Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

События

МОРДОВИЯСЬ ЛАЦ АНОКЛАЙ ФУТБОЛСА МИРОНЬ ЧЕМПИОНАТТИ

Официальнай мероприятиятнень аделамда меле ульсь пресс-подход, конань пингста М.В.Бабич и В.Д.Волков отвечасть республиканскяй журналисттнень кизефксснон лангс.
Корхтамась ушетфоль полпредть Оренбургскяй областень Орск ошса улеманц эзда. Михаил Бабич васетькшнесь «Саратовские авиалинии» компаниянь самолетонь пассажирхнень, конат шавовсть 11 февральста Подмосковьяса авиакатастрофть пингста, радня и мала ломаньцнон мархта. Лятфтасаськ, катастрофать пингста шавовсь 71 ломань. Шавфнень еткса и Рузаевкань од авась Елена Давыдова. Кода азозе В.Д.Волков, Рузаевкаса эряй шавфть тядяц. Семьянцты максови сембе ширдень лезкс, а стане жа пандови 1 миллион цалковай.
М.В.Бабич азозе, што Оренбургскяй областьса азф траур.
—Трагедиясь киньге ашезе када озадонь седихть ащема,—мярьгсь полпредсь.—Орскяи сась МЧС-нь специалистонь, криминалистонь, здравоохранениянь сотрудниконь оцю группа. Решандавихть кизефксне, конат сотфт шавфнень личностьснон содамаснон, радня ломаньцнон инголе социальнай гарантиятнень и обязательстватнень пяшкотькшнемаснон мархта. Теест максови сембе ширдень лезкс, тяконь лувксса социальнай выплатат кода федеральнай, стане и Московскяй, Оренбургскяй областень и лия региононь бюджеттнень эзда.
Пресс-подходть пингста М.В.Бабич   азозе   журналисттненди, кодама кизефкст кепотьфтольхть Саранскяйса ётафтф совещаниятнень пингста. Кода содавсь, корхтамась мольфтевсь Россиянь Президентонь кочкаматненди анокламать колга. Путфоль задача ётафтомс кочкаматнень демократичнай сетьме обстановкаса РФ-нь законодательствать мяльс сявондезь.
Тяда башка, совещанияса ванфтольхть кизефксне, конат сотфт регионть бюджетнай системанц мархта.
—Мордовиясь касонды-вииякшни регион. Мекольдень кизотнень тяса тевс сувафтф здравоохранениянь, спортонь, культурань, образованиянь лама объект. Сембось тя веши ярмаконь оцю карьхцть. Тянкса республикаса ладявсь финансовай аф тёждя ситуация. Совещаниять пингста примафоль решения регионти федеральнай бюджетста финансовай лезксонь максомать колга,—азозе М.В.Бабич.
Корхтамок республикать 2018 кизонь футболть коряс Миронь чемпионатти анокламанц колга, полпредсь отмечазе мундиальти строяви объекттнень цебярь качестваснон.
—Тячи арьсекшневсь панжемс аэропортовай комплексонь пассажирскяй терминалть, «Восточный обход г.Саранск» од кить,—азозе М.В.Бабич.—Но трагедиять сюнеда сафоль мяльс аф ётафтомс торжественнай мероприятиятнень. Объекттне педа-пес анокт, и ня шитнень ушедозь работаснон штатнай режимса. Лац ащихть тефне стадионть строяманц мархта. Ули надияма, што сон сувафтови тевс эсь пингстонза. Апрель ковста эсонза ётафтовихть тестовай мероприятиятне. Китне, гостиничнай инфраструктурась—сембось строяви ладяф планть-графикть коряс. Койсон, республикась эсь пингстонза и цебярь качестваса аноклай тя оцю спортивнай и политическяй событияти. Кеман, сембось етай оцю уровеньца.
 
О.ЕВДОКИМОВА.

16.02.2018 №
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин