Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Мокшэрзянь крайсь—

18 мартста Саранск ошса рана шобдавакиге тяса-тоса марявсь музыка, ломаттне эряскодсть избирательнай участкатненди. Тя и шарьхкотьф, вдь теест савсь максомс аф теждя экзамен—кочкамс странаньконди вяти.
557№ избирательнай участкаса, кона панчфоль Мордовия Республикань рузонь драматическяй театраса, эсь гражданскяй долгонц пяшкодезе Мордовиянь Оцюнясь В.Д.Волков. Российскяй Федерациянь Президентонь кочкама Владимир Дмитриевич сась рьванц и церанц мархта. Эсь бюллетененц избирательнай урнати нолдамдонза меле сон маладсь журналисттненди и отвечась синь кизефксснон лангс.
Владимир Дмитриевич азозе, што тячи республикась макссы эсь вайгяленц Россиять и Мордовиять сай пингснон инкса.
—Мордовиясь фалу кочксезе ся курсть, кона водендаф касомати-вииямати, ломаттнень эряфснон цебярьгофтомаснонды,—мярьгсь сон.—Минь мяленьке, штоба сяда тов касондоль-вииякшнель республиканьке, мазомкшнельхть Саранскяйсь и Мордовиянь велетне. Штоба ломаненьке улельхть шумбрат, тянкса лама тиендеви странаса и республикасонк.
Аф ваномок сянь лангс, што 538№ избирательнай участкась, кона ащесь Н.П.Огаревонь лемса МГУ-нь медицинскяй институтть помещенияса, панжезень кенкшензон кафкса частста шобдава, ломаттне пуромсть тяза ламода сяда рана. Васенцетнень етксотольхть М.Расковать ульцяса эряй Никулиттнень семьясна. Ирина Николаевна и Максим Александрович састь вайгялень максома кота кизоса Платон церокшкаснон мархта.
—Тячи пяк важнай ши эрь ломанть эряфса,—лувондсазь Никулиттне.—А сяс ашель кода лядомс шири тя историческяй событиять эзда. Минь мяленьке, штоба цебярь эряфсна улель иденьконь, уноконьконь, штоба синь касольхть вии странаса. Сяс тячи максоськ вайгяленьконь ся кандидатть инкса, конань лангс надиятама.
538№ избирательнай участкаса вайгялень максыхнень еткса ламоль од ломаньда—медицинскяй институтонь студентта. Стирьхне-цератне пара мяльса нолязь избирательнай урнатненди бюллетеньцнон.
—Кочкаматнень эса участвондан васенцеда, а сяс таколдан,—азозе васенце курсонь студенткась Татьяна Кугушева.—Тяка пингть пяк пара мялезон, мес моньге вайгялезе сявови мяльс.
* * *
Саранск ошень «Юбилейный» микрорайонць сятнень эзда, коса сельминголе касыхть эрямань куттне, панчсевихть идень саттне, торговай од центратне, спортивнай площадкатне. Тястонь эряйхнень сяда оцю пялькссна од ломатть. Президентонь кочкамань шиня синь марса сашендсть 617№ избирательнай участкав и максозь эсь вайгяльснон. Васенцетнень еткса, кие нолдазе урнав эсь бюллетененц, ульсь Михаил Косолапов—«Биохимик» предприятиянь покодись.
—Эсь вайгялезень максыне ся кандидатть инкса, конань лангс надиян, кие аф валса, а тевса лезды ломаттненди,—мярьгсь Михаил.—Минь семьяньке ипотекать вельде «Юбилейнайса» рамась квартира, рьвязень Натальянь мархта касфттама кафта итть. Емлати аньцек ков топодсь, сяс молян полафтса рьвязень, штоба сонга сяда куроконе максолезе вайгяленц.
Эряви азомс, тя избирательнай участкаса, кона васенце кизось панчфоль 17№ школаса, сембось тифоль стане, штоба ломаттне афольхть васьфте вайгялень максомста кодамовок прябалат.
—Аньцек нинге фкя част етась, кода панжевсь участканьке, а тя пингста максозь эсь вайгяльснон кафта сядода лама кочкай,—азонды избирательнай комиссиянь председательсь В.В.Винокурова.—Эрь кандидатть сонцень наблюдателец, синь ширдест апрякамань валхт тя пингс ашеме куле. Надиян, афи кармайхть, сяс мес сембось етафтови законц  коре.
Эсь пингстонза панжевсь 569№ избирательнай участкась, кона ладяфоль М.Е.Евсевьевонь лемса Мордовскяй пединстиутть главнай корпуссонза. Эсь вайгяльснон сай пингонь Президентть инкса тяса максозь кода эряфкшу ломаттне, стане и оттне.
—Аф васенце кизось примсян участия тяфтама кочкаматнень эса, но тяфтама оцю активность избирательхнень ширде, кода тядде, аф мяляфтан,—кепотьф мяльса азонды избирательнай комиссиянь председательсь Т.В.Уткина.—Ломаттне надияйхть, што вандыень эряфсь ули сяда цебярь, павазу, странаньке сяда кемоста стяй пильге лангс.
10 частста 30 минутаста участкав сась Мордовия Республикань Правительствать Председателец В.Ф.Сушков. Бюллетенть урнав нолдамдонза меле сон маладсь журналисттненди и азозе эсь мяленц кочкаматнень квалма.
—Тячиень кочкаматнень эзда ащи ся, кодама киге сяда тов кармай молема странась,—мярьгсь Владимир Федорович.—И ламось пяшкодеви, ётафтови эряфс оттнень вийса, конат няфнихть оцю активность Президентонь кочкамаса. Од ломаттнень эзда ащи республикать и странать сай пингоц, Россиять славац.
Марнек тя участкаса эсь вайгяльснон максозь 1700 кочкай.
* * *
18 мартста недляшинь рана шобдава Саранск ошень Октябрьскяй райононь Николаевкань общеобразовательнай средняй школать шири, то тифтнень, то сяда ламонь аськолясть ломаттне. Синь эряскодсть 600 и 601 номер избирательнай участказост, штоба максомс вайгяльснон сянь инкса, кие мяльснон коряс инь достойнайсь.
Пингсь малаткшнесь 8 частти, избирательнай участкатненди кенкшне нинге пякстафтольхть. Маладонь вайгялень максома сафнень эзда фкяти. Корхтазевоме.
—Лысенков Николай Викторович. Кинь инкса максса вайгялезень? Да сянь, кие сяда достойнай, а аш месть надиякшнемс сятнень лангс, конат сембе вийса старандайхть верондафтомс сянди, што нюрьхкяня пингста цють аф пантт веляфтыхть. Тейнек аф эрявихть надияфнематне, тейнек эрявихть тефт. А Президентонди кафкса кандидаттнень еткса ули тяфтама, вов сонь инксонза и максса вайгялезень.
Стаки састь и састь школать шири Николаевкань эряйхне, конатнень, кода пара инжиень, васьфнезень участковай избирательнай комиссиянь председательсь Тамара Юрьевна Бараевась, кона аф васенце кочкаматнень пингста кочксеви ответственнай тя тевти.
Маладоме нинге фкя кочкайти. Тя ульсь Дмитрий Кубанцев, конанди топодсь кемгафксува киза и кона, кода сонць азозе, оцю мяльса сась васенцеда вайгялень максома.
—Пара мялезон, што тяни моньге ули правазе примамс участия Президентонь кочкаматнень эса,—мярьгсь од церась.—А вайгялезень максса сянкса, штоба сяда товга странаньке панчфокс-панжель, штоба тиендевольхть ломаттненди рабочай вастт. Тяни содамошинень касфнесайне колледжса. Шумордамдонза меле арьсекшнян получамс высшай образования. И мялезе, штоба сяда меле муволь тев тейне и лиятненди тязк, эсь республикасонк.
Пингсь малаткшнесь кефкие частти. Тя пингти, кода азозе Т.Бараевась, вайгяльснон максозь избирательхнень комозьда лама процентсна. А ломаттне коль састь и састь гражданскяй долгснон максома.
И вов содамошинь касфнема тя учрежденияса кайгозевсть моротне. Концертонь  участникнень, тостонь школань тонафнихнень,  кулхцондома малаткшнесь вайгялень максома саф эрь ломанць.
Нажядень эздост сяда эряфкшуфти. Тя ульсь Нина Ивановна Калачарова. И вов мезе сон пачфтсь.
—Тейне кафксогемоньда лама киза. Афи мяляфтови мзяроцеда примсян участия кочкаматнень эса! А кода, мле, лиякс. Тя вдь монь страназе, тя монь судьбазе! Тячи вайгялезень максса ся кандидатть инкса, кона сяда товга кармай заботендама сиренятнень колга.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022