Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Тема дня

ВАНОНДОВСТЬ ФУТБОЛТЬ МИРОНЬ ЧЕМПИОНАТТЬ ИТОГОНЗА


Тяса примась участия Мордовиянь Оцюнясь В.Д.Волков
Пяденцяста, 20 июльста, Мордовиянь Оцюнясь Владимир Волков примась участия «Организационный комитет «Россия 2018» аф коммерческяй автономнай организациять наблюдательнай советонц и физкультурать и спортть виияфтомаснон коряс Российскяй Федерациянь Президентть видеса Советть марстонь заседанияса, кона ётафтовсь Калининградса. Ванондовсть 2018 кизонь футболть коряс Миронь чемпионатть ётафтомань итогонза, инфраструктурать, спортивнай      объекттнень сяда товолдонь тевс нолдамаснон коряс кизефксне.
Эсь выступлениянц ушетксста Российскяй Федерациянь Президентсь Владимир Путин мярьгсь: «Россиясь казсь мирти аф юкстави праздник. Сон сувась ни историяти кода FIFA-нь фкя инь мазы, спортивнай ширде аф эсь лацонь, но и результативнай турнир, сембе пингс мяляфтови фкя-фкянди паронь арьсемань и марса улемань, аф озадонь седихть ащиень атмосферань и фкя-фкянди лездомань примеркс».
Стане жа государствань Оцюнясь поздравляндазень сембонь, кие ульсь заняф чемпионатти анокламать и ётафтомать мархта, башка благодарностень валхт азфтольхть региоттненди, коса ётасть налхкоматне, синь губернаторснонды.
Владимир Путин азозе: «Минь задачаньке—арьсемс конкретнай мерат, конатненди вийс коре эффективнайста нолдамс тевс футбольнай турнирти эвондаф тяниень пингонь стадиоттне, паксятне, площадкатне и стак тов».
Россиянь Президентть выступлениянц оцю пяльксоц ульсь лемтьф чемпионатть наследиянц эффективнайста тевс ноляманц коряс кизефксненди, тяконь лувксса—и аф материальнай ширети. «Содаф, што чемпионатонь объекттне должетт лац-ряц работамс чемпионатть шумордамдонза мелевок, сянкса синь и тифтольхть. Мон мярьгондян сявомс мяльс спортивнай инфраструктурать эффективнайста тевс ноляманц 2018 кизонди федеральнай бюджетти полафтксонь сувафтомста и 2019-2021 кизонь бюджетти. Чемпионатонь объекттнень виияфтомань программаснон ширеснон кирдемасна кувалгофтови вете кизос сяс, штоба 2024 кизоти синь улельхть эсь прянь окупаемайкс, служальхть ошненди общественнай, деловой, культурнай эряфонь центракс».
Спортонь министерствати мярькф азондомс региоттненди тренировочнай паксятнень и стадиоттнень максомаснон коряс механизматнень и пингть колга, а стане жа идень футбольнай центрань тиемать колга, конат арьсекшневсть пуроптомс Миронь чемпионатть инфраструктуранц базаса.
Заседанияса корхтась Россиянь спортонь министрсь, кона стане жа макссь оцю оценка региоттнень рольснонды 2018 кизонь Миронь чемпионатть анокламаса и ётафтомаса. Павел Колобков кепотьксонди сявозе матчть, кона ульсь ётафтф 17 июльста Саранскяйса «Мордовия Арена» стадионца, кода чемпионатта мельдень спортивнай инфраструктурать тевс нолдамань примеркс. «Мордовия Аренаса» национальнай Футбольнай лигать панжемаса васетькшнесть Мордовиянь и Нижняй Новгородонь футбольнай командатне. Лятфтасаськ, матчти сашендсь 26,5 тёжянь зритель.
«Россия 2018» Оргкомитетть генеральнай руководителец Алексей Сорокин, азондомок чемпионатонь омба масторонь инжихнень мяльснон Россиянь эряйхнень инжиень примай ширеснон колга, кепотьксонди азондозе случайть, мзярда Колумбиянь ошнень эзда фкя мэрсь, кона сась Колумбия-Япония матчти, эльбядезь тись броня Пензань отельса Саранскяйть вастс. Ардомс шабрань ошу ашезь сав—колумбиецть рьванц мархта сявозе эряма эсь квартиразонза Мордовскяй университетонь преподавательсь, кона ульсь мундиальса переводчикокс.
Татарстан Республикань президентсь Рустам Минниханов стане жа лятфтазе Мордовиять эсь выступлениясонза Советонь заседанияса. Отмечамок, што чемпионатти анокламать пингста ошне, конатнень эса ётасть матчне, пяк полафтсть цебярь шири. Рустам Минниханов азсь мяль маластонь пингть самс Саранскяи—кона ащи мундиальти анокламань пингть инь цебярь шири полафты ошень примеркс.
Сембе корхтайхне аф весть отмечсезь паронь арьсемань, аф озадонь седихть ащемань и фкя-фкянди лездыень эсь лацонь атмосферать тиемаса волонтерхнень оцю рольснон. Синь мяляфтовсть мундиалень инжихненди. Волонтерхнень лемста заседанияса улихненди пшкядсь футболть коряс Миронь чемпионатонь волонтерсь Саранскяйста Алина Куликова, кона мярьгсь: «Минь азонттама спасиба ся возможностть инкса, мес минь араме тя событияти пяльксокс. Минь марятама гордость, што примаме эсонза участия, минь марятама гордость эсь странаньконь инкса».

26.07.2018 №29
 
 
 

 
НОВОСТИ
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин