Поиск по сайту: 
 

Архив
 сентябрь 
 2018 
пн вт ср чт пт сб вс
     12
3456789
10111213141516
17181920212223
24252627282930

 
 

 

Культура

Морай Александра Куликовась!

6 мартста Россиянь и Мордовиянь Народнай артисткась А.Н.Куликовась васьфтезе эсь юбилеенц. Илада меле Александра Николаевнань мархта васетькшнесь минь корреспондентоньке и эняльдсь отвечамс кизефксонзон лангс.
—Александра Николаевна, «Мокшень правда» газетать редакциянц эзда примайть седи ваксстонь поздравлениятнень юбилейцень мархта! Кеме шумбраши, паваз и творческяй од сатфкст тейть!
—Спасиба!
—Васендакиге лятфтак, пожалуйста, мзярда ушедоть морама?
—Ет шачень, улема. Лиякс ашель кода, вдь минь марнек семьяньке музыкальнаель. Пяк мазыхтольхть вайгяльсна тядязень-алязень, бабазень, а нилецьке брадне морасть музыкальнай инструментса: кие гармонияса, кие баянца, кие гитараса. Семейнай ансамблькс ульсь кода лемдемс минь. Ся пингть сембе велень ломаттне пяк кельгозь морсемаснон. Вов и моньге шачема уженясон, Рузаевскяй райононь Куликовка велеса, аньцек тиевольхть-пяшкодевольхть перень, куд пирьфонь тефне, оттне эряскодольхть клубть малас. И тоса ни ушеткшнесь афкуксонь фестиваль—кие кштий, кие морай.
Мзярда тунь школав, семьяньке етась эряма Рузаевка ошу. Тоса ся пингть панжевсь Ухтомскяень лемса клубсь. Од ломаттненди сон арась асушинь виияфнемань центракс. Кодама аньцек кружок ашезь работа клубть видеса: хоровой, драматическяй, спортивнай и лият. Мон заняйне прязень драматическяй кружокса—налхкине Гердань роленц. Тяста и приметамань клубть видеса пуроптф хорть вятиец Н.В.Киселев. Шназе морамазень, тердемань ширезонза и кармась мархтон работама. Ушедонь примсема участия аф фкя лацонь олимпиадатнень эса и занцень призовой вастт. Эстоньбере ни тейне аф азовомшка кельговсь сценась, сон, мярьгат, тердсь эсон лисемс  тага и тага весть.
—Кода китне-яттне пачфтедязь «Умарина» ансамбльти?
—Мзярда Саранскяйса панчфоль Государственнай рузонь драматическяй театрась, лиятнень мархта ряцок гала-концертс тертьфтольхть и Рузаевкань самодеятельнай артисттне. Етксост улень монга. Выступлениядонк меле маладсь эстонь культурань министрсь П.А.Кокорев и тердемань морсема «Умаринав». Тердемать примайне. Виде, тядязень тя кулясь ашезе кеняртьфте. Васенда, кле, образования получама, стирняй. А морамань тевсь, мярьги, аф профессия. Мяленза-арьсеманза полафтсть аньцек несколька кизода меле, мзярда Москуса Чайковскяень лемса концертнай залса Россиянь коллектифнень конкурссост «Вокал» номинацияса сявине Гран-прить. Тядязе озафоль залса, а концертта меле нажядсь тейне и мярьгсь: «Лац тиеть, стирняй, мес эста ашемайть кулхцонда!» Нинге мялезе азомс, што артисткакс арамасон тядязень пяк оцю путксоц. Сон сонць кельгозе мораманц, а сяс лац шарьхкотькшнемань моньге и сембоса тейне лезнесь. Нльне сявондезе воспитандамс стирезень, мзярда мон улендень гастрольса.
—Кода содаф, морамань тевса маштомошитнень касфнить Эстраднай искусствань Всероссийскяй творческяй мастерскойса. Мезьса мяляфтовсь тейть тя пингсь?
—Васендакиге сянь мархта, мес тяса мон тонафнень Россиянь Народнай артисткать Ирма Петровна Яузень видеса. Сонь школанц етазь тяфтама содаф морсихне, кода Людмила Зыкина, Екатерина Шаврина, Ольга Воронец, Александра Стрельченко и лиятне. Ирма Петровна пяк ламоти тонафтомань.
—1980 кизоня пуроптфоль «Лайме» вокально-инструментальнай ансамбльсь, конанди тон арать художественнай руководителькс…
—Виде. Мрдамок Мордовияв тонафнемать шумордамда меле, сань мяльс пуроптомс коллектив, лемтьфоль сон «Лаймокс». Художественнай руководителькс арань монць, а музыкальнай руководителькс—мирдезе, МР-нь Заслуженнай артистсь В.Ф.Чирков. Коллективти сувасть асу од ломатть, аноклафоль козя концертнай программа. И ушедсть гастрольхне. Эряви азомс, одс пуроптф коллективсь лац примафоль ваныть мархта. Минь улеме Украинаса, Белоруссияса, Кавказса, Средняй Азияса и лия вастса.
90-це кизотнень       концерттнень мархта арась стака, коллективть савсь нолдамс. Мон кармань выступандакшнема кода Мокшэрзянь государственнай филармониянь артистка.
—Репертуарсот мокшэрзянь, рузонь, народнай морот, сире пингонь романст и лия композицият. А эстейть кодама моротне сяда кельговихть?
—Азса тяфта—аф кельгови мороне аш. Мзярда кельгсак мороть, конань морасак, тянь шарьхкотькшнесы кулхцондысь, эста сон моли седиста седис. Шарфтолень мяль нинге вов мезть лангс. Сянкса, штоба артистсь улель интересна ваныти, эряви улемс, тяфта мярьктяма, аф фкя жанраннекс. Кда морсемс фкя лацонь морот, тя мольфтьсы ваныть мяленц.
—Кода ни азфоль, тейть удалась улемс концерт мархта лама ошса, странаса. Кона гастрольхне инь мяляфтовсть?
—Сембода мяляфтовихть омба масторса улематне. Мезсь дивандафты, тоса пяк лац примсевихть рузонь моротне. Аф ваномок кялень перяфксть лангс, омба масторонь сценать лангса выступандамста фалу морсекшнян мокшень морот: «Луганяса келунясь», «Губорняса марлюня» и лият. А ушеткшнеса программазень ся странать моронц эзда, коза сафан.
—Интересна нинге содамс, кода Народнай артисткась ётафнесы ётка пингонц?
—Пяк кельгса природать. Вов тяса мон афкукс ваймосян. Кизонда пара мяльса кочксян панкт, имошт. А нинге кельгса пидемазень-панемазень, инжиень примамазень.
—Шачема велесот сидеста улендят?
—Аф пяк сидеста, радня ломанне тоса ашесть ляда. Но седись сембе сяка уски тоза, коса ётась идькс пингозе. Саян, ётан ульцятнень эзга, лятфтаса, кода шабакс налхксеме лаптаса, курькснеме нурдоняса панда пряста. Фкя ширде, шачема уженять лямбоц максси тейне вийхть, омбоце ширде, колсеви мялезе, вдь мзярда-бди оцю велеть эзда, коса эряфсь комболдозь комболдсь, лядсь аньцек кемоньшка куд.
—Мезть эряфса лувондсак инь питникс?
—Семьять. Тя эрь ломанть инь кеме нежец. Эряфсон ульсь аф тёждя пинге, мзярда арьсень, што лангозон праф ризфне-сталмотне аф кирдевихть. Но тейне лездсть мала ломанне, мезенкса теест спасибан тячемс. А нинге пара валхт мялезе азомс ялганень лемс, конат стане жа фалу мархтонот. Татьяна Николаевна, Галина Николаевна, Сергей Дмитриевич Липатофненди, Валентина Петровна Архипенкоти и сонь мирденцты Валентин Алексеевиченди и ламотненди лиятненди.
—Александра Николаевна, репертуарсот улихть и эсь тяштьф моротне…
—Васенцекс тяштине тядяти лемтьф мороть. Мзярда морайне сонь сценать лангса, приметайне, кода ваныхне тарксезь зепстост руцяняснон, нарнезь сельмоведьснон. Лисенди, морось токазе седиснон. Тя кошардомань тяштемс нинге. Колмогемоньшка мора сёрмадонь. Нолдань музыкальнай диск, коза сувасть эсь тяштьф комсь кафксува морозе. Тя работазти оцю оценка макссь Мордовиянь Оцюнясь В.Д.Волков. Авторскяй моронень мархта дискть инкса тейне максф Мордовия Республикань Государственнай премия.
—Стирце, унокце тусть тонь лацот творческяй киге?
—Стирезе шумордазе Л.П.Кирюковонь лемса музыкальнай училищать. Пяк лац морай пианинаса, но морамань тевсь ашезь ара теенза профессиякс. Сон работай главнай бухгалтеркс. Унокозень пяк мазы вайгялец. Нолдась музыкальнай диск, кафксть ульсь гастрольса Китайса. Тяни заняф иднянц, Викториять, касфтомаса.
—Александра Николаевна, тяддень кизось тейть юбилейнай. Кода арьсекшнят ётафтомс сонь?
—Тяниень пингть аноклан юбилейнай концертс, кона кармай Культурань республиканскяй кудса 12 апрельста. Мархтон сценать лангс лисихть ялгане,  Мокшэрзянь госфилармониянь инь цебярь артисттне и коллектифне. Москуста сай Россиянь Заслуженнай артисткась В.Н.Сабанцева, пуромихть национальнай диаспоратнень вятисна. Концертнай программась кармай оцю и мялень салай. Кие сай, ся, арьсян, аф ужяльди.
—Спасиба!
                                                                                                                                    О.ЕВДОКИМОВА.

22.03.2018 №
 
 
 

 
НОВОСТИ
 
 
 
 

Александр Воробьев посетил новый завод по производству мороженого в Кочкуровском районе

Александр Воробьев посетил новый завод по производству мороженого в Кочкуровском районе
В рамках региональной недели депутат Государственной Думы РФ, член комитета ГД по аграрным вопросам Александр Воробьев побывал с рабочим визитом в Кочкуровском районе.
Он встретился с руководителем агрофирмы «Норов» Александром Поздняковым. «Норов» является крупным сельскохозяйственным предприятием Республики Мордовия. Это многопрофильное предприятие занимается животноводством и растениеводством, переработкой и строительством. В начале августа здесь запустили новую линию по производству мороженого.
Как отметил Александр Поздняков, было выпущено пять пробных партий мороженого. Их уже можно найти в продаже в местных магазинах. Сейчас идет выпуск фирменной этикетки, и буквально через несколько дней новое мороженое появится в магазинах Саранска и республики.
Александр Воробьев осмотрел оборудование и пообщался с сотрудниками завода. По словам заместителя директора завода по глубокой переработке Вячеслава Гузнаева, здесь будет налажено производство пяти наименований продукта: мороженое в вафельном стаканчике, маленький и большой рожки, эскимо, пломбир. Ассортимент будет постоянно расширяться.
«Новый завод – новые перспективы», - говорят молодые специалисты. Зарплата здесь составляет от 30 тысяч рублей, поэтому рабочие приезжают сюда из соседних сел и мордовской столицы.
В этот же день Александр Воробьев посетил социальный центр в селе Семилей. Он пообщался с местными жителями. В разговоре была затронута тема изменений в пенсионной системе. Депутат отметил, что Президент России Владимир Путин в своем обращении сказал, что с 1 января 2019 года предлагается начать выплаты 25% надбавки к фиксированной выплате страховой пенсии для неработающих пенсионеров, живущих на селе, со стажем не менее 30 лет в сельском хозяйстве. Эта инициатива была внесена комитетом Госдумы РФ по аграрным вопросам, и была одобрена Президентом.
31.08.2018
 
 

МАРСТОНЬ САТФКСНЕ КЕНЯРТЬФТИХТЬ

Ковылкинскяй муниципальнай районцта
24 августста Мордовия Республикань Государственнай Собраниять Председателец В.В.Чибиркин рабочай визит мархта ульсь Ковылкинскяй муниципальнай районца. Тяса сон ванозень социальнай, культурнай и  спортивнай  од  объекттнень, конаса пяк козя районць.
Васенда В.В.Чибиркин Ковылкинскяй муниципальнай райононь оцюнять В.И.Ташкинонь мархта ванозь Кочелаево велеса физкультурно-оздоровительнай комплексть. Эсонза спортивнай и тренажернай оцю залда, тенниснай кортта башка, тяфта жа ули тя пингонь бассейна, конаса аф аньцек уендема, но и сай пингонь рекордонь путома тонафнихть велень 200 шаба. Синдедост башка, кода бассейнаса, стане и спортивнай залса недяляти колмоксть кемокснесазь эсь шумбрашиснон Российскяй армиянь военнослужащайхне и правоохранительнай органонь сотрудникне.
30.08.2018  № 34
 

Шумордавсь «Шумбрат, школа!» акциясь

29 августста Саранскяйса Мокшэрзянь национальнай театраса ётась «Шумбрат, школа!» акциять финалоц. Пингстонза школьнай принадлежностень комплектт получасть Саранск ошень лафчста обеспечендаф семьятнень эзда васенце классу моли сяда стирня и цераня.
«Шумбрат, школа!» акциясь кемонь кизот моли «Единая Россия» Всероссийскяй политическяй партиять Мордовскяй региональнай отделениянц, Партиять социальнай платформанц, Мордовия Республикань Государственнай Собраниять депутатскяй корпусонц и  Саранск ошень округонь депутатонь Советть, Мордовия Республикань Населениять заняфшинц, социальнай араламань, трудонь министерствать, «Милосердиянь и шумбрашинь российскяй фонд» Общероссийскяй благотворительнай общественнай фондть Мордовскяй республиканскяй отделениянц, Мордовия Республикань Профсоюснень Федерацияснон, а стане жа индивидуальнай предпринимательхнень, предприятиятнень и общественнай организациятнень патронажснон ала.
Акциять етафтыенза кочксихть школьнай принадлежностть лафчста обеспечендаф и лама идень семьятнень эзда васенце классу моли шабатненди. Акциясь уленди республикань сембе райоттнень эса.
Национальнай театрав  пуромфнень Содамошинь малаткшни шить мархта поздравляндазень «Единая Россия» Всероссийскяй политическяй партиять Мордовскяй региональнай отделениять Секретарец, Мордовия Республикань Государственнай Собраниять Председателец В.В.Чибиркин.
—Несколька шида меле республикань школатне панчсазь эсь кенкшснон шабатненди. Мордовияса лама тиендеви образованиять виияфтоманц инкса. Панчсевихть од школат, арьсеви строямс школат нинге. Школатнень эса сембось тиф тяниень пингонь вешфкснень  коряс, иттненди макссевихть питнефтома учебникт,—мярьгсь Владимир Васильевич.
Тя шиня васенце классу молихнень поздравляндазь Мордовия Республикань Профсоюснень Федерацияснон председателец С.В.Борисов, «Новотроицкий» Агрохолдинг» ООО-ть директороц, «Единая Россия» Партиять Мордовскяй региональнай отделениянц Региональнай политическяй советонц членоц В.В.Руженков, лиятне.
Эрь идсь получась канцелярскяй принадлежностень набор, лия казнет.
Меколи ульсь «Эдельвейс» шоу-группать концертоц.
Т.Альшина.
30.08.2018
 

ШКОЛАСА ТОНАФНИХНЕНЬ КАЗЕЗЬ ПУТЁВКАСА «АРТЕКУ»

МР-нь Госсобранияса ульсь «Единая Россия» партиять и партиять патриотическяй платформанц «Здоровое будущее» федеральнай проектонц рамкаса «Вода и здоровье» Всероссийскяй акциять региональнай этапонц сяськиензон каземасна.
МР-нь Госсобраниять Председателенц заместителец Иван Москаев шарфтсь мяль сянди, што «Вода и здоровье» акциясь сявсь ушеткс 2018 кизонь январьста. Сонь итогонзон коряс—активнай участиянь примаманкса и тиф оцю работанкса—Мордовиясь тага арась примеркс Россиянь лия региоттненди. Акциять мяльса кирдезь республикаса ётась 3 тёжянть малава экологическяй урок школатнень эса и МР-нь Гигиенань и эпидемиологиянь центрать видеса. Школаса тонафнихне аруяфнезь эшинятнень и кочксезь кархчнень лихтибрятнень перьф, тиендсть исследованият ведти. Акциянь участникокс арасть Мордовиянь 387 образовательнай учреждения и 53 тёжяньда лама школаса тонафни. Акциянь «лидеркс» азфоль 2 тёжяньда лама стирня и цёраня.
И вов МР-нь Госсобранияса казезь цебярьдонга цебярьхнень. 15 «лидерсь»—Мордовияста школаса тонафнихне—казьфтольхть «Артек» идень Международнай центрав путевкаса. А кирдемок мяльса Мордовиять акцияса активнайста участиянь примаманц, сонь федеральнай штабоц макссь дополнительна 5 путевкат «Артеку». Тя недялять 13 регионцта 20 школьник молихть идень Международнай центрав 10-це сменати.
МР-нь Госсобранияса чествовандазь аф аньцек школаса тонафнихнень, но и наставникнень. «Единая Россия» партиять региональнай отделениянц Секретаренц, МР-нь Госсобраниять Председателенц Владимир Чибиркинонь Благодарностензон мархта «Вода и здоровье» Всероссийскяй акциять ётафтомаса лезксонкса казьфтольхть «Сделаем вместе!» Всероссийскяй движениять МР-са региональнай штабть членоц, штабть секретарец, Саранск ошень округонь администрациять Социальнай политикать коряс департаментть директоронц заместителец Ольга Ручина, «Сделаем вместе!» Всероссийскяй движениять МР-са региональнай штабонц членоц, РФ-нь Госдумань депутатть Василий Пискаревонь помощникоц Ольга Суродеева, министерстватнень и ведомстватнень представительсна.
30.08.2018
 

Ванфтольхть пенсионнай системать цебярьгофтоманц мархта сотф кизефксне

Ванфтольхть пенсионнай системать цебярьгофтоманц мархта сотф кизефксне
21 августста Саранскяйса «Единая Россия» Всероссийскяй политическяй партиять Мордовскяй региональнай отделениянц секретарец, Партиять Генеральнай Советонц членоц В.В.Чибиркин ётафтсь пресс-конференция. Владимир Васильевич макссь комментарийхть «Единая Россия» партиять Генеральнай Советонц и фракциянзон руководительснон Советснон марстонь заседанияснонды, конань пингста корхтамась мольфтевсь пенсионнай системать цебярьгофтоманц колга.
В.В.Чибиркинонь валонзон коряс, пенсионнай системать цебярьгофтоманц мархта сотф кизефкссь пяк эрявикс, сон таколфтсыне сембе ломаттнень. Инь оцю задачакс ащи пенсиятнень касфтомасна. Ся системась, кона ули тяни, веши лац-ряц арьсеф корректировка. Инь оцю стакась-сталмось сянь эса, што эрь кизоня пенсионерхнень лувкссна касы миллион пяле мархта ломаньда, а работайхнень лувкссна кири. Эрь кизоня Пенсионнай фонду федеральнай бюджетста поступай колма триллионда лама цалковай. Ня средстватнень улель кода нолдамс ламоц отраслятнень и структуратнень виияфтомаснонды.
Мордовияса келиста ванфоль пенсионнай системась и сонь цебярьгофтоманц мархта сотф ширетне. Тя тевса примасть участия общественностть представителенза, депутаттне, эксперттне. Поступасть предложеният, сембе синь пуроптфт марс.
Вяре азф заседанияса примафоль решения, конань эса азфоль мяль Российскяй Федерациянь Государственнай Думань депутаттнень и Федерациянь Советонь члеттнень пенсионнай сембе преференцияснонды отменань тиемать, а стане жа алятненди 60 кизонь и аватненди 55 кизонь топодемста эрь ковонь ярмаконь пандоматнень, ЖКХ-нь услугатнень инкса пандоматнень коряс компенсациять, медикаментонь рамамста компенсациять и ширень кирдемань лия мератнень ванфтомаснон коряс.
«Единая Россия» партиясь ащи сянкса, што коррупционерхнень и взяткань сявихнень кядьста сявф сембе ярмакне кучевольхть видеста Пенсионнай фонду.
Пресс-конференцияса ванфтольхть и лия кизефкст.
Т.АЛЬШИНА.
22.08.2018
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин