Поиск по сайту: 
 

Архив
 январь 
 2019 
пн вт ср чт пт сб вс
 123456
78910111213
14151617181920
21222324252627
28293031   

 
 

 

Наши мокшанские сыновья и дочери

СЁРМАДСЬ СТАНЕ, БТА АНЬЦЕК ИСЯК УЛЬСЬ БОЙСА

Ялгань вал
Аф кунара тусь эряфста Мордовия Республикань содаф писательсь и журналистсь, Великай Отечественнай войнань ветеранць М.Н.Бычков. Тусь      97-це кизонц лангса. Мзярда удалсесь мархтонза васьфнемс, корхнемс, гайфнемс телефонца, сон вестевок ашезь пеняцякшне эсь эряфонц, шумбрашинц лангс. Мзярда кизефнине: «Кода, Михаил Николаевич, тефне?»,—фалу отвечсесь:
—Атякс.
—Ся кода?
—Кизос коре.
И эстокиге ушеткшнель шутендама, кодамовок пеетьксонь азондома. Пеетькшнеманц-сингоряманц пяк кельгозе. Кулхцондат эсонза и саят мяльс: нинге аф атяннет, а од цераннет мяленза-арьсеманза. Мярьгат, Михаил Николаевичень ашет кодамовок пичефксонза, ризфонза. Сембось мялезонза, сембось сонь кеняртьфтьсы.
М.Н.Бычков фалу ульсь од тяштихненди тонафтыкс. Лувсак сатиранц и кеподи мяльце. Тяшкава оржат валонза, пачкат етайхть. Лац содазе велень ломаттнень психологияснон, содазе, кинь лангса и кода можна шутендамс, рахсемс. Сон, кода аф кивок лиясь, шарьхкотькшнезе, што валса можна аф аньцек мяль кеподемс, но и шавомс. Сяс Михаил Николаевич содазе, кода сермадомс. Аф стак сонь кельгозь и оттне, и сиретне. Ашельхть лангозонза аф кяжень кирдихть, аф пеняцяйхть. И сонцьке киньге лангс ашезь кирде кяж.
2015 кизоня Мордовскяй книжнай издательстваса лиссь «Писатели Мордовии» библиографическяй справочниксь. Аш тя кафта томонь изданияса М.Н.Бычковонь лемоц. А вдь сон «Мокшень правдав» и «Мокша» журналу серматкшнемда башка нолдась книгат. Лувити синь содафт, кельговсть. Литературнай критикне макссть теест оцю питне. Тяньге васьфтезе шутендазь. Кле, экономия тиихть лангсон. Койсон, Михаил Николаевич эряволь сувафтомс тя справочникти. Мокшэрзянь литературати путксоц пяк оцю. Тя и книганза, тя и лятфнеманза. Сонь лацонза сермадыда аф лама. Мон, васендакиге, кирдьсайне мяльса сонь юмористическяй произведениянзон.
Михаил Николаевич пяк цебярь тонафтыель, маштсь эрявикс советонь максома. «Мокша» журналса лиссь, мяляфтса, «Шавача» повестезе. Пцтай васенцекс сонь лувозе М.Н.Бычков. Морафтомдонза меле кучсь тейне серма. Эсонза шнамань, макссь цебярь  оценка произведениязти. Аньцек лемоц мес-бди ашезь ту мялезонза.
Мзярда шумбраль-тазаль, Михаил Николаевич фалу гайфнель, тяшнеме фкя-фкянди сермат, азонкшнеськ мяленьконь-арьсеманьконь серматфоньконь колга. Лама корхнеме эсь кяльсонк лисенди «Мокшень правдать» колга. Войнань ветеранть тя пяк мялезонзоль.
Тядде Победань Шись ётась Михаил Николаевичфтома. Сон пяк кельгозе тя илать. Хуш и мекольдень кизотнень ашезь лисенде ошень праздникненди, а сединек-ваймонек ульсь Рузаевкань, республикань, странань эряйхнень мархта. Тя шись, мярьгат, макссесь Михаил Николаевиченди од вийхть, пацят, кати-кодама верондама.
Войнань темась, фронтовик ялганза фалу ульсть васенце вастса М.Н.Бычковонь сермадомань тевса. Тя темась теенза содафоль, пяк малаль, улема, сяс, мес сембось няйфоль эсь сельмосонза. Сермадсь стане, бта исяк аньцек ульсь бойса. Азондомац, серматфоц пяк верондафтоль. Мон арьсян, што сась ся пингсь, мзярда М.Н.Бычковонь колгавок можна сермадомс документальнай повесть. Сон видексонь фронтовик, войнань герой. Ульсь лама бойса и сяськикс мрдась куду. А мзяра сермадсь эряфоньберьф. Афоль сата «Писатели Мордовии» библиографическяй справочникть фкя томоц, штоба лятфтамс сонь работанзон.
 
Илья Вешкин,
Россиянь Писателень союзонь член.

17.05.2018 №19
 
 
 

 
НОВОСТИ
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

Ули мезенкса кеняртькшнемс

Монь, кода од ломанень, пяк лад мялезон ся, кода кизоста кизос коль сяда и сяда мазыкс и арукс арси республиканьконь столицац—Саранскяйсь. Тяни ётат сонь ульцянзон, проспектонзон, парконзон, лия вастонзон эзга и седице пяшкоди кенярьдемада, гордостьта и ошть, и марнек Мордовиять инкса. Сембода лама полафткста, конешна, эвондась тяса футболть коряс Миронь чемпионатти анокламста. Ваносте, кодамот тяни ошень китне, вокзалхне! Мяльцень стане жа саласазь «Тавла» гостинично-жилой од комплекссь и Экопарксь. Марнек полафтсь, лиякс арась аэропортсь. Тяни тяста самолетса можна пачкодемс Москуву и Санкт-Петербургу. А мзяра строяф идень садта, школада, гипермаркетта, лама лия пяк эрявикс объектта. А кода аф лятфтамс уникальнай спортивнай объектть—«Мордовия Арена» стадионть. Сон сембоса отвечай тяниень пингонь инь оцю вешфксненди. Аф стак самай тяса меля налхксть миронь инь вии футбольнай командатне. Тя ли аф фантастика, тя ли аф честь сембонди тейнек. А ёфси аф кунара Саранскяйса ётафтфоль эйть лангса конькаса фигурнайста куркснемать коряс Россиянь чемпионатсь. И тяконь лаца спортонь оцю праздникт миньцонк ётафневихть аф шуроста.
Спортсь лихтезе столицаньконь пяк няевикс вастс, тиезе сонь содафокс аф аньцек Россияса, а марнек мирса-масторса. «Саранскяйсь—тя афкуксонь Европейскяй ош, тяса сембось тиф-ладяф оцю уровеньца»,—тяфта азондсазь эсь мяльснон-арьсемаснон столицаньконь колга тяза сашенды инжихне.
Мария Тарасова.
10.01.2019  № 1
 

10 январьста—Мордовиять шачема шиц

Панчфокс панчт, мокшэрзянь краеньке!
Тячи Мордовия Республиканьконь шачема шиц. Топодсь 89 киза, кода теенза максф государственность. 1930 кизонь 10 январьста ВЦИК-ть Президиумоц примась постановления Мордовскяй округть Мордовскяй автономнай областекс тиеманц колга. Тя шись и лувондови мокшэрзянь республикати шачема шикс. А ниле кизода меле тифоль Мордовскяй АССР-сь.
Тянь мархта путфоль цебярь ушеткс касоманди-виияманди. Ётаф пингста ламода кассь республикать экономическяй виец, кеподсь культурась, образованиясь, наукась. Ламоц земляконьке арасть гордостекс аф аньцек Мордовияса, но и сембе Россияса.
Сембода оцю сатфкст миньцонк сатфт мекольдень кизотнень. Мордовиясь путневи примеркс лиятненди, тяза сашендыхть опытонкса, тонафнема. И ули мезти тонафнемс. Республиканьке тячи—странать инь  вишкста вииякшни региононзон эзда фкясь.
10.01.2019  № 1
 

Мордовия Республикань культурань, национальнай политикань, туризмань и архивнай тевонь министрсь А.М.ЧУШКИН: «ЛАДЯМА СЕМЬЯСОНТ И САТФКСТ ТЕВСОНТ!»

28.12.2018
 

Н.П.Огарёвонь лемса Национальнай исследовательскяй Мордовскяй государственнай университетонь ректорсь С.М.ВДОВИН: «КАТК ЁТАФТОВИХТЬ ЭРЯФС СЕМБЕ ВАЛДА МЯЛЕНТЕ И ПЛАНОНТЕ!»

28.12.2018
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин