Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

«ВАНФТОМС ЁМЛА НАРОТТНЕНЬ РОДНОЙ КЯЛЬСНОН»

Аф кунара Мордовияв сашендсь Финляндиянь асу художниксь, сценаристсь, иллюстраторсь и педагогсь Санна Хукканен. Саранскяйса, а стане жа Вирь алдонь Тавласа, сон ётафтсь мастер-класс комиксонь рисовандамать коряс.
Финкать самац ширезонк сотф сонь «Эрек кяль» социальнай проектонц эряфс ётафнеманц мархта. Проектсь водендаф Россиянь ёмла нароттнень национальнай кяльснон ванфнеманкса и виияфнеманкса. Финно-угорскяй кяльса комиксонь анокламать-рисовандамать коряс васенце мастер-классть Санна Хукканен ётафтозе Ижевскяйса. Тяда меле эсь проектонц мархта художницась ульсь Карелияса, Комиса, Марий Элса, Ханты-Мансийскяй автономнай округса, Мурманскяйса. Мастер-классненди сашендыхть ломаттне, конат пичедихть эсь родной кяльснон ванфтоманкса. Ётксост студентт, журналистт, учительхть, актерхт, библиотекарьхть, пенсионерхт и лият. Аф кржаль сайда и Н.П.Огарёвонь лемса МГУ-нь филологическяй факультету, коса 14 февральста Санна Хукканен азондсь-тонафтсь мокшень и эрзянь кяльса комическяй сюжетонь анокламати. Лездсь теенза финскяй кяльста ётафнись Анна Воронкова.
Санна Хукканен содафтозень пуромфнень эсь комиксонзон мархта, а меле мастер-классонь участникне варжазь эсь вийснон комиксонь анокламаса. Газетаньконь корреспондентоц тя пингть макссь финскяй художницати кой-кодама кизефкст.
—Санна, кода эвондась «Эрек кяль» проектсь, мезсь арась тянди туфталкс?
—2014 кизоня Петрозаводскяйса мон содафтонь Карельскяй народонь союзть мархта. Эста мон васенцеда васедень карельскяй кяльть мархта, и сон няевсь тейне пяк содафокс—мон монць корхтан финскяй кяльть карельскяй диалектсонза. Союзонь активисттне азозь, што кяльсь тяниень пингть ащи юмама-арама лангса: республикаса сонь аш официальнай статусоц, од ломаттне карельскяй кяльса аф корхтайхть. Эста эвондась мяль—тяряфтомс ванфтомс и эреклафтомс кяльть комикснень вельде. Комикссь тиеви тёждяста и аф веши оцю карьхцть, кажнайсь, кинди ули мезе азомс, может сонь тиемс. Вов тяфта шачсь «Эрек кяль» проектсь, кона тяни, арьсян, аф кальдявста ётафневи эряфс финно-угорскяй региоттнень эса.
—Кода арьсят, целайнек мирса-масторса сатомшка мяль шарфневи нароттнень кяльснон, культураснон ванфнемаснонды?
—Работа тянь коряс мольфтеви. Но сяда сидеста корхтави рузонь кяльть и культурать колга. А ёмла нароттнень квалма юксневи. Кеняртьфти, мзярда финно-угорскяй региоттнень эса улендемста васьфнян од ломатть, конат шарфнихть мяль эсь шачема кяльснонды. Синь сермадыхть стихт, морот, ётафнихть эряфс социальнай проектт. Но сембе сяка эсь кяльснон ванфтоманц инкса тюри фкясь-кафтсь. Тядятнень-алятнень мяльсна, штоба шабасна сяда лац содалезь рузонь или английскяй кяльть, штоба тульхть тонафнема Москуву или Питеру.
—Тонць мзяра кяль содат?
—Ниле: финскяйть, английскяйть, карельскяйть и суахили кяльть (Африкань Танзания Республикань государственнай кяльсь).
—Аш мяльце тонафнемс мокшэрзянь кяльхнень?
—Мялезе. Кой-мзяра вал содан ни.
—Мордовиять столицанц, Саранскяйть мархта удалась содафтомс?
—Ужяленди, аф пяк маласта, но ся, мезе удалась няемс, салай мяль. Саранскяйсь, койсон, шарфты европейскяй ошень лангс. Тяса лама од мазы зданияда и синь коль строявихть. Тусь  мялезон  А.С.Пушкинонь лемса национальнай библиотекась, Мордовскяй госуниверситетть од корпусоц. Ошсь дивандафты арушинц мархта.
О.КОЛЕДИНОВА

02.03.2018 №
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин