Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Тема дня

ШУМБРАТ, АЭРОПОРТ!

12 майста Саранскяйса официальнайста панчфоль аэропортсь. Торжественнай мероприятияса примасть участия Россиянь транспортонь министрть тевонзон тиендисна Максим Соколов и Мордовия Республикань Оцюнясь Владимир Волков.
Минтрансть вятиец шарфтсь мяль сянди, што тяниень пингонь од аэропортть оцю значенияц республикать сяда товолдонь касондоманкса-вииякшнеманкса, тяконь лувксса регионть лангс инвестиционнай и туристическяй мялень шарфнемать касфнеманкса. Стане жа Максим Соколов азсь благодарностень валхт Мордовиянь Оцюняти тя пяк эрявикс проектть эряфс ётафтоманкса.
Максим Соколов лятфтазе, што Саранскяень аэропортсь ушедсь примсема рейснень нинге февральста, и республикань ламоц эряйхненди и ошень инжихненди удалась ни содафтомс од объектть мархта.
«Сембе од инфраструктурась строяфоль Миронь чемпионатти анокламань программать коряс, и сон кемотть киза кармай служама республикать сяда товолдонь вииякшнеманкса,—мярьгсь      Минтрансонь оцюнясь.—Аф тёждяль мумс финансирования, кода региональнай, стане и федеральнай, ульсть кой-кодама сталмот. Но работамок командаса, странань Президентть и Правительствать ширень кирдемаснон вельде, минь муме эрявикс средстват, и тя объектсь ламода мировой футбольнай первенствать ушедомда инголе сувафтфоль тевс. Тячи Мордовиять транспортнай инфраструктурац педа-пес анок Миронь чемпионатти».
Мордовиянь Оцюнясь Владимир Волков поздравляндазень республикань эряйхнень тя оцю событиять мархта. Аэропортсь—тя чемпионатонь наследиять фкя инь васенце объектоц, кона кармай работама ломаттненди лама-лама киза. Проектсь ётафтфоль эряфс странань Президентть и Правительствать, Минтрансть и лична Максим Юрьевич Соколовонь, а стане жа полномочнай представительть Михаил Викторович Бабичень ширень кирдемаснон вельде.

17.05.2018 №19
 
 
 

 
НОВОСТИ
 
 

Исавелети—300 киза

Эрь кизоня Тройцянь шиня Инсарскяй райононь Исавели кочксеви лама ломаньда. Тядде тяза сашендсь кафта тежянть малава инжи странать сембе уженястонза: Москуста, Санкт-Петербургста, Самараста, Краснодарста, Коми Республикаста, лия областтнень и республикатнень эзда.
Тядде вели ломаттнень пуроптозень аф аньцек Тройцясь, ня шитнень Исавелети топодсь 300 киза. Велесь козя эсь историянц, коензон, обуцянзон мархта, тяса шачсь лама содаф ломаньда. Нят: ученайсь, писательсь, драматургсь, виднай общественнай деятельсь Г.Я.Меркушкин, Мордовия Республикань Почетнай Гражданинць, Российскяй Федерациянь Президентть видеса финно-угорскяй  нароттнень сембе масторонь конгрессть спецпредставителец Н.И.Меркушкин, медицинскяй наукань докторхне В.А.Базаев и М.Д.Кузьмин, лама лия содаф ломань. Велесь инжихнень васьфтезень эсь мазышинц мархта. Тяса лама од кудта, аф кунара панчфт социальнай центра, идень сад, од ФАП, строяфт спортивнай площадкат, культурань объектт, велеть мазопнесы Шкаень кудсь. Ламонцне илас састь идьснон, унокснон мархта, ломаттне кштисть, морасть, седисна и ваймосна пяшксель кенярдемада. Фкя-фкянь мельге сцена лангста кайгсть поздравленият, илань вятихне   азондсть велеть историянц колга, лятфтазь сятнень лемснон, кит аралазь Родинать вракнень эзда. Лама велеряй фронтста ашесть мрда, максозь эряфснон минь инксонк.
20.06.2019  № 24
 

Минь поздравленияньке

13.06.2019  № 23
 
 
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин