Минь аф юкстатядязь тонь, Григорий Ильич!

Эхи вишкста моли пингсь, бта сон афи моли, а лиезь лии. 3-це мартста топодсь 10 кизот ни, кода аш етксонк, аш мархтонк минь пяк цебярь ялганьке, мокшень содаф журналистсь и писательсь, ару вайме и пси седи ломанць Г.И.Пинясов.
Григорий Ильичень мархта минь фкя-фкянь кармаме содама нинге од пингста, мзярда марса покодеме «Мокшень правда» газетаньконь редакцияса. Тяни ни ниле этажса редакциянь ся кудть вастса, а сон Советскяй ульцясоль, мазомкшни легендарнай флотоводецть Федор Ушаковонь лемса храмсь.
Мокшень, эрзянь, рузонь журналисттне ся сире кудса    50-да лама киза нолязь «Мокшень правда», «Эрзянь правда», «Советская  Мордовия», «Молодой ленинец» газетатнень.
Лама пара лятфнемада кадсь тейнек Печатень ся кудсь. Г.И.Пинясов тоза сась 1962 кизоня, а мон—кемонь кизода сяда меле. Эста сон ульсь ни «штабонь» начальникокс. Тяфта мокшень редакцияса лемневсь ответственнай секретарсь. А мон примафолень младшай литсотрудникокс партийнай отделу. Аф ваномок сянь лангс, што служебнай должностьс коре Григорий Ильич няевиста сяда вяре вастсоль, курокста маладоме фкя-фкянди, кода корхнихть, муме марстонь кяль. Сон, кода и ламотненди лиятненди, стане тейневок лездсь аф аньцек журналистскяй тевса, но и эряфса эрявикс позициянь кочкамаса. Ломанць сон ульсь пяк простой, честнай, порядочнай, совестень содай. А смелшинцты можналь аньцек сельме каямс. Любой обстановкаса аноколь азомс эсь мяленц, эсь позициянц и араламс сонь.
Ответственнай секретарень вастти Г.И.Пинясов бта шачфоль. Работась вишкста и фалу однянь вешендезь. Сонь пингстонза «Мокшень правдась» версткань ширде фкя инь цебярьсель республиканскяй газетатнень еткса.
Эряви азомс сяньге, што ся кизотнень секретариатть лангс прашендсь лама сталмода. «Мокшень правдась», лятфтасаськ, эста лисендсь недяляти колмоксть и оцю форматса. Пяк ни сизефнесть вень-вень нюрьксематне—типографиясь изь кенерькшне кочкамс номерти аноклаф материалхнень—наборнай цехть ашесть сатне виенза. А мзярс аф аделави версткась, ответственнай секретарти ащема и учема. А меле тусть тяфта лемневи «литернай» материалхне. Конатнень Москуста пачфтьсыне телетайпсь 20 часттненди, сят максомат номерти. Русненди сяда пара—кучсазь наборс телетайпонь лентаста и ладясазь вастоваст. А мокшетненди и эрзятненди эрявсть нинге етафтомс родной кяльс. Етафтома сидеста кярьмотькшнесь и ответственнай секретарсь. Аф шуроста теенза куду сашендовсь тумс пяле веста или ефси шобдава. Мзяроль тяфтама кувака веда, афи лувовихть.
Аф ваномок вельф заняфшинц лангс, Григорий Ильич мушендсь пинге ошева и велева командировкас якамска. Сонь перанц алда лисендсть очеркт, статьят, интервьют и лия жанрань материалхт, конатнень фкя-фкянди малакс тиендезень ся, што аноклафтольхть профессиональнай оцю уровеньца, эрь валсь верондафтсь и пачкотькшнесь ломаттнень еньц и седис, кошярясь арьсема, паронь тиема. Но аф сембось тяльгондсь ня материалхненди, ламось «озсесь» ваймоти, нолясь юрхт и лисьфт. И ня лисьфне кармасть мушендома васта сяда оцю художественнай произведениятнень эса. Г.И.Пинясовонь произведениянза лисендсть «Литературная Россия» еженедельникса, «Волга» журналса, Болгарияса, финно-угорскяй республикатнень эса. Сон нолдась «Ветецесь», «Пси киза», «Ялгане и содафоне», «Сембода мала берякти» и лия книгат.
Нинге вов мезсь аф лисенди прястон. Григорий Ильич вестевок ашезь юксне ся ломаттнень колга, кит мезьса-аф мезьса лезнесть теенза. Кепотьксонди, сон сюконязь азондсь лямбе валхт журналистонь тевти васенце тонафтыензонды—В.Г.Шеяновонди, П.Т.Вельматовонди, М.А.Кяшкинонди, В.В.Каргинонди и, конешна, В.М.Сурковонди. Кле, ломаттне сяшкава цебярьхтельхть, етксост работамста ефси изь няев пингть молемац. Конашкава лямботольхть синь седисна, конашкава маштсть тонафтома сталмотнень сяськондема…
«Мокшень правдада» меле Г.И.Пинясов 16 киза ульсь главнай редакторкс «Мокша» журналса, 10 кизот—«Якстерь тяштеня» идень журналса. Мольфтсь общественнай оцю работа, улемок «Масторава» организациянь исполкомса сопредседателькс.
Корхнихть, ломанть эряфоц унксневи аф сяшкава кизоса, кода тевса, сянь мархта, мезе сон тись. Григорий Ильиченди Шкабавазсь макссь эрямс аньцек 63 киза, но тя пингстовок сон кенерсь тиемс лама эсь народонцты. Эсь пара тевонзон, республикать инголе оцю заслуганзон инкса 1994 кизоня теенза максфоль Мордовия Республикань Заслуженнай писатель лем, а 2000 кизоня—Мордовия Республикань Государственнай премия.
Кода содаф, Г.И.Пинясов пяк кельгозе пеетькшнеманц. Тячи минь макссаськ сонь рахсемань аф оцю азксканзон.

И.Лушкин.

 

ШУМОНЬ ПАНДЫ
    Серафимонь кочказь Писателень союзу оцюнякс. Кармась писателень тефнень шарфнема, ярмакнень тевс-коза нолямост. Сонцьке кельгозе «ноляманц», сяс зарплатац ашезь сатне. Кепсесь пандомда бухгалтерть Булькаевонь кядьста. Сувсесь анама мянь кудозонза ваймама шитнень.
Фкя пингть ламода шумуясь. Булькаев цють аф кяшендема эздонза кармась. Весть недляшиста ваны вальмава—Серафим пялонза сай. Шарьхкодсь—ярмаконь анама. Булькаев—вршт—юпадсь шкафть фталу, корхтай рьванцты: «Мярьк, ашан кудса. Мзярда саян, аф содасак».
Сувась Серафим, нардазень нуланяти пильгонзон, шумбракстсь и корхтай Булькаевонь рьванцты:
—А коса ярмаконь министрсь?—тяфта фалу лемнезе ярмаконь кепсемста, маряк, седиенц солафнезе.
—Кати-коза тусь—мезевок афи азсь. Кати-мзярда сай,—каршезонза пшкядсь.
—Эх, палоза толс.—Серафим кашторфтозе зепстонза рямшаф газета пакшть,—а мон сань шумозень пандома.—И дасадяфста шуказе прянц.
Апак учсек шкафсь тарозевсь, фталдонза кулевсь Булькаевонь туста вайгялец:
—Серафим Емельянович, мон кудсан… Рьвясь ашезе сода.
—Эста макст нинге тёжянь цалковай, и саты,—Серафим венептезе кяденц.

 

   Эрясть-ащесть кафта шабрат. Фкясь най кочксесь-пуропнесь паршихть—питни щапт, зрнят-сият, хрустальхть-фарфорхт. Омбоцесь най рамсесь книгат. Лувондсь сонць, макссесь ломаненди.
—Вов эвондай кагодонь сиви сукскя, тии книгатнень эзда почф, ёрдасайть лотку и лядат шава стенатнень эшксс,—аф весть пеетькшнесь козя шабрась ашуть лангса. А ся аньцек пялес трват пеедсь и дивандазь шуказе прянц.
Вармав фкя шиня кеподсь пожар. Палсть кафцьке шабратнень кудсна. Козясь качады толдокшнень лангса пря шяярензон нефтсь, аноколь пондамс прянц, да ашезь ляда пикс пеняцка. Вярьгак вайгяльхть азондозе ризфонц перьфпяльти.
А омбоцесь, бта мезьге ашель, шобдава тусь работама, кода тиендсь лама киза эрь шиня. Сонь сембоц ульсь мархтонза.
Аф стак ломаттне корхнихть: кочкаф-прдаф паршись саты васенце пожарти, а пряс путфсь—эряфонь мекольце минутать самс.

 

  Серафим кельгозе баняса паряманц. Весть мольсь баняв, анась тяльме, а синь шинесновок аш. Тусь меки кяжиста. Мольсь базару, няйсы—татар алясь улавста келувонь тяльмот мишенди—вете трешникт фкять питнец. (Кодгемонце кизотнень кучкаста тяфтамотольхть питнетне).
—Азор,—венептсь ярмакт мишендити,—рамасайне сембе тяльмотнень, ускить тя кудти,—сермадозе адресонц.—Марасайть крыленцязень ваксс.
Ошень прясь аньцек симсь чайда и ванондсь вальмава. Апак учсек вальмалонза лоткась кильтьф алаша. Айдяйсь ушедсь крыленцянц ваксс келувонь тяльмонь марама. Ошень прясь кудста тапочкаса лиссь.
—Тон месендят?—кизефнесы шамнить.
—Азорсь тяфта мярьгсь,—прянь апак кепотть азозе тяльмонь ускись.
—Тя кудса монан азорсь!—кяжиясь ошень прясь.
—Кодама тон азорат? Афкуксонь азорсь тейне цебярьста пандсь,—сонць стаки шамнесь тяльмот.

 

    Мокшень фкя велеса эряй аля. Тевонь кельги, тевонь содай. Аф атказакшни киндивок лездомда. Но ули фкя промозоц: тумстонза эрь мезне юкснесыне гальцянзон. Сай шобдава азорть шири, шовасыне кядензон и корхтай:
—Эх, палоза толс, исяк пялонт гальцянень юкстайне. Азорсь венептьсыне кядьс щафтоманзон, мельгаст максы стопканя прянь пчкафтомс.
Тяни ся велеса лафча мялям ломаттнень лемнесазь: «Тон Хролать гальцянзон лацат».