КАНАЕФНЕНЬ СЕМЕЙНАЙ АНСАМБЛЬСНА

Рузаевскяй райононь Левжа мокшень велесь содаф асу, ёню, творческяй ломанензон, национальнайть, коеньконь-обуцяньконь, родной кяльть ванфтомаснон мархта. Сатомшка лятфтамс «Ару лихтибря» народнай хорть и сельминголет эстокиге эвондайхть мокшень щамса-карямса наряжаф аватне и стирьхне, конатнень коряй пайгонякс кайги вайгяльсна аф кадсазь озадонь седихть ащема кулхцондыть. Ня мокшаватнень эзда фкясь—Левжа велень Культурно-досуговай центрать директороц, вяре азф хорть художественнай руководителец, афкуксонь патриотсь, мокшавась Людмила Гавриловна Канаева. Лемоц содаф ламотненди уликс сатфксонзон инкса. Да аф аньцек Людмила Гавриловна, а Канаефнень марнек семьясна творческяй, музыкань кельги.
Тяддень июнть ушетксста Ульяновскяй областьса тифтольхть итокт «Успешная семья Приволжья—2017» V окружной фестивальти-конкурсти. Мокшэрзянь масторста тосоль Канаефнень лама идень семьясна. Сон азфоль инь цебярькс «Родительская слава» номинацияса. Тя конкурсти Канаефне якасть вейхксонест: Людмила Гавриловна, мирдец Алексей Геннадьевич, колма идьсна—стирьсна Олеся и Татьяна, цёрасна Геннадий, овсна Владимир, Олесянь и Владимиронь идьсна Арсений и Дарина, Людмила Гавриловнань авозец Прасковья Никифоровна.
12 июньцта—Россиянь шиня тя семьясь тернефоль торжественнай пуромксс Саранскяи Республикань Куду, коса васьфнесь Мордовия Республикань Оцюнять аф оцю пингс тевонзон тиендиснон В.Д.Волковонь мархта.
«Мокшень правдать» тячиень номерсонза содафттядязь Канаефнень лама идень семьяснон колга сяда келиста.
Людмила Гавриловнань валонзон коряс, сон и мирдец шачемас коре Левжаста. Комсь ветие кизода инголе пуроптсть семья, шачсть колма идьсна. Алексей Геннадьевич служай Мордовия Республикать эзга Внутренняй тевонь министерстваса, аф весть казьфоль МВД-нь медальса лац работаманкса. Аф ваномок заняфшинц лангс, фалу мушенды пинге семьянц мархта примамс участия пуромкснень эса.
Канаефнень стирьсна Татьяна содаф газетаньконь морафтыензонды. «Мокшень правдаса» лисендсь фотографияц, конань эса Таня щафоль мокшень щамса, кядьсонза—баян. Стирсь аф весть няфнезе прянц музыкальнай ламоц конкурснень эса и сяськондсь эсост. Татьяна отличия мархта шумордазе Саранскяйса Л.П.Кирюковонь лемса музыкальнай училищать. Тяни тонафни М.И.Глинкань лемса Нижегородскяй государственнай консерваторияса. Сон—Россиянь Президентть од таланттнень ширеснон кирдемаснон инкса Грантонь получайсь. Тядде арась II-це степенень лауреатокс «Сиянь лира» музыкальнай исполнительствань 7-це Международнай конкурсса-фестивальса.
Сазороц Олеся туф рьвакс. Мирденц Владимир Кустовонь мархта касфтыхть кафта иднят: Арсениень и Даринань. Но тя аф шорси Олесянди няфнемс прянц творческяй пуромкснень, музыкальнай конкурснень эса. Кустофне сатозь васенце вастть Рузаевкаса етафтф «Молодая семья-2015» нилеце конкурсса.
Людмила Гавриловна азозе, што сон и Олеся семботь тиендьсазь Арсениень и Даринань национальнай коень-обуцянь содайкс и кельгикс касфтомаснон инкса. Аф ваномок сянь лангс, што Владимир Кустов руз, сон Канаефнень семьяса арась афкуксонь мокшалякс. Морси мокшэрзянь морот, тонафнесы мокшень кяльть.
Геннадий Канаев няфни цебярь сатфкст спортса, кельгсы уендеманц. Якай идень искусствань школав, «Пайгоня» идень фольклорнай коллективонь участник.
А.Г.Канаевонь тядяц, Прасковья Никифоровна, мезьса машты лезни рьвянянцты и уноконзонды, уленди мархтост фестивальхнень, пуромкснень эса.
Творческяй и асу ня ломаттне 2005 кизоня пуроптсть семейнай ансамбль. Тяни Канаефнень ансамбльснон содасазь ламотне. И шарьхкотьф мес. Алексей Геннадьевичень, Людмила Гавриловнань, Олесянь пяк мазыхть вайгяльсна, Татьяна машты баянца и музыкальнай лия инструментса  морама, Генавок лац морай. Аньцек шнама валхт азома Прасковья Никифоровнань лемс.
Семейнай ансамбльсь аф весть сяськондсь ламоц фестивальхнень эса. Кядень кайги цяпамаса сонь васьфнесазь ваныхне. Синь азондыхть спасибамань, шнама валхт.
Канаефнень семейнай ансамбльсна—цебярь кепотькс сятненди, кит аф ащихть озадонь седихть минценнеть ванфтоманкса и содафокс тиеманкса.