КАНАКОФНЕНЬ СЕМЬЯСНА ЛИССЬ ВСЕРОССИЙСКЯЙ КОНКУРССА СЯСЬКИХНЕНЬ ЁТКС

Омбоце кизось мельцек ётафневи «Семья года» всероссийскяй конкурссь. Ётафтыенза Наукать, образованиять и культурать коряс РФ-нь Федерациянь Советонь комитетсь и «Национальная родительская ассоциация социальной поддержки семьи и защиты семейных ценностей» общероссийскяй общественнай организациять Координационнай советоц. Конкурссь водендаф семьянь эряфть престиженц касфнеманкса. Пялькстомась ётафневи «Многодетная семья», «Молодая семья», «Сельская семья», «Золотая семья России» и «Семья—хранитель традиций» номинацияс коре. Тядде сяськихнень ёткс лиссь и Мордовияста Канакофнень семьясна. Теест максфоль «Золотая семья» почётнай лемсь.
Мирттне-рьвятне Иван Осипович и Раиса Григорьевна Канакофне сембе эряфснон ётафтозь Атяшева посёлкаса. Полатне кеподсть пильге лангс сисем итть, тяни синь касыхть вейхкса уноксна и сисем идень уноксна. Синь и лездсть сиренятненди примамс участия вяре азф конкурсса. Кучсть конкурсонь ётафтыхнень электроннай почтас сёрма, коса азондсть эряфснон-ащефснон колга, поладсть сёрмати несколька фотография, а пингонь ётазь содазь, што лиссть сяськихнень ёткс.
Канакофне эряфоньберьф работакшнесть совхозса—Иван Осипович постуфокс, а Раиса Григорьевна телятницакс. Ламос васьфнемда меле оттне пуроптсть семья, а тоса фкя-фкянь мельге шачсть шабасна. Од семьясь эрясь аф тёждяста. Вейхксонест эрясть фкя комнатаса. Кудсна шуфтоннель. Ведь сашендовсь эрь шиня каннемс эшиста. Аноклакшнесть пенгат, вдь газть колга эста арьсематка ашельхть.
—Аш месть корхтамс, тяниень эряфсь сяда тёждя ингольденнеть коряс,—азозень эсь мялензон-арьсеманзон Иван Осипович.—Аф эряви козовок якамс веденкса—сон шуди кранть эзда. Аф эряви аноклакшнемс пенгат, тяни пянакудоньке газовай—крьвястить сенем толнять и эжентть. Одкс пингстонк афи арьсекшнеме, што тяфтама эряф сатсамазь.
Аф ваномок стакатнень-сталмотнень лангс, Канакофнень семьясост фалу азорондась кельгомась, фкя-фкянь ужяльдемась. Иван Осипович лятфнесы, кода одста Раечкац, тяфта кельгозь сон лемнесы рьванц, каванякшнелезе модамарь мархта танцтидонга танцти пярякаса, пачаса. Тяни сяда сидеста стряпшай сонць семьянь азорсь, сяс мес Раиса Григорьевнань шумбрашиц мекольдень пингть ламода лафчемсь. Мирдец коль ужяльди эсонза.
Аф ваномок эряфкшу кизоснон лангс, мирттне-рьвятне Канакофне тячемс, кода корхнихть, стройсот. Ули пересна, коса касфнихть модамарьхть, пурьхкат, шурьхкат и лия перень сёрот. Перень тевса-заботаса сиренятненди лезнихть раднясна. Аф ичкозе эряй цёрасна Александр. Лядыкс идьсна срадсть странаньконь разнай уженяванза, но сидеста сашенкшнихть тядяснон-аляснон варжама. Кода ни азоськ, Канакофнень вейхкса уноксна и сисем идень уноксна. «Эздост сняра, што кой-коста лемснонга тапарякшнесайне,—рахазь азозе Иван Осипович.—Но синь сембе цебярьхть, аф юкснихть колганк,  лезнихть».
Иван Осипович и Раиса Григорьевна марса эряйхть 60-да лама киза ни. Семейнай койхнень-обуцятнень ванфнеманкса Канакофне аф весть казьфтольхть Почетнай грамотаса и ярмаконь премияса.
—Казнетне, тя, конешна, пара, но аф эсост павазсь,—азозе лама идень алясь Иван Осипович.—Главнайсь, штоба улель кельгома ваймоса и шумбрат-тазат улельхть мала ломаттне.