Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Здоровье

ЯКАТАМА КЯПЕ…

Кой-коста эвондакшни мяль каямс пильгс щаматнень и ётамс кяпе шобдавань расать или ляй трвать видеса шуварть, ёмла кевнятнень ланга. Кда тянь ули кода тиемс, тяда атказа тя тевть эзда, вдь сонь ули оцю пользац!
 Массаж марнек ронгти
Пильголапаса улихть биологическяй точкат, конатнень эзда эрсь сотф тя или тона органть мархта. Вельдест ули кода цебярьгофтомс марнек организмать работанц. Сяс, мзярда якатама кяпе, тиендеви эсь лацонь массаж, кона канни польза марнек организмати.
Р.S. Аф эряви якамс кяпе сятненди, кие муцси пря пилькнень ревматизмаснон, подаграть, мочеполовой системань хроническяй урматнень эзда. Тяфтама сярядихненди ванфтома пря вельф кельмофтевомада.
 
Модась МАКССИ ЦЕБЯРЬ ВИЙ
Восточнай медицинаса азф: штоба цебярьгофтомс энергетикать, лиякс азомс, шумбрашить, пяк пара якамс модать ланга кяпе. Тянь тиемста ломанць макссыне модати кальдяв заряттнень, а сон эсь ширденза кази цебярь энергия. Учёнайхне содазь, мезе кяшендеви тяфтама «чудесатнень» эшксс. Тевсь тоса, што тяниень пингонь ломанць пуропни шумбрашити кальдявонь тии пяк лама статическяй электричества. Токафнемок кяпе пилькнень модати, сон явонды тяфтама заряттнень мархта. Сотф тя модать магнитнай полянц мархта. Специальнай приборхне няфнесазь, што ломанть энергетикац ушеткшни цебярьготкшнема модать ланга кяпе якамда меле 40 минутань ётазь. Сяс, лямбе погодать садса или дачаса работамста, сяда сидеста кайсесть пильгс щамантень.
 
Якатама расав тишеть ланга
Атянь-атяньке кемасть, што июльть песта—августть ушетксста праф расатне инь пчкафтыхне. Расать ланга кяпе якаматне аф аньцек календайхть, кемокснесазь марнек организмать, но и лездыхть пчкафтомс стака урматнень. Тяфтама якаматне тренировандасазь сосудатнень, пукшетнень. А расаса ашкодоматне макссихть эряфонь вий, андсазь организмать минеральнай салса, мрдафтсазь одксшить. И мес, шта, аф варжамс кизонь расать пчкафты виенц, кда тянь ули кода тиемс? Мани шобдаваня рана лиседа паксяв и кяпе якада расав тишеть ланга. Васенда ащеда, ускость пукшетнень. Меле тапада, комотнеда. Ушедода 1-2 минутаста и валомне пачфтесть якама пингть 45 минутас. Пилькнень тясть нарне. Максода теест коськомс, щада котфонь носокт и эстокиге карьседа.
А.БОЧКИН,
терапевт, высшай категориянь врач.
 
Кондясти
*Пряса лафнень ётафтоманкса 2 столовай куцюфт аптекань акша панчфнень (ромашка) лангс каяда 1 литра ведь и лакафтость 5 минутат. Оргалясть отварть мархта шяярьхнень.
*Пилькнень, кенчнень лангса грибокть и цилькнень машфтоманкса лезды уксуссь. Кенчнень пчкафтоманкса шоряда 70% уксуснай кислота ведь мархта (1:1) и начфнесть шоряфксса грибокса урмаськотф кенчнень.
*Тустста пидеф шулянь (черника) имошнень (пидесть ламос) венц лангс марсесть экземаса фатяф ронгть вастонзон лангс, ашкодость бинтса. Коське бинттнень лопафнесть лофцонь ведьса.
*Герпесть эзда. Кагод пакшкять лацкас начфтость позатишень (зверобой) вайса (мишендеви аптекаса) и кемокстасть сяряди вастти. Полафнесть несколькаксть шити, 4-5 шида меле герпессь юмай.
 
ПЧКАФТСАСЬК ГРИППТЬ
Кда аньцек сярятькстоде гриппса, тевс нолдамат тяфтама рецепттне.
Лезды пичень путьконь или пихтань од тарадкаста настойсь. Тяфтама настойхне валхтсазь температурать.
1,5 литра лакафтф ведти каяда столовай куцю сал, фкя лимононь сок и фкя грамма аскорбиновай кислота. Солафтость и симондесть 1,5 частоньберьф.
 
Райскяй марьнятнень пользасна
*Коське козть пингста мелкайгофтода колма райскяй марьнянь кеднят, каяда лангозост стакан лакай ведь, вельхтясть таватксса. Кирдесть 2 частт, симондеда марень настойда 1 столовай куцювонь шити котоксть.
*Варикозть пингста 1 литра ведьса пидеда 3 марьхть (видьмонек), ляпоптесть синь и кирдесть комачафста 3 частт. Симондеда стаканонь шобдава и илять, каямок ёткозонза аф лама медь.
*Кельме райскяй марьнясь пицевомать пингста валхтсы керомать и сярятьфть. Керсесть пакшкянь и путость пицеф вастти.
 
КАПСТАНЬ ЮРХНЕ— ТАРГОЗЬФТА
Таргозьфонь ётафты ширец ули капстань коське юронь настойть. 1 столовай куцю мелкайгофтф юрхнень лангс каяда 0,5 литра лакай ведь, кирдесть комачафста 8-10 част. Педясть и симондеда 1/4 стаканонь 3-4-ксть шити, мзярда ярхцамати ляды 15 минута.
 
ВЕРТЬ ЛОТКАФТСЫ ПАЛАКССЬ
Палаксонь свежай лопатне лоткафнесазь верть и арсихть цебярь дезинфицирующай средствакс. Но пяк ни пиди тя касыкссь! Тяряфтода валомс палаксть лопанзон кельме ведьса. 15 минутань ётазь лекарствась анок. Начка палаксть путость керф вастти или шовсесть сонь палаксонь настойса. Тиендеда тяфта несколькаксть, и керфсь ускови.
Л.Пегова.
 
Эзнянь сярятьфта
Фкя пингть пяк сярятькшнельхть тазобедреннай эзняне (суставы). Лездсь тяфтама рецептсь. Мзярда ушедсть панжема соргапанчфне (одуванчик), 2 литрань банкать 1/3 пяльксонц пяшкотькшнине панчфонь прятнень мархта, лангозост кайсень водка, сняра, штоба панчфне улельхть кяшфт. Меле ушедсь панжема сиренць—соргапанчфнень лангс путонь сиренень панчфт—пяшкодсь банкать 2/3 пяльксоц. Мзярда ушедсь панжема модамарьсь, сонь панчфонзон мархта пяшкодине банкать лафту видева, каянь нинге водка и кадыне ащема сёксес. Меле педяйне—лиссь 1,5 литра настойка. Каянь эзонза 2 флакотт «Меновазин» и шовсине шоряфксть мархта кяднень и пильгонень.
Л.Тетерина.
 
ШУМБРАШИТИ ЛЕЗДЫ ТИКЛАСЬ
Кизоньберьф кудсонк аф машни тиклань соксь, конань кирдьса пякстаф банкаса. Тя сокть пяк кельгсазь иденьке. Ватксеса тиклать кеденц, мелкайста керсеса и нолнеса соковыжималкань пачк. Меле сокть лакафнеса и кайсеса стерилизовандаф банкава. Минць мирдезень мархта кельгсаськ свежай сокть. Танцти, а кодама полезнай! Содафозе пчксесь мархтонза панкреатитть эзда. А аф кунара кулине, бта тиклась мрдафнесы алятненди алянь вийснон.
С.ЗАЙЦЕВА.
 
Кулендесть?
*Гипертоникненди пара ащемс толмарть маласа и ванондомс толть лангс. Тя кирьфтасы артериальнай давлениять, сетьмофнесыне нерватнень. Конешна, квартираса толмар аф крьвястят, но ули кода крьвястемс штатол. Путость сонь инголент, матость толть и ванода палы штатолть лангс, панемок сембе мяльхнень—и цебярьхнень, и кальдяфнень. Меле конесть сельмонтень несколька минутас, крхкаста таргасть ваймоть. Таколдомась и кальдяв мяльхне юмайхть.
*Илять и веть организмась сяда кальдявста примасы глюкозать шобдавать и илядть коряс. Тя корхтай сянь колга, што сятненди, кит кадондсазь ярхцамать сяда иляденди, ули кода эчкомомс и урмаськодомс сахарнай диабетса. Медикне мярьгондихть сявомс тянь мяльс. И сятненди, кие курокста эчкоми, и кинь родса-плямаса улихть сахарнай диабетса сярядихть, ламбамда сяда пара ярхцамс шобдава или шить.
 
ОДКСШИНЬ ЭЛИКСИРТЬ ВЕШЕСТЬ АПТЕКАСТА
Маластонь пингть аптекатнень эса эвондай таблеткаса од препарат, конань учёнайхне лемдезь ни одксшинь эликсиркс. Сон шавондсыне клеткатнень, конат вятихть организмать сиредеманцты. Кода результат, эряфть кувалмоц касы 25 кизода. Но исследованиятне коль мольфтевихть. Учёнайхненди сави содамс, кодама противопоказаниянза улихть од веществать и конашкава сон ладяй сирешинь урматнень пингста.

07.12.2017 №48
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин