Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Люди и дела

Валда пильгокит


Михаил Михайлович Захаркин шачсь 1936 кизоня эстонь Кадошкинскяй, тяни Старошайговскяй райононь Шувары велеса. Ламотне, мяляфтсазь, да и монцьке мяляфтса Михаил Михайловичень колхозонь председателень должностьса.  Сашендат мяльс, што сон шачемдонза меле эстокиге арась райононь инь оцю хозяйствань вятикс. Но эряви азомс, што эряфонь киц аф теждятнень эздоль, кода и войнань кизонь ламоц иттнень. Аляц, Михаил Петрович, тусь эряфста церанянц шачемда инголе. Тядяц, Прасковья Герасимовна, ниле идьснон касфтозень-кеподезень ськамонза. Шабатне вешфксу тядяснон валда ефси ашесть лисенде. Теенза эрявсь улемс строгайкс, тя ульсь эсь лацонь кельгома, мезть, касомок, иттне пяк лац шарьхкодезь.
Эряфса мезське аф ащи фкя вастса. Фталу лядсть войнань и войнада мельдень стакадонга стака кизотне. 1952 кизоня Михаил шумордазе школать и поступась Чамзинскяй райононь Сабур-Мачкасскяй училищав механизаторкс тонафнема. Ся пингонь сембе церанятне арьсекшнесть сатомс трактористонь профессия. 1953 кизоня Михаил шумордазе тонафнемань тя учреждениять и ушедсь работама трактористокс Шувары велень «Память Ленина» колхозса. 1955 кизонь сексенда тертьфоль армияв, служась морякокс. Мрдамдонза меле комсь кафтува кизоса од церать, ингольдень морякть, кочказь председателькс. Виде, васенда аф колхозонь, а велень потребительскяй обществань председателькс.
Мезьста ушедомс? Кода пачфнезе сонць Михаил Михайлович, ся пингти сельпоса сембось юмафтфоль-арафтфоль. Салафоль мянь печатське. Ушедсь, шарьхкотьф, дисциплинаста, мезти нинге идькс пингстонза тонафтозе тядяц, сяда тов—трактористокс работась и, конешна, морской флотсь. И тевонза тусть. Работась эсь прянь аф ужяльдезь, тянь вешезе и лиятнень эзда. Торговлясь Михаил Михайловиченди арась эряфонь цебярь школакс. Мялезонзоль тя работась. Тянемс маряй гордость тя лемть инкса. Да кржась, штоли, минь мялезонк! Но ся пингть ульсь нинге «эряви!» вал. Эста партиянь райкомсь оцю васта макссесь народнай хозяйстваса кадрань кочкамати.
Вов тяфта 1966 кизоня Михаил Михайлович арась «Серп и Молот» колхозонь председателькс. Первай Ожгаса работась колма кизот. А меле кочкафоль вятикс Гражданскяй войнань Геройть Василий Иванович Чапаевонь лемса колхозонь председателькс.
Велень эряфса тя ульсь ни ефси лия пинге. Нят ульсть эрекламань кизот. Михаил Михайловичень валонзон коряс, крестьяттнень эряфса инь цебярь кизот. Богдановкань колхозсь ся пингть арась оцю губерниякс, коза центральнай усадьбада башка сувасть Саловкась, Од Теризморгась, Павловкась, Омбоце Ожгась, Хитровкась. Тя пингсь—ушеткс РСФСР-нь Аф черноземнай зонать эрекламанцты. Мекпяли государствать «кяденза» пачкодсть Россиянь крестьянскяй центрати. Вели прважафоль лама техника, удобреният, видьмот, строительнай материалхт. Работак, аньцек тят нолгада! Михаил Михайлович тяфта и тиендсь, бта аноконди содазе, што сембе пингть тяфта аф ули. Республикаса инь васенцекс эвондась тяниень пингонь молочнай комплекс. Лама киза мельцек тя комплекссь ульсь инголе моликс районца, республикаса лофцонь получамать коряс. Богдановкань колхозти сувси велетнень эса стройсевсть рабочайхненди и специалисттненди од кутт, да мезе тоса од кутт—од ульцят. Васенцесь, омбоцесь, колмоцесь, нилецесь, ветецесь…
Богдановкать эряфса од страница панчсь населеннай пункту сенем уштомбяльть пачфтемац. Тостонь эряйхнень кудс, васенцетнень районца, пачкодсь газсь. И аф най Богдановкав, но и Омбоце Ожгав, Од Теризморгав, Хитровкав… Тяда башка, населеннай пункттне сотфт центральнай усадьбать мархта асфальтса ацаф киса.
Пингсь лиезь лии. Тячи Михаил Михайловичень седиень озафтома вастоц—иденза, уноконза. Тя ломанть эзда сембонди тейнек эряви тонафнемс, сявомс пример. Сон рядовой трактористонь тевста пачкодсь районца инь цебярь колхозонь председателькс. А ломаттнень мялямс сон ляды аф кода тракторист, сельпонь руководитель, и мянь аф кода райононь администрациянь оцюня или депутатонь Советонь председатель, а кода колхозонь председатель, кона макссь тя тевти 40-да лама киза. Тя эряфоньберьфонь главнай тевоц. Самай эста сон няфтезень организаторскяй маштомошинц, трудонь кельгомать, пефтома эрекшинц и работама маштоманц. Тяфтамкс сон сась и сувась районть историяс. Сон ся пингонь фкя инь содаф председатель.
Ф.Чудаев,
«Трудовая правда» Старошайговскяй районнай газетать главнай редактороц.

16.02.2018 №
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин