Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

События

Ширезонк сашендсь госдумань депутатсь В.И.Пискарев

Шить васенце пялестонза депутатсь етафтсь васедема Чамзинскяй муниципальнай райононь оцюнять В.Г.Цыбаковонь мархта. Корхтамась мольфтевсь районть тячиень эряфонц-ащефонц колга. Вячеслав Геннадьевич пачфтезе думскяй комитетонь вятити, што районць тяниень пингть ащи касомань-вииямань ки лангса. Тяса работай несколька оцю предприятия, конат каннихть аф емла доход республиканскяй бюджетти. Цебярь сатфкст сатневихть велень хозяйстваса. Средняй зарплатась районца, В.Г.Цыбаковонь валонзон коряс, 26 тежянь цалковай.
Башка оцю мяль васедемать пингста шарфтфоль школатнень эса шабатнень безопасностьснон ванфтомаснонды. Туфталкс тянди арасть странань несколька ошса седиень ацергофты случайхне, мзярда школьникне оружия мархта сувсесть классненди и ранендакшнезь, шавондозь тонафни ялгаснон и тонафтыснон. Госдумань депутатсь китькстазе, што эрявихть примамс мерат, штоба  тиемс  иттнень школаса улемаснон аф пельксокс. Кепотьксонди, ладямс школатнень эса металлоискательхть, сувафтомс штатти психолокт, охранникт, конат кармайхть ванома зданиять мельге шинек-венек. Азома, што Чамзинскяй районть территорияса 8 школат. Кода азозе В.Г.Цыбаков, штоба ладямс сембонь эса металлоискательхть, эрявксты кафтошка миллион цалковай. Тянь каршес В.И.Пискарев китькстазе, што аш кода нолдамс, штоба финансовай сталмотне тянкса пральхть ученикнень тядяснон-аляснон лангс. Сембе карьхцнень должетт сявомс республиканскяй и муниципальнай власттне.
Тяда башка, васедемаса корхтафоль районца «Единая Россия»     партиянь    проекттнень эряфс етафнемаснон колга. В.Г.Цыбаков азозе, што «Городская среда» проектть коряс меля благоустроендафтольхть вейхкса куд пирьфт  Чамзинкаса и кота куд пирьфт  Комсомольскяй поселкаса. Тянкса карьхцяфоль 10 миллиотт цалковай.
Тяда меле В.И.Пискарев васетькшнесь райононь эряйхнень мархта. Ломаттне мольсть депутатти аф фкя лацонь кизефкс мархта, конат сотфтольхть китнень петемаснон, школатненди и идень саттненди, а стане жа Чамзинкань Культурань кудти ремонтонь тиемать мархта.
Стане жа Госдумань депутатсь ульсь «Лато» ОАО-са, ванозе производствать, корхнесь рабочай коллективть мархта. Шить омбоце пялестонза Саранскяйса Василий Иванович васетькшнесь Мордовия Республикать эзга социальнай страхованиянь Фондть региональнай отделениянц управляющаенц Л.А.Ивановать мархта.
О.Евдокимова.

01.02.2018 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин