Поиск по сайту: 
 

Архив
 март 
 2020 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Наши мокшанские сыновья и дочери

ИНКСОНЗА МИНЬ МАРЯТАМА ГОРДОСТЬ

«М о к ш е н ь   п р а в д а с ь»   М о с к о в с к я й
Минь мокшень цёраньке
Кда тячи Московскяй областень Клин ошса кизефтемс, кие тяфтамсь Павел Николаевич Петров, улема, пцтай эрь ётайсь мярьги, што тя «Трест» ЗАО строительнай фирмать и «Клин-Молоко» ЗАО-ть генеральнай директороц. Тя ломанць Подмосковьяса лац содаф. Улема, лувись кизефтьсы, кодама соткст ня оцю Москувонь фирматнень и минь республиканьконь ёткса, вдь тяфтама фирмада Россияса   лама.
 
Тевсь сянь эса, што Павел Николаевич минь земляконьке, сон мокша. Шачемас коре Инсарскяй райононь. Сон пяк кельгсы Мордовиять и маряй инксонза гордость. Катк содасазь мокшень ломаттне, кодама цёрат
касфни Россияти минь аф оцю Мордовия Республиканьке. Ня шитнень П.Н.Петровонь мархта васетькшнесь минь корреспондентоньке и эняльдсь азондомс эсь тевонзон и эряфонц колга.
 
СЮКОНЯН ШАЧЕМА ШИРЕЗТИ
Эряфонь киц Павел Николаевичень ушедсь Инсарскяй райононь Мокшень Паевка велеста. Шачсь сон простой служащаень семьяса. Пашань шабакспингоц ульсь аф теждятнень эзда, сяс мес войнада  мельдень кизотне макссесть эсь колгаст содамс. Сондедонза башка ульсь брадоц и кафта сазоронза. Аляц, Николай Иванович, и тядяц, Пелагея Васильевна, ульсть тевонь кельги ломатть. Конешна, аф теждя ульсь теест путомс нилетнень пильге лангс. Но вачеда семьясь ашезь ащекшне и касфтозь шабаснонга эсь лацост—тевонь кельги и виде вайме ломанькс. Москуда инголе мон васетькшнень Павел Николаевичень ялганц и раднянц Трофим Иванович Петровонь мархта.
 
И вов мезе сон тейне азондсь: «Паша емластокиге ушедсь покодема колхозса. Кизонда ашель стама ши, штоба сон тоса афоль работа: яксесь тишень лядема, шужярень скирдавандама, тинголангу серонь понжафтома... Велеса ашель стама тев, конань сон афоль машта тиемонза. Вейхкса кизоса ни маштсь алашань кильдема, тишень косилкань ладяма, комбайнаса работама, нльне пеелемга пиксоль. Лиякс мярьгомс, трудть и кшить питненц сон содазе емластокиге.  —Нинге Паша пяк кельгозень шахматтнень и животнайхнень,—стаки азондсь Трофим Иванович. —Тянь колга нюрьхкяняста азан кафта примерхт. Тевсь ни кунардонь. Пашанди ульсь ветешка кизоня. Велесонк ульсь пяк пстяди алаша, конань эзда сембе пельсть. Ваксозонза азордонза башка кивок афоль малаткшне, а сон нажядсь теенза и сюдерязе фталуце пильгонц и алашаське ашезе  тока. Эста ни няевсь, што церокшсь аф пелихнень эзда. А кода кельгозе шахматса налхкоманц! Велеса  Паша Петров ульсь инь цебярь шахматистокс. 9-це класса тонафнемста мархтонза налхкома сашендсь мянь партиянь райкомонь 1-це секретарсь, сяс мес Паша  ульсь вии соперникокс. Вов тяфтама минь мокшень цераньке»,—меколи гордостень марязь мярьгсь  Т.И.Петров.
 
Мокшень Паевка велень школать аделамдонза меле сон аф ламос работай колхозса учетчикокс и бригадиркс. 1959кизоня Павелонь сявсазь армияв. Армияда меле поступай тонафнема Мордовскяй государственнай университетть строительнай факультетозонза, очнай отделенияв.
Тячемс лятфнесыне Павел Николаевич студентонь кизотнень. Ярмаконь пяльде семьясь эрясь аф пяк козяста. Рана кулось аляц, теенза ульсь 13 киза. Сембе стакатне-сталмотне прасть тядянц лафтувонзон лангс. И сяс, штоба трямс пря, церати тонафнемада башка сашендовсь работамс. Студент ялганзон мархта рана шобдава или поздна илять шамнесть ваготт. Кода азондсы сонць Павел Николаевич, 5 кизоста савсь шамдомс теенза ськамонза 62 вагон.
Университетть аделамда меле, а тонафнесь сон пяк лац, Павелонди мярьгондсть лядомс аспирантурав мянь колма специальностьс коре. Но сонь пяк мялецоль ушедомс работама. Направления макссть Москуву. Тоса Главцентрстройста кучсазь работама Загорск ошень очистной сооружениятненди мастеркс. Вов тя пингста и ушеды Павел Николаевич Петровонь профессиональнай деятельностец. Аф ваномок одксшинц лангс, сонь ульсь аф емла  эряфонь опытоцка. Сяс, кода корхнихть, васенце шиста сявомок тевти кярьмодсь илештень кятть.
 
Од вастса Павел няфтезе прянц афкуксонь профессионалкс. Вдь лиякс работама сон аф машты. Няемок  церать старандаманц, тостонь руководствась примай решения, етафтомс сонь лия ответственнай вастс: Трестмособлстроень 2-це № участкав. Ся пингть Московскяй областьса тя ульсь фкя инь оцю строительнай организациясь, коса покодсь аф фкя тежянь ломань. Цебярьста работаманкса теенза максыхть квартира Клин ошу. Тясовок мокшень церась няфтезень эсь содамошинзон и мокшень кеме характеронц. Аф лама пингта меле путфоль СМУ-нь мастеркс, прорабкс, участкань начальникокс. И кодама участкаса афоль покоде, тевти малаткшнесь седикс-ваймокс. Сяс аф оцю пингонь етазь кемокстави   трестонь оцюняти заместителькс, а сяльде—оцюнякс, коса покодсь 12 киза.
 
Павел Николаевич аф сятнень эзда, кие лоткси сатфть лангс. Васенцеда СССР-са сон пуропты ПСО строительнай объединения коза сувай марнек строительнай инфраструктурась. Тяса и строительнай комбинатт,  щебеночнай фабрикат и стак тов. Сон кочкави экономикань кизефкснень коряс васенце заместителькс «Главк» ОАО-нь оцюняти. А тя ульсь инь оцю предприятиясь  Москуса. Эряви азомс, панчфоль инголенза кись пяк оцю должносттивок, но эста саволь тумс эряма столицав. Сяс сон примай решения лядомс эряма Клину.
 
СЕМБОСЬ САВСЬ УШЕДОМС ШАВА ВАСТСТА
Самай ся пингть, мзярда перестройкань стака кизотне равжа туцякс лаподсть минь странаньконь лангс, кода и ламоц лия предприятиятне, тя объединенияське срады-калады. Петровонь инголи стяй аф теждя кизефкс. 1993 кизоня сон примай решения—панжемс строительнай фирма.
 
Ся кизось мзярдовок аф юкстави. Сембось савсь ушедомс шава вастста. Кода тячи лятфнесы Павел Николаевич, мзярда объединениять срадомда меле тусь  тоста, зепсонза ульсь аньцек ручкац и кагод пакшец, коза васендакиге тяштезе сай пингонь фирманц лемонц: «Трест». Ся пингть нежедема вастокс ульсь рьвац Люба. Стака пинкнень сон сембоса лездсь теенза и фалу мархтонзоль. Специальностьс коре сон физик. Мирденц карьеранц инкса кадозе ингольдень работанцка.
 
Ся, што Петрофне панчсть строительнай фирма, аньцек азомац теждя. А мзяра трудта тянь эшксса, содасазь, улема, аньцек синць, маластонь ялгасна и коллективоц. Инь стакаль, конешна, эстеенза: деловой васедемат, телефоннай звонокт, командировкат, кенярдемат и пичедемат, а сидеста и вень аф удомат. Сембе сяка Павел Николаевич природнай енюшинц, эряфонь опытонц вельде ладязе тевть тяниень пингть вешффактсь, што тя фирмась примась участия Москувонь Кремлять реконструкцияса, корхтай ламоть колга. Аф аньцек примась участия, а ульсь нльне генеральнай подрядчикокс. Тяда башка, Петровонь строительнай компанияц строязе Президентть резиденциянц.
Тя фирмась строяй аф аньцек лама этажса кутт,  офист, административнай, промышленнай и сельскохозяйственнай объектт, но и тиенди  лама лия тев. Тяса лац ладяф инженернай, монтажнай, градостроительнай и лия документациянь анокламась. Аньцек етай кизоть Клинца эсь средстваснон лангс строясть тежятть квадратнай метра эряма васта. Аф кунара нолдасть тевс лечебно-диагностическяй корпус, од роддом.  Тяфта жа, эсь ярмакснон лангс, Клинца строяйхть Европейскяй стандарттнень коряс лама этажса куд. Кода азозе директорсь, тяфтама объектт Клинца нинге ашельхть. Сонь эсь лацоннец сянь эса, што котельнаецдикт.
 
Лама, пяк лама строясь и тячемс строяй Петров Москуса и Московскяй областьса. Сяс колганза можна азомс: тячи Клин ошсь—тя Петров Павел Николаевич. Аф стак «Петровскяйкс» лемтьф тястонь фкя  инь оцю магазинць. Ванат тя мокшалять лангс и арьсезеват: мзяра эряви вийда и еньда, штоба семботь тянь сатомс, семботь кенеремс тиемс.
 
АРАЛАЗЕ ЗАВОДТЬ ЮМАМАДА-АРАМАДА
Кода ни азыне, Петровонь эряфонь киц аф теждятнень эзда. Сон пяшксе сталмода и од сатфкста. Тянивок Павел Николаевич вешендемань ки лангса. И сон аф ся ломаттнень эзда, кона арьси аньцек эсь выгоданц инкса. Мзярда Клинца сраткшнесь-калаткшнесь Россиять келес лац содаф лофцонь заводсь, Петровонди ламос арьсемс изь сав. Примафоль решения, рамамс банкрот предприятиять. Ся пингста сявомок сон ушеды лемневома «Клинский молочный завод» ЗАО-кс, конанди генеральнай директоркс кочкафоль Павел Николаевич. Васенце задачакс ульсь велень хозяйствань производительхненди шумотнень  пандомасна. Эстокивок предприятияса ушедови оцю ремонт.
 
Аф лама пингонь етазь сон арай тяниень пингонь комплексокс, коса сембе производствась кармай мольфтевома омба масторонь од технологиятнень коряс. Кизоста-кизос предприятиясь касфнесы ноляви продукциять ассортиментонц. Мольфтеви оцю тюрема качествать цебярьгофтоманц инкса. Тянь колга корхтайхть мекольдень конкурсне и выставкатне. 2000 кизоня «Лидер региональной экономики» конкурсса, конань етафтозе Реальнай академиянь международнай академиясь, «Клин-Молоко» ЗАО-сь лиссь сяськикс. 2002 кизоня отечественнай товаронь 4-це Всероссийскяй межотраслевой выставкаса казеви лама питни казнеса: Дипломса—«Крестьянское» тракс ваенкса, Дипломса—«Бифилайф» кисло-молочнай напитканкса, Дипломса—молочнай йогуртонкса, «Золотой Сирин» 1-це степенень медальса творожнай массанкса и стак тов. Лиякс азомс, пцтай сембе продукциясь, кона тяса ноляви: траксонь вайсь, йогуртсь, кефирсь, сырсь, вайвелезсь и лофцонь лия изделиятне аф оцю пингста  казьфтольхть золотань и сиянь медальса.
 
Тя корхтай сянь колга, што предприятиясь пяк заботендай эсь потребителенц колга и пяк кемоста ащи касомань и вииямань кить лангса. Сяс арьсетяма, што 76-це юбилеезонза «Клин-Молоко» ЗАО-сь шятяй нинге сядонга оцю сатфкс мархта и кеняртьфтьсыне Москувонь и Подмосковьянь эряйхнень танцти продукцияса.
 
Тянди улихть сембе условиятне. Оцю лезкс заводти максси синцень велень хозяйствань производственнай кооперативсна, кона нинге аф кунара ульсь убыточнайкс. Тячи Клинскяй районца тя хозяйствась лувондови фкя инь цебярькс. Аньцек потяма тракста тяса 2 тежянть малава. Эрь шиня потьнихть 14 тоннада лама лофца. Инголи тя цифрась ашезь пачкотькшне 2 тежянттивок. Тяда башка улихть тувосна, алашасна и лия жуватасна. Оцю мяль шарфневи автопаркть одолгофтоманцты. Техникадост сняра, што Советскяй Союзонь козя колхозонь председательхневок каяльхть сельме. И тя шарьхкотьф мес. Аньцек сокамань-видемань паксядост 4 тежяньда лама гектар. Кода азозь тейне тястонь эряйхне, Павел Николаевич ашезень када синь юмама-арама. Аф оцю пингста кеподезе хозяйствать плманжа лангста. Панды цебярь зарплата, строясь кутт, макссь работа. Газетать  вельде ломаттне азондыхть теенза оцюдонга-оцю спасиба и катк, кле, сонь ванфтсы Шкабавазсь.
 
УЛЕМС ВАСЕНЦЕКС АФ ТЁЖДЯ
П.Н.Петровонь ширеса улемстон корхтаманьке таргавсь илядти. Тевсь сянь эса, што мзярс ащень кабинетсонза,   ломаттне мольсть и мольсть. Сембонь сон машты васьфтемост, сембонь мархта муй марстонь кяль, колхозникста ушедомок и Москувонь оцю начальникти молемс. Афкукс, ванат сонь лангозонза и арьсезеват, коста аньцек тя ломанць мушендсыне вийхнень. И тяфта етни эрь шись, лиякс теенза аш кода. Да, улемс васенцекс пяк стака.
 
Аф стак Павел Николаевиченди максфоль Московскяй областень почетнай строителень лем, а сяльде—и Россиянь заслуженный строителень лем. Аф весть ульсь Государственнай премиянь лауреатокс, кочкаф Реальнай экономикань международнай академиянь академикокс.  Аф весть ульсь международнай выставкатнень эса участникокс, коса строительстваса эсь разработканзон инкса колмоксть казендевсь золотань, сиянь медальса, орденца и лия питни казнеса. Эсь кельгома работадонза башка Петров мушенды пинге политикативок. Кафксть кочксевсь Мособлсоветонь депутатокс. Лама киза ульсь Клин ошень горсоветонь депутатокс. И коса сон афоль уле, эсь прянц фалу няфнезе порядочнай, тевонь содай и тевонь кельги ломанькс, стамкс, кодамкс касфтозе эсь шачема-касома Мокшень Паевка велец.
 
ПАВАЗУВАН, МЕС ШАЧЕНЬ МОРДОВИЯСА
—Улема, аш масторлангса тяфтама ломань, конань седиец-ваймоц афоль терде шачема-касома уженяти,—тяфта отвечась тейне Павел Николаевич, мзярда кизефтине эсь емла родинанц колга. Эстокивок сельмосонза кфчядсь кати-кодама ризф, таколдома. И тя шарьхкотьф мес. Вдь тяса сон шачсь и кассь, кяпе ласькондсь  лугава и ушедсь мокшекс корхтама. Тясот сонь раднянза и ялганза. Тясот тядянц и алянц калмомарняса, коза сон сашенды эрьМон тонафтонь эсост емластокиге улемс честнай и порядочнай ломанькс, стамкс, кодамкс  касфтомазь моньценьге тядязень мархта алязе. Церазе Слава работай фирмасон коммерческяй директоркс. Сон аделазе Москувонь электроннай техникань институтть, а стирезе Юля работай главнай бухгалтеркс. Сембодонга пяк кельгсайне уноконень, кда эвондакшни етка пингозе, фалу етафнеса мархтост. Аф азовомшка кельгсайне шахматтнень и охотендамазень. Нилексть улень Клин ошень абсолютнай чемпионкс. Аф кунара шахматтнень колга тяштень книга «Шахматная мозаика» лем ала. Пингонь етазь арьсекшнян нолдамс нинге фкя.
 
Тумстон Павел Николаевич азсь эсь кельгома земляконзонды оцюдонга оцю поклон. И тя шарьхкотьф мес, вдь тоса емла родинац, а родинась, кода содаф, мзярдонга аф юксневи, сон фалу ломанть седиса и ваймоса.
 
А.ШИШКАНОВ,
Россиянь Журналистонь союзонь член.

19.04.2007 №
 
 
 

 
НОВОСТИ

ПЕРЯМС КИТЬ КОРОНАВИРУСНАЙ ИНФЕКЦИЯТИ

20.03.2020
 
 

МОРДОВИЯНЬ ГОССОБРАНИЯНЬ ДЕПУТАТТНЕ ШНАЗЬ РФ-нь КОНСТИТУЦИЯТИ ПЕТЬКСНЕНЬ

12 мартста Саранскяйса ётась Мордовия Республикань Государственнай Собраниять 44-це сессияц.  Сонь шинь повесткасонза фкя инь важнай кизефксокс ульсь РФ-нь Конституцияти петькснень колга законть ванондомац. Законти основакс арасть тезисне, конат азфтольхть РФ-нь Президентть Владимир Путинонь мархта Федеральнай Собранияти эсь Посланиясонза. Президентскяй ушетксне сяда тов ульсть келептьфт предложениятнень мяльс сявозь, конат састь рабочай группати, кона пуроптф государстваньконь вятиенц мархта.
 

 

Кода азозе шинь повесткати лихтьф тя кизефксть коряс дискуссиять ушедомстонза МР-нь Госсобраниять Председателец, «Единая Россия» партиянь политсоветть Секретарец Владимир Чибиркин, РФ-нь Конституцияти полафтксне водендафт странаньконь суверенитетонц обеспечендаманцты, граждаттнень социальнай гарантияснон кемокстамаснонды, политическяй системать виияфтоманцты, вешфкснень  касфтомаснонды ломаттненди, конат занцихть государственнай пяк эрявикс должностть.

 

20.03.2020
 

МОРДОВИЯСА 7750 СЕМЬЯТИ МАКСФ РЕСПУБЛИКАНСКЯЙ ТЯДЯНЬ КАПИТАЛСЬ

Тяниень пингть, кода марнек странаса, стане и минь республикасонк оржаста ащихть демографиянь кизефксне. Мордовиянь Оцюнясь В.Д.Волков Государственнай Собранияти Посланиянц эса азозе: «Маластонь кота кизотнень тейнек эряви пяшкодемс афкукс историческяй задача—касфтомс республикань населениять одс шачфнень лувксснон касфтоманц вельде, мезсь  апак сатнеколь комсь ветие кизода ламос». Эряви азомс, мекольдень пингть Мордовияса аф кржа тиендеви од, лама идень семьятнень ширеснон кирдеманкса. Эряфс ётафневи программатне, примсеви мератне каннихть результатт. Тяфта, вете кизоста лама идень семьятнень лувкссна Мордовияса кассь 1,5 тёжяньда. Тяниень пингть республикаса эряй 6685 семья, коса касфтовихть колма и сяда лама шаба. Оцю лезксокс ащи семьятненди тядянь капиталсь, кона тя кизоста сявомок Россиянь Президентть В.В.Путинонь мярьгоманц коряс, кармай      макссевома васенце идень шачфтыхнендивок. Минь республикасонк 2012 кизоста сявомок тевс сувафтф республиканскяй тядянь капиталсь. Кинди сон максови, кодама лувксоц и мезень лангс ули кода карьхцямс сонь? Тянь колга корреспондентоньконь мархта корхнемста азондсь Мордовия Республикань социальнай защитань, трудть и населениять занятостенц коряс министрть заместителец С.И.Шувалова.
 

19.03.2020  № 10
 
 
 

Н.А.КРУЧИНКИН: «ТЕЙНЕК МЯЛЯФТОМА ЭРЬ ЛЕМСЬ…»

2020 кизось странаньконди эсь лацонне. Тядде топоди 75 киза, кода сяськоме Великай Отечественнай войнаса. Россиянь эрь эряйти Победань шись, улема, инь питнись. Сон лятфни тейнек атяньконь-бабаньконь немецко-фашистскяй захватчикнень каршес тюремаса оцюдонга оцю подвигснон колга, и сянь, кодама питне максфоль воляшиньконь инкса.

 

Россиянь Президентть В.В.Путинонь Указонц коряс, 2020 кизось азф Мялямонь и славань кизокс, илати лемтьф мероприятият ётафтовихть марнек странать  келес, тяконь лувксса и минь республикасонк.

 

Ня шитнень корреспондентоньке васетькшнесь 1941-1945 кизонь военнай и трудовой подвигонь Мемориальнай музейть директоронц, «Поиск» Мордовскяй республиканскяй патриотическяй объединениять вятиенц Н.А.Кручинкинонь мархта. Сон азондсь Великай Победать юбилеенцты анокламать колга, а стане жа отвечась лия кизефкснень лангс.

30.01.2020  № 3
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин