Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

События

Пингсь веши эздонк оцю, ответственнай работа

Посланиять ушетксса Мордовиянь Оцюнясь спасибась республикань эряйхненди Россиянь Президентонь кочкаматнень результатснон инкса. Тянь мархта, кле, избирательхне няфтезь, што синь шнасазь странань руководствать политиканц.
Тяда меле региононь вятись тись итокт 2017 кизоня республикать социально-экономическяй касоманцты-виияманцты и азозень сяда товолдонь задачатнень.
Кода мярьгсь В.Д.Волков, 2017 кизось Мордовияти удалафоль. Промышленнай производствань индекссь пачкодсь 110 процентс, а тяддеть васенце кварталстонза учендови 115 процент—странаса тя инь цебярь показательсь. Сявф серонь рекорднай урожай. Кассь эряма вастонь, кинь строямась.
Меля эряфс етафтфоль кеветиеда лама проект, конат сотфт од производствань панчсемать и уликснень одкстоптомаснон мархта. «Оптоволоконные системы» заводть видеса панчф оптическяй волокнать производствац, а получаф продукциясь пачфневи Китаи, Австрияв, Великобританияв, Чехияв, Польшав и лия странатненди, «Биохимикть» видеса панчф фармацевтическяй производствать виияфтоманц коряс Национальнай научно-производственнай центра. «Эпромет» обществать мархта ладяф алюминиевай и серень катанкать нолнемасна, «Эм-Кабельса» панчф высокопрочнай силовой кабелень производствась, а Ардатовскяй светотехническяй заводса—светодиоднай платань и осветительнай приборонь производствась.
Мелясь арась цебярь сатфксонь сатнема пингокс и велень труженикненди. Аф  ваномок кальдяв погодать лангс, получаф серонь пяк цебярь урожай—1 миллион 468 тонна. Кота процентта кассь сиволень, колма процентта лофцонь получамась.
2017 кизоня лама тифоль строительнай отраслять     виияфнеманкса. Аньцек кинь строямс меля нолдафоль 5 миллиартт цалковай. Петьф и строяф 90 вайгяльбень кувалмоса федеральнай трасса и пцтай 95 вайгяльбе региональнай и местнай ки. Оцю работа кинь строямать коряс арьсекшневи пяшкодемс тяддевок. Тянкса стане жа нолдави 5 миллартт цалковай. Башка мяль шарфтови велень китнень строямаснонды-петемаснонды.
Мордовиянь Оцюнясь азозень сатфкснень, конат сатфт социальнай сфераса. Тяфта, мекольдень вете кизотнень образованиянь системать одкстоптоманкса нолдафтольхть оцю инвестицият. Тя пингста строяф и петьф 56 идень сад. Маластонь пингть арьсекшневи строямс и петемс нинге 30 лама идень сад. Вете кизоста строяф и петьф 18 школа. 30 кизоста васенцеда строяф од школа Рузаевкаса—800 вастонди. Тядде стане жа панжеви школа Зубово-Полянскяй райононь Умет поселкаса, 2019 кизоня строяви 450 вастонди школа Краснослободскяй и 140 вастонди школа Торбеевскяй райононь Дракина велеса.
Цебярь шири полафткст эвондасть и здравоохраненияса. Мордовияса вете кизоста ломаттнень эряфснон кувалмоц кассь 1,5 кизода. Стане жа вете кизоста 7,5 процентта удалась кирьфтамс кулсихнень лувксснон. В.Д.Волков лятфтазе: Россиянь Президентсь Федеральнай Собранияти Посланиясонза путсь задача фельдшерско-акушерскяй пункттнень панжемаснон коряс. Колма кизоста ФАП-т и амбулаторият эрявихть панжемс сембе населеннай   пункттнень эса, коса эряй аф 2000 кржа ломань. А велетнень эса, коса эряйда тежяньда кржа, кармайхть работама мобильнай медицинскяй комплекст. Маластонь пингть Мордовияса эряви строямс нинге 45 ФАП, а 219 фельдшерско-акушерскяй пунктти тиема капитальнай ремонт. Саранскяйса строявихть кафта од поликлиникат—идень и оцювонь, Республиканскяй онкодиспансерть поликлиникац. Россиянь Президентть резервнай фондстонза нолдаф средстватнень лангс тиеви капитальнай ремонт Республиканскяй инфекционнай больницяти и 2№ идень поликлиникать зданиянцты.
Корхтамок сяда товолдонди задачатнень колга, Мордовиянь Оцюнясь китькстазе, што 2018 кизоня заработнай платась республикаса касфтома стане, штоба сон кафтонь-крда инголдалезе инфляциять. Стане жа путф задача  1,5-крда касфтомс республикаса эряма вастонь строямать. Оцю тефт ащихть агропромышленнай комплексть инголе. Тядде эряви шумордамс ламоц животноводческяй, тепличнай комплекснень строямаснон. Арьсекшневи касфтомс сиволень получамать 305 тежянь тоннас, лофцть—425 тежянь тоннас и получамс 1 миллиард 425 миллион ал.
2018 кизоня Мордовиясь примасыне футболть коряс Миронь чемпионатть матчензон. Кода азозе В.Д.Волков, тя событияти анокламста республикась ламода полафтсь цебярь шири. Строяф объекттне кармайхть служама ломаттненди лама киза чемпионатта мелевок. Путф задача етафтомс мундиальть инь оцю уровеньца.
Посланияса стане азф, што тядде 5 процентта эряви касфтомс строительнай работань объемсь. Арьсекшневи строямс 333 тежянь квадратнай метра эряма васта, а стане жа 60 вайгяльбе федеральнай, республиканскяй и местнай ки.
Посланиять лувомста В.Д.Волков шарфтозе пуромфнень мяльснон сянди, што тиема сембось ломаттнень эряфснон цебярьгофтоманкса, аноклама достойнай эряф иденьконди и уноконьконди.
                                                                                                                                    О.ЕВДОКИМОВА.

20.04.2018 №
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин