкодьсы, мезень колга кармайхть корхтама участниконза «круглай шраса» и лия пуромкснень эса, конатнень мархта педа-пес пяшкотьф сонь козя программац. И, конешна, Поволжскяй центрань ломаттне эрьгавста кармайхть работама экспедициять-фестивальть эрь площадкасонза.
Тяда башка, Поволжскяй центрась аноклазе «Морай шачема-касома велесь» Межрегиональнай фестивальть, конань эса маштомошиснон няфтьсазь Мордовиянь и Россиянь лия региононь фольклорнай коллектифне. Тяддень августть песта, «Шумбрат» Всероссийскяй праздникть пингста, сон етай Саранскяйса.
—Кода мокшэрзянь общественнай деятель, мезе ёрат няемс Всероссийскяй «Шумбрат» иласа?
–Всероссийскяй праздниксь республиканьконь столицаса етафтома стане, штоба сон араль кепотьксокс Россиянь сембе ся мокшэрзятненди, конат срхкайхть етафтомс «Шумбрат» ила эсь регионцост.
Мярьктяма, катк мокшэрзянь национальнай илатне тоса кармайхть етафневома лия лем ала, кода, кепотьксонди, аф кунара келиста и мазыста Оренбургскяй областень Севернай районца ётась Мокшэрзянь национальнай культурань Областной III фестивальсь, коса савсь тейне улемс. Инь оцю вешфкссь, конань путнесы тяфтама илатнень инголи Российскяй Федерациянь государственнай культурнай политикать Стратегияц ащи вов мезьса—няфнемок национальнай культурань мазышитнень, кемокстамс российскяй нациянь нароттнень ёткса межнациональнай, межрелигиознай и лия соткснень.
«Шумбрат» Всероссийскяй праздникти пара улель тердемс Мордовия Республикань муниципальнай райононь оцюнятнень, штоба синь няелезь, кода етай илась. Тяда меле кармайхть содама, кода етафнема тяфтама илат эсь районцост.
—Раиса Ивановна, пара улель содамс «Морай шачема-касома велесь» Межрегиональнай фольклорнай фестивальть сай пингонц колга.
—Тя фестивальть сай пингонц няйса тяфтамкс. Сай кизоня сонь етафтсаськ Мордовия Республикань инь оцю и мазы велеса, коза эсь заявкаснон коряс сайхть фольклорнай коллектифт республикастонк и Россиянь лия региоттнень эзда. Сембе ня коллектифне—рузонь, мокшэрзянь, татаронь, украинецонь, башкиронь, мариецонь, удмуртонь, коминь, чувашень—кармайхть велеста, коса эряйхть, покодихть и морайхть. Лиякс мярьгомс, сембе синь афкуксонь народнайхть. Сяс «Морай шачема-касома велесь» Межрегиональнай фольклорнай фестивальсь моразеви афкуксонь вайгяльсонза.
—Тонь кочкадязь делегатокс Россиянь Финно-угорскяй народонь VI съездти, кона тяддень сентябрьста етай Коми Республикаса. Съездонь кодама площадкаса мяльце работамс? И мезень колга кармат тоса корхтама?
—Ваномок Россиянь Финно-угорскяй народонь VI съездть программанц, кочкайне эстейне ся площадкатнень, коса корхтаматне кармайхть молема образованиять, наукать, культурать колга.
Корхтама карман Россиянь финно-угорскяй народонь кяльхнень, национальнай культуратнень, газетатнень аф аньцек ванфтомаснон, но и виияфтомаснон квалма. И, тяда башка, делегаттненди карман азондома «Финно-угорскяй газетать» колга, конань нолясы Поволжскяй центрась.
Надиян, съездса тейне удалай ладямс творческяй соткст Россиянь финно-угорскяй лия региононь писательхнень, поэттнень, журналисттнень мархта, штоба пяшкодемс «Финно-угорскяй газетать» од и мялень салай материалса.
—Аф кунара Поволжскяй центрась ётась од эряма вастс—Мордовия Республикань А.С.Пушкинонь лемса Национальнай библиотекать зданияс. Кода тяса марясасть прянтень?
—Поволжскяй центрась ингольдень вастсовок, Национальнай театрань зданияса, аф кальдявста марязе эсь прянц. Но республиканскяй библиотекать зданияса улемась, койсон, няевиста лезды Поволжскяй центрати вятемс тевонзон нинге сяда эрьгавста. Тяса кядялонк финно-угорскяй народонь сембе изданиятне, книгатне. Библиотекав сашенды лама лувида, конатнень мархта тяса можна васетькшнемс. Улихть лия цебярь ширет, конат лездыхть Поволжскяй центрати маластонь пингста лихтемс эсь работанц од серес.
—Сюкпря, Раиса Ивановна. Удалаза арьсефонте!