Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наши мокшанские сыновья и дочери

ТЯЛОНЬ КОФНЕ—ТРАКСОНЬ ВАЗЫЯМА ПИНГЕ

Панжезе литературнай илать и вятезе А.С.Пушкинонь лемса Национальнай библиотекань главнай   библиотекарсь  В.И. Пронина. Сон эсь выступлениясонза литературнай илас пуромфнень инголе, конатнень ёткса ульсть Мордовиянь писательхть, поэтт, журналистт, культурань и общественнай деятельхть, мокшень кялень учительхть, филологическяй факультетонь студентт и Саранскяень школаста тонафнихть, азондсь теест Анатолий Прохорович Тяпаевонь эряфонь и творческяй кинц колга.
Кода пачфтезе пуромфненди В.И.Пронина, А.П.Тяпаевонь васенце стихотворенияц «Урожай» лем ала печатлафоль 1948 кизоня «Мокшень правда» газетаса. Ся пингста сявомок, А.П.Тяпаевонь лиссь поэзиянь и прозань 23 книгац. Народнай писательть произведениянза тяфта жа сидеста лисендсть «Дружба народов», «Нева», «Советский воин», «Костёр» журналхнень эса, ётафневсть удмуртонь, мариецонь, татаронь, башкиронь, чувашень, украинецонь, поляконь, венгрань кяльс и печатлакшневсть тостонь литературнай изданияса и газетаса.
Мордовия Республикань культурань, национальнай политикань, туризмань и архивнай тевонь министрть васенце заместителец А.И.Карьгин эсь выступлениясонза макссь оцю питне А.П.Тяпаевонь поэзиянцты и прозанцты, конат сёрматфт кода оцю, стане и ёмла лувити. И ёфси аф стак, кода мярьгсь сяда тов Александр Иванович, А.П.Тяпаевонь 90 кизонь юбилеенцты литературнай илась ётафтови «Гордость нации» республиканскяй культурно-образовательнай проектть рамкаса. Вдь тячиень илась поладозе тяда ингольденнеть, кона тяфта жа ётафтфоль тя залса и лемтьфоль мокшэрзянь содаф учёнайти В.Я.Ельмеевонди. Тяфта жа мяляфтсаськ республиканскяй няевикс илатнень, конат лемтьфтольхть М.П.Девятаевонь и Г.Я.Меркушкинонь 100 кизонь юбилейснонды. Тя корхтай сянь колга, што Мордовиянь нароттнень представительснон ёткса лама асу ломаньда, конат кадсть няевикс пильгокит историяса. И лама тисть эсь ёмла и оцю родинаснонды—Мордовияти и Россияти.
Сяда тов А.И.Карьгин арьсесь А.П.Тяпаевонди кеме шумбраши, творческяй од сатфкст.
А.П.Тяпаевонь творческяй кинц колга эсь мялензон литературнай илас сафненди тяфта жа пачфтезень «Мокшень правда» газетать главнай редактороц И.С.Лушкин. Кода мярьгсь Иван Степанович, мокшень пцтай сембе поэттне и писательхне ётазь «Мокшень правдать» школанц. И марса газетать мархта касомок-вииямок, синь арсесть мокшень кялень афкуксонь мастеркс, классикокс. Нят—Народнай писательхне и поэттне Яков Пинясов, Михаил Сайгин, Илья Девин, Заслуженнай писательхне и поэттне Петр Левчаев, Юрий Кузнецов, Григорий Пинясов, Максим Бебан и ламотне лиятне. И синь ётксост сонцень вастонц занязе Анатолий Прохорович Тяпаев, кона аф кржа киза покодсь «Мокшень правдаса» литературнай сотрудникокс, культурань и бытонь отделонь заведующайкс, ответственнай секретарькс. И эрь вастса сон маштозь тиендезень сембе тефнень. Сяс ули кода азомс, што арамс Народнай писателькс А.П.Тяпаевонь бславазе «Мокшень правда» газетась.
Литературнай иласа А.П.Тяпаевонь творчестванцты оцю питне тяфта жа макссть и арьсесть юбилярти кеме шумбраши и творческяй од сатфкст Мокшэрзянь народть Межрегиональнай общественнай организациянц Исполкомонц председателец А.С.Лузгин, «Мокша» журналть главнай редактороц В.М.Лобанов, Мордовиянь Заслуженнай поэтсь Р.К.Орлова, филологическяй наукань кандидатсь Е.И.Азыркина и мокшэрзянь содаф лия общественнай и культурнай деятельхне.
Литературнай иласа тяфта жа кайгсть А.П.Тяпаевонь стихонза и юморесканза, конатнень пуромфненди лувозь М.Е.Евсевьевонь лемса МГПИ-нь студенттне и Саранскяень школаса тонафнихне.
Аделавсь литературнай илась мороса, конатнень А.П.Тяпаевонь стихонзон лангс сёрмадозень мокшэрзянь содаф композиторсь А.Е.Пивкин. Мазыста и эрьгавста синь моразень Мордовия Республикань Заслуженнай артисткась Любовь Князькова.
В.НЕСТЕРОВ.
Снимкатне Н.Карановонь


01.02.2018 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин