Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Тема дня

ЛАНГОЗОСТ УЛИ КОДА НАДИЯМС

Мордовияса ётафтф кочкаматнень колга
9 сентябрьста Мордовияса ульсть дополнительнай кочкамат МР-нь Государственнай Собранияв и Саранск ошень округонь депутатонь Совету. Кочкаматне ётасть 21№ Центральнай одномандатнай избирательнай округть и 2№ Полежаевскяй одномандатнай избирательнай округть эзга. Тяда башка, ётасть основной и дополнительнай кочкамат местнай самоуправлениянь представительнай оргаттненди.
Республикаса панчфоль 165 избирательнай участка, коса работась пцтай 180 наблюдатель. Кода фалу, участкатне панжезь кенкшснон шобдава 8.00 частста. Республикань эряйхне мольсть кочкаматненди пара мяльса.
Васенцетнень лувксса 557№ избирательнай участкав, кона панчфоль Рузонь драматическяй театраса, сась Мордовия Республикань Государственнай Собраниять Председателец В.В.Чибиркин. Пяшкодемок бюллетенть и нолдамок сонь электроннай урнати, Владимир Васильевич азозень эсь мялензон-арьсеманзон журналисттнень мархта корхнемста. Сон китькстазе, што Мордовияса дополнительнай кочкаматнень эса сембе партиятне примасть активнай участия. Башка мяль В.В.Чибиркин шарфтсь Большеберезниковскяй районть лангс, коса 9 велень поселениятнень эса тя шиня ётасть референдупт.
Аф лама пингта меле избирательнай участкав сась Саранск ошень округонь оцюнясь П.Н.Тултаев. «Надиян, што избирательхнень ламошкасна максозь вайгяльснон ся кандидатть инкса, кона седиге пичеди ошть инкса и анок решандакшнемс ломаттнень инь таколфты прябаласнон»,—мярьгсь мэрсь.
Обедта меле 557№ избирательнай участкаса вайгяленц максозе Мордовия Республикань Оцюнясь В.Д.Волков. Кода мярьгсь региононь вятись, кочкаматнень эса примайхть участия вии кандидатт. «Кой-конатнень ёткстост ули ни законодательнай и исполнительнай властень структуратнень эса работань опытсна и синь анокт макссемс эсь содамошиснон, опытснон лиятнендивок. Кеняртьфти, мес политикаса варчсесазь эсь вийснон предприятиянь руководительхне, конат кемоста вятьсазь эсь хозяйстваснон. Вов теест и эряви аралакшнемс ломаттнень интересснон законодательнай оргаттнень эса»,—мярьгсь В.Д.Волков.
544№ избирательнай участкаса, кона панчфоль Саранскяень 12№ гимназияса, кочкайхне васьфтьфтольхть кштизь-моразь. Тястонь фойеса фкя-фкянь мельге эсь маштомошиснон няфнезь ёмла артисттне—112№ идень садонь воспитанникне и гимназиянь тонафнихне.
Спискас коре 544№ избирательнай участкаса кафта тёжяньда лама избирателель. Васенце частстокиге тяса кенерсть максомс вайгяльснон сядода лама ломань. Ётксост и отт, и сирет. Кепотьксонди, В.И.Кугушевати тядде топоди 97 киза. «Кочкаматненди сашендан ёт мяляфтса эсь прязень,—азозе сиренясь.—Фкявок эздост ашень нолда. Надиян, што кочкаф депутаттне тисазь семботь, штоба эряфсь кельгома ошсонк аньцек цебярьготкшнель».
Аф кржась кочкайхнень эзда сашендсть избирательнай участкав семьянек. Тяфтамотнень ёткста Ленинонь проспектса эряй Виргасофнень семьясна. Владимир Петрович и Ольга Ивановна тя мезть састь кочкама колма кизоняса Милана стирняснон мархта.
—Вайгяленьконь максоськ сятнень инкса, кинь лангс надиятама, кие, койсонк, арьси республикать тячиень и вандыень шинц колга,—азозе семьянь азорсь.
Меколи азсаськ, што целайнек кочкаматне миньцонк ётасть лац, довериясь максф инь цебярь, инь достойнай ломаттненди. Синь лангозост ули кода надиямс.
10 сентябрьста Мордовия Республикань ЦИК-са етафтфоль брифинг, коса пачфтьфоль дополнительнай кочкаматнень результатснон колга. Кода азозе Центральнай избирательнай комиссиять председателец А.В.Косов, Мордовия Республикань Государственнай Собраниянь депутатонь кочкаматнень эса сяськсь «Единая Россия» партиять эзда кандидатсь, «Агрохолдинг «Новотроицкий» ООО-ть директороц В.В.Руженков. Инксонза максозь вайгяльснон избирательхнень 46,34 процентсна.
Саранск ошень округонь депутатонь Совету  депутатонь кочкаматнень эса сяськсь «Идень пищевой станциять» директороц С.В.Киреев. Сонь ширенц кирдезь кочкайхнень 43 процентсна.
А.В.Косов стане жа азозе, што дополнительнай кочкаматне етасть сетьмоста, законодательствать мяльса кирдезь. Целайнек республикать эзга явкась ульсь 42,03 процент. Избирательнай участкатненди инь ламоль сайда Лямбирскяй районца, инь кржаль—Саранскяйса.
О.Евдокимова.

13.09.2018 №36
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин