Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Национальная тематика

Т.А.Кирдяшкинонь шачема шистонза 130 кизонь топодемати

Ковылкинскяй районца шачсь-кассь лама мокшень содаф писательда, поэтта, конатнень пераснон алда лиссь лама талантливай, седиень токай произведенияда. Нят—Тимофей Кирдяшкин, Максим Бебан, Михаил Сайгин, Андрей Чекашкин, Василий Радин, Полина Алешина, Владимир Корчеганов, лиятне. Ужяленди, ламотне эздост ашет шиса, аш етксонк, но синь фалу седисонк, мархтонк, лездыхть эряфсонк, эрь шинь тевсонк.
Тячи минь башка пара мяльса лятфтасаськ мокшень васенце романть тяштиенц Т.А.Кирдяшкинонь. И тя вов мес. Тяддень 21 февральста теенза топодель 130 киза. Шачсь Тимофей Андреевич 1888 кизоня Сире Маманя мокшень велеса. Сон етазень васенце мировой войнань китнень. Великай Октябрьскяй революциять сяськомда меле ульсь советскяй и партийнай работаса, 1918 кизоня кучфоль Краснослободскяй уездонь Сире Озязонь волостной исполкомонь председателькс. Гражданскяй войнать пингста полковой комиссароль.
Войнада меле работась советскяй и велень хозяйствань оргаттнень эса Краснослободскяйса, Пензаса, Саранскяйса и, мекпяли, Москуса—Вирень хозяйствань министерстваса. Сон аделазе вирень Брянскяй институтть.
Кемонь кизода лама сермадсь писательсь «Кели Мокшеть»—историко-революционнай романонц эса. Тяштезе сонь Москуса и ускозе Саранскяи нолдафтомс. Тяса васьфтезь кенярдезь. Минь литературасонк тяфтама оцю жанрань произведения нинге ашель. Ушедсть рукописть ванондомонза. Писательсь тяштезе сонь мокшень нинге лац-ряц апак кемокстак кяльса.
Романть рукописенц лувондозь Н.И.Черапкин, А.С.Малькин, лиятне: рукописть педа-пес пачфтемс эрявсь цебярь редактор. И тя тевсь максфоль мокшень журналистти и писательти Иван Филиппович Чумаковонди. Сон и аноклазе романть печатьс. «Кели Мокшесь» васенда лисендсь 1951 кизоня «Сяськома» альманахса, а 1953 кизоня—Мордкизса башка книгакс. Сувафтовсь тя историческяй книгась школань и вузонь тонафнема программатненди.
Тиражец «Кели Мокшеть» аф кати мзяроль. Романць етафтфоль рузонь кяльс. 1955 кизоня нолневсь рузкс Саранскяйса, 1960 кизоня—Москуса. Но мокшень книгатне ашесть сатне. Лувихне вешсть нолдамс «Кели Мокшеть» тага весть. И тя тифоль. Аньцек тифоль лама кизонь етазь, 1990 кизоня.
Т.А.Кирдяшкин тяшнезе «Кели Мокшеть» омбоце книганцка. Но теенза ашезь аделав. Эздонза лисендсть аньцек аф оцю пакшт. Тяшнесь и аф лама рассказ.

02.03.2018 №
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин