ЗАЙЦЯСА ВАНФТСАЗЬ МИНЦЕННЕТЬ—МОКШЕННЕТЬ

Зайця велеть колга «Мокшень правдаса» азонкшнеме аф весть. Кодама аньцек полафткст тяса ашельхть! Эряенза мяляфтсазь КПСС-ть ХХ-це съездонц лемса колхозть, конань тружениконза касфнесть козя урожайхть, перень сёрот. Ферманзон эса кирневсть тракст, учат, тувот, алашат, сараст. Тя сембось тусь историяв.
Аф перспективнай велетне эвондасть ётай веконь сизьгемонце кизотнень пингста. Эста ламотне ашезь шарьхкоде, мес Зайцясь лувфоль тяфтамкс. Вдь тяса лац ладяфтольхть тефне. Инголи тяса ульсь 8 кизонь школа, старшай класса тонафнихне якасть  Рыбкинань средняй школав. Сизьгемонце кизотнень тяса панчфоль средняй школа, строяфоль кафта этажса кирпицень здания, коса ульсть аф аньцек класст, но и интернат. Тяза сашендсть иттне Сире Лепиюста, Потьмаста.
Аф ваномок тянь лангс, Зайцянь колхозть шовордазь ичкоздень Ефаева велень «Дружба» колхозть мархта. Ся пингста сявомок велесь ушедсь шамома. Ломаттне тушендсть райцентрань организациятненди. Шоферхне, трактористтне покодсть «Сельхозтехника», «Агропромхимия» организациятнень эса, ламотнень эрь шиня усксезь строительнай объекттненди, кирпицень тиема завоттненди. Велеса нинге ламоль ломаньда, конат кельгозь модань сокаень-видиень  эсь тевснон и эняльдсть местнай, районнай руководительхненди панжемс од хозяйства. Пуромксса примаф решениясна сявфоль мяльс и панчфоль «Зайцевское» колхоз. Председателькс кочкафоль велень Советонь секретарсь, инженерсь-механиксь В.И.Петряков. Од хозяйствась валом стяшендсь пильге лангс, пяшкотькшневсь сембе арьсефсь, государствав прважсевсь сёра, лофца, сиволь, касфневсь и мишендевсь шурьхкя.
Но, мзярда экономикась повсь «шоковай терапиянь» кизотнень килькшс, производствась лувфоль потмаксфтома эшикс, пякснефтольхть общественнай хозяйстватне, колхосне. Надиямась ульсь фермерствать лангс. «Зайцевское» колхозсь шовордафоль Ефаевань хозяйствати. Ня кизотнень пингста Зайцясь няевиста шамсь. Тяни тяза лядсть пцтай аньцек пенсионерхт. Но эряфсь стаки моли. Велесь пяшкотькшни ломаньда кизонь кофнень. Сашендыхть эряфкшуфнень идьсна, уноксна. Тяни Зайцяса эряй 50-да лама ломань. Ули тяса букань касфнемань ферма, медицинскяй пункт, библиотека. Башка мяль шарфневи минценнети—мокшеннети. Велеса ванфтовихть койхне, обуцятне.
Культурно-массовай сембе пуромксне ётафневихть велень библиотекаса. 26 киза библиотекарькс работай Татьяна Васильевна Перякинась, кона кельгсы эсь тевонц, веленц. Эрь пуромксть анокламаса теенза лезнихть мокшень поэтсь, Россиянь Писателень союзонь членць Николай Петрович Циликин и сонь рьвац, мокшень кялень и мокшэрзянь литературань учительницась Анна Павловна Циликинась. Аф кунара синь ётафтсть поэзиянь урок Гуменскяй средняй школаса, коса работай Анна Павловна.
Зайця велень библиотекаса козя этно-краеведческяй уженясь. Кодама аньцек экспонатт тяса аш, пуроптф велеть историяц. Мяль кеподи стендсь, коза кочкафт авань и алянь панархне, нулатне, лия щапне. Тяни Татьяна Васильевна пуропты башка фотоальбом православнай храмть строяманц колга. Ингольдень церькавсь срафтфоль-калафтфоль социалистическяй революциянь кизотнень пингста. Но ломаттнень Шкайти кемамасна ашезь машфтов, озондома синь якасть Ворона шабра велень церькаву.
Татьяна Васильевна мольфти агитационнай оцю работа газетань и журналонь сёрматфтома пингть. Ёрай, штоба эрь кудти канневольхть «Мокшень правда» газетась и «Мокша» журналсь.
В.ЕРЕМКИН.