Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Национальная тематика

МОРОСЬ ФАЛУ МАРХТОНЗА

—Ираида Васильевна, азонтт, пожалуйста, коса шачеть-касоть, коса емла родинаце?
—Белай свету эвондань Старошайговскяй райононь Краснай поселкаса, тязк и касыне серезень. Тядязе-алязе касфтсть колма стирьхть, конатнень еткста мон инь емлась. Синць шачфтыне-тряйне ульсть трудонь кельги ломатть. Алязе, Василий Нестерович, работцесь школаса историянь учителькс, сон содаф мокшень поэт. Тядязе работцесь колхозса, лама пинге и вий макссесь минь, шабатнень, воспитандаманксонк.
А тяни тага лятфтан эсь шачема-касома уженязень колга. Краснай поселканьке ащи вирь потмоса, ефксонь кодяма мазы вастса. Тя аймаксь фалу ульсь  козя пангса и иможса. Веленьке кунардонь пингста сявомок содафоль трудонь кельги ломанензон мархта. Аньцек тяни шачема уженязе арась аф содавиксокс. Сиредсь сон. Оттне фкя-фкянь мельге тушендсть ошу-коза, а меки мрдайхть аш. И тя, конешна, колси мяль.
—Корхнихть, оцю талант мархта ломанць шаченды. А уленди, тя или тона ширеть коряс асукс арсихть эрязь. Тонь мархтот, Ираида Васильевна, кода лиссь, мзярда ушедоть морама?
—Морамазень кельгине ет шачень. Шять, тя етась тейне тядязень эзда, сон морсекшнесь велень самодеятельностьса. Морось фалу мархтон. Шабакс, пади, афи шарьхкотькшнине мезе моран, но сембе сяка морань. Школаса тонафнемстон моньфтемон ашезь етне фкявок концерт, сидеста лисендень и велень клубонь сценать лангс.
—Арьсекшнеть арамс артисткакс?
—Шабакс тя ульсь тейне инь оцю мялькс. Но, касомок, арьсезевонь, што эряви образования и поступань Саранскяень 19№ училищав стамань-кодамань тевть тонафнема. Но кельгома тевозень, морамать, мархта сембе сяка ашень ява. Тонафнемать эзда ётка пингста морсекшнень «Валдоня» ансамбльса, конань мархта выступандакшнеме училищать инкса аф фкя лацонь пуромкснень эса.
Мзярда тонафнемась малаткшнесь пенцты, шарьхкотьфоль—стамань тевсь аф монне, коль сценать колга арьсекшнень. А тяса велесонк пуроптфоль оцю концерт, коса морайне «Панжи лайме порась» мороть. Райононь культурань отделть эстонь вятиец Громов маладсь тейне тяда меле, шназе выступлениязень и мярьгсь, тейть, кле, виияфнемс эряви асуце, тонафнемс. А мзярс тонафнят, мярьгсь, кармат работама велень клубса. Сявине мяльс азфонц и максыне кагоднень культпросветучилищав. Колма кизот тонафнень, тияк работань. А меле эвондась мялезе морсемс кодамовок ансамбльса. Сань Саранскяи «Келути», няфтине мезе маштан. Тусь мялезост морамазе. И вов ни комсь ветие киза морсян тя коллективса.
—Лятфтак, пожалуйста, коллективть мархта гастрольнай поездкантень колга. Улема, омба масторсовок сашендовсь улендемс?
—Тя афкукс тяфта. Улендеме Германияса, Швейцарияса, Францияса, Польшаса, Эстонияса, Якутияса, Венгрияса, Финляндияса. «Келусь» эсь пингстонза примась участия од ломанень и студентонь Всемирнай фестивальса, кона ётафтфоль Москуса, а стане жа финно-угорскяй нароттнень фестивальса Хельсинкиса и стак тов.
—«Келуть» пяк козя репертуароц. А тонцень, Ираида Васильевна, ули кельгома мороце?
—Кельгсайне мокшень кяльса кайги моротнень. Синь сяда малат ваймоти.
—Морамада башка ули кельгома тевце?
—Пяк кельгса книгань лувомазень, тя ётась тейне алязень эзда. Сяда оцю мяль шарфнян историческяй литературати. Оцю мяльса кярьмотькшнян пидемати-панемати?
—Ушедсь од кизось. Кодама мяльса васьфтить сонь и мезе учендат 2018 кизоть эзда?
—Васьфтине аньцек цебярь мяльса-арьсемаса, вдь, кода корхнихть, кода од кизоть васьфтьсак, стане сонь и ётафтсак. Мезе учендан? Васендакиге сянь, штоба од кизось улель сяда цебярь, сяда тёждя ингольдень кизотнень коряс. Катк сембонь пяшкодевихть инь оцю мяльсна-арьсемасна, штоба сембе улельхть шумбрат. Катк 2018 кизось арай «Келу» ансамбльти творческяй касондомань-вииякшнемань пингокс, улеза сяда лама концертта и ваныда!
—Ираида Васильевна, кодамот мяльхне-арьсематне эряфса авать вастонц коряс?
—Авась, васендакиге, од эряфонь максы. Сонь лангсонза фкя инь ответственнай тевсь—иттнень воспитандамасна, семьянь лямботь ванфтомац. И хуш тяниень пингть ламотне аватнень эзда кярьмотькшнихть бизнесонь вятемати, занцихть пря политикать мархта, синь васендакиге кельги тядят и рьват.
—Спасиба!
 
О.ЕВДОКИМОВА.

01.02.2018 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин