Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Люди и дела

КОЧКАЗЬ АЛЯСНОН КИНЦ

Азонттама велень хозяйствань руководителень династиянь колга
Ковылкинскяй райононь Боранця мокшень велесь шачфтсь-касфтсь велень хозяйствань руководителень пяк цебярь династия. Марнек районць лац содазе И.Ф.Сорокинонь—Российскяй Федерациянь велень хозяйствань Заслуженнай работникть, кона 40 лама киза велеса ульсь управляющайкс. Сонь пингстонза тястонь паксятнень лангса фалу касфневсь козя урожай, а жуватань ферматне—инь цебярьхтельхть районца.
Иван Федорович лама пара тись эсь шачема веленцты и велеряензонды. Сонь вельденза Боранцяв нолдасть газ, водендасть ведень колонкат, ацасть асфальтонь ки и стак тов. Пара тевонзон инкса ламоксть казьфоль орденца, медальса, Почётнай грамотаса, питни казнеса. Аф стак колганза тянемс лятфнихть аньцек шнамань валса, гордостень марязь.
И.Ф.Сорокин пяк кельгозе эсь веленц, шачема уженянц, сонь ломанензон. Сон фалу корхнесь велеряензонды:
—Шачема велестон куломозон козовок аф туян. Катк калмасамазь эсь модазонк, кона трямазь. Тейне тяса пяк кельговихть эрь паксясь, эрь шуфтонясь, эрь лотконясь, аф корхтамок ни эсь велеряеньконь колга. Иван Фёдорович шабакскиге водендазень эсь киганза и идензонга, штоба сембе синь стане жа кельголезь велеть, велень тефнень, кошярязень лац тонафнема.
И сяс сембе иденза аделазь Мордовскяй госуниверситетть, получасть велень хозяйствань профессият: арасть зоотехникокс, экономистокс и кармасть работама родной Ковылкинскяй районцост. А меле синь кочксезь ся малань велень колхозникне эстеест вятикс, колхозонь азоркс.
Стирец, Наталья Ивановна, ульсь колхозонь председателькс нльне кафта хозяйстваса: «Изосимовскяйса» и шабрань Троцянь «Гигантса». Пенсияс тумозонза ванфтозе хозяйствать.
Лама киза мельцек и тячити самс велень хозяйствань производствань оцюнякс покоди Сорокинонь цёрац Алексей Иванович. Велень хозяйствань тефненди макссесыне сембе виензон и содамошинзон, конатнень эзда аф кржа теенза макссь аляц. Школать аделамда меле сон тонафнесь университетса, получась зоотехниконь специальность и фкявок ши ашезь тушенда шири велень хозяйствань тефнень эзда. Аф стак сон рахсемга корхни ломаттненди:
—Монь Шкайсь бславамань работама модать лангса и менельть ала: паксяса, фермаса, утомса.
Виденц корхнихть сире ломаттне: «Моданясь эряви кельгомс. Эста сонга анттанза топодемс».
Тя эряфонь правилать фалу кирдьсы мяльсонза Алексей Иванович. Сяс, коса афоль сашендов теенза работамс, эсь тевонц фалу тиендьсы седикс-ваймокс, оцю ответственностень марязь. И вов ни 35 киза тяфта. Хозяйствасонза тянивок тефне молихть лац-ряц.
Тяни сон азорондай «Возрождение-М» оцю хозяйстваса, коза сувасть ингольдень лама колхозонь «юкстаф» модатне: «Якстерь знамяста», «Михайловскяйста», Оцю Озязста, Изосимовкаста, Польцяста. Сембоц паксядонза 5550 гектар. 2100 гектарсь видефоль озимой тозерса, 1200 гектарсь—яровой тозерса, 150 гектарсь—пинемса, 1500 гектарсь—снавса.
Нинге 15 июльста «Возрождение-М» ООО-са васенцетнень ёткса Мордовияса ушедсть сёронь урядама. Сяс тяса кунара ни аделафт озимой сёротнень и снавть урядамасна. Средняйста эрь гектарста сявф 30 центнер. Тя результатсь тяддень коське кизоть аф кальдяв. Тяни моли яровой культуратнень урядамасна. Паксяса тефне лаказь-лакайхть. Работайхть тяса 11 «Палессе» комбайна. Сёрось паксяста эзкиге пачфневи ток лангс. Тясовок сембе вастса покодихть тевонь кельги и тевонь содай ломатть.
«Возрождение-М» хозяйствась перспективнай, сонь лама цебярь пландонза.
Тя парста няеви оцю стройкатнень эзда, конат вятевихть тяни тяса. Уликс зерносушилкада башка, кепотьксонди, зернотокса строяви нинге 14 ёмкость. Эздост кажнайса кармай ванфтовома 160 тонна зёрна. Эрь кизоня коль касфневихть серонь видемань паксятне. Тяда башка, А.И.Сорокин маластонь пингть ёрай сяда эреклафтомс жуватань кирдемань тевть Изосимовка велеса. Тоса петьневи и одкстопневи ни «юкстаф» животноводческяй фермась. Курок тяса кармайхть кирдевома тракст, эвондайхть работама од вастт велеряйхненди.
Од семьятненди хозяйствась ушеды строяма квартират, башка мяль шарфтови велеряйхнень эряфснон цебярьгофтоманцты.
Пара азомс, што тя хозяйствать лангса шефства вяти Мордовскяй аграрнай институтсь. Сон сембоса лезни тевонзон вятемаса. Тянь ширде аньцек шнамань валхт можна азомс васендакиге профессорть Смолинонь колга.
Но, луви ялгат, тяда арьсе, што тя хозяйстваса и сонь поселениянзон эса сембось моли сяда лац аш ков, тёждяста, аш тяса пичефкст, прябалат. Улихть и эздост аф кржа.
Сембе содасаськ ни, што ламоц велетнень эса кржа лядсь трудоспособнай ломаньда. Тячи аф тёждя мумс жувата мельге якай постуф-скотник, механизатор, лия эрявикс работникт.
А.И.Сорокинонь мархта корхнемста кизефтине, кодамот сонь мяленза-арьсеманза тячиень велеть сай пингонц колга. И вага мезе сон азондсь:
—Ламоц велетненди тячи пяк аф тёждя, а ёмла веленятне, няк, юмсихть-арсихть. Штоба эреклафтомс велеть и велень хозяйствать, монь койсон, эрявихть нолдамс государствать ширде сяда оцю дотацият. Ламотне эста синць мрдальхть вели, мзярда карматама пандома сяда оцю зарплата, кода, мярьктяма, заводса. Сембе содасаськ, што паксяса работамась, жуватань кирдемась-трямась—тевсь стака и веши оцю карьхцьт. Жуватати эряви лямбе карда, аноклама теенза корма, фураж. Тянкса кирдема транспорт, рамама эрявикс оборудования и стак тов. А кда урмаськоды жуватась, эрявихть лекарстват, кирдема ветврач.
И нинге вов мезе мялезе азомс. Пцтай сембе отраслятнень эса улихть льготнай профессият, а велень хозяйстваса мес-бди аш. Кда велеряйсь улель аралаф сембе ширде, шарьхкотьк, тевське тяса улель лия.
А тяни пяк пичедян сянкса, мес эрь кизоня стаки кирихть крестьянскяй тевонь кельгихнень лувкссна, аф ляткшнихть од ломаттне вели. Тянь мархта мирендакшнемс аш кода.
—Штоба странаньке улель топодьста, эрявихть ванфтомс и виияфнемс велетне и синь инфраструктурасна,—ня валхнень мархта шумордазе эсь азондоманц Алексей Иванович Сорокин.
А.ТРЕМАСКИН,
«Мокшень правдать» аф штатнай корреспондентоц.
Снимкаса: Ковылкинскяй райононь оцюнясь В.И.Ташкин, райононь велень хозяйствань Управлениянь начальниксь Е.А.Суроткин и «Возрождение-М» хозяйствать директороц А.И.Сорокин од комбайнерть мархта урядави паксять лангсот.

30.08.2018 №34
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин