КУДУ КИТЬ МЗЯРДОВОК АШЕЗЕ ЮКСНЕ

В.А.Волковонди—100 киза
Тя ульсь лама кизода инголе. Атюрьевскяй райононь Мокшень Козловка велень средняй общеобразовательнай школаса ётафтовсь «Вирь мацихне мяляфтсазь куду кить» лем ала оцю ила. Сон лемтьфоль мокшень содаф поэтти, землякснонды В.А. Волковонди. А инжикс тертьфтольхть учениконза, войнань и трудонь ветераттне И.И.Кичкаев, М.В.Кондрашкин. Тернемазь и моньге, сяс мес Василий Афанасьевичень мархта кирдень кеме соткст Сочиса эрямстонза. Гайфнеме фкя-фкянди, тяшнеме сёрмат, кучсеме поздравительнай открыткат Од киза и лия праздник мархта. Иласа кайгсть стихонза. Но сембодонга пяк токазь седиезень учениконзон лятфнемасна.
—Саме школав, а мокшень кялень и мокшэрзянь литературань тонафтыеньке аш,—лятфнесь Великай Отечественнай войнань ветеранць, Мордовскяй АССР-нь Заслуженнай учительсь М.В.Кондрашкин.—Коса Василий Афанасьевиченьке? Тя кизефксть макссеськ фкя-фкянди. Сембе шукиезь пряснон. Шарьхкотькшнеськ, што тонафтыеньконь пякстазь. Но эста тянь колга пелеме корхтаманьконь. Пякснекшнезь аш мезенксовок. Тянь содазь сембе. Кодама-бди пуромксса макссь оцюнятненди кизефкс. Учемс куватьс ашезь сав. Састь инксонза омбоце шинякиге. Сявозь, няфтезь кядьстонза сембе аф няематнень.
—А меле пристандасть учениконзонды,—поладозе Великай Отечественнай войнань ветеранць И.И.Кичкаев.—Вешсть шабатнень кядьста, штоба сят максольхть показаният тонафтыснон лангс, што Волков куштаф вайме ломань, кельгсы стакащемда кялень шовсеманц. Тяфтапт ульсть. А кит атказакшнесть, мушендозь вастснон тонафтыснон мельге.
Тяфта повсь тюрьмав Василий Афанасьевичень ученикоц, сай пингонь содаф мокшень поэтсь П.К.Торопкин. Тянь квалма сон тяштсь «Каворксу ки» повестьсонза. Тянь квалма сидеста лятфнесь поэтть племянникоц Г.А.Торопкин:
—Оцязе ашезь карма молема каршек Волковонди и селгозь тюрьмав. Стакащемда ащесь вете кизот тюрьмаса. Колапонаня велесонк «тюремщикокс» и лемнесамазь. Кинь мялецоль минь аердамс, лятфтасы оцязень. Мезевок аф тият. Пингсь эста тяфтамоль. Павел Кузьмич тяда меле нолдась лама книга, ульсь содаф поэтокс. Арась гордостекс и прянь шнафтома вастокс мокшэрзянь крайса.
Кода и В.А.Волков, тюрьмада меле эрясь Сочиса. Но Мокшень Козловкав сашендсь. Аф весть ульсь и шабрань велеса—Боражса.
—Василий Афанасьевич ламоксть сашендсь ширезонк алязень мархта корхнема,—мярьгсь педагогическяй трудонь ветеранць Е.В.Пятина.—Тядязе пидесь-панць, кочксесь шра. А минь, шабатнень, кучсемазь кудоньконь мельге ванома, аф кулхцонкшни ли кивок вальмалонк. Эста ламоль велеса «паронь» арьсида. Пачфтихть вал коза эряви и тоса юмать «якстерь сивотнень» эзда. Ся тяни шнафттама пря Волковонь мархта, морафнесаськ стихонзон, поэманзон, азксонзон. А ся кизотнень  сувай поэтсь ширезт и аф содасак месендемс. Пяк пара, што мезеньге кальдяв ашель. И тяни шнафттама пря сянь мархта, што няендеськ поэтть, корхнеме мархтонза. Эряфоц сонь аф тёждяль. Сталинскяй лагерьда мелевок мезеньге цебярь ашезь няе.
«Раса ланга» стихонь книганясонза, кона лиссь 1966 кизоня Мордовскяй книжнай издательстваса, эсь колганза В.А.Волков сёрмады: «Шачень 1916 кизоня Морд.-Козловка велеса сокаень-видиень семьяса. Васенда аделайне ШКМ-ть, а меле—Темниковскяй педтехникумть. Работань учителькс, а тяни работан мастеркс железобетоннай заводса и эрян Сочи ошса.
Тяштема кармань нинге войнада инголе. Тяни тяштян строительхнень колга повесть, бетонщикнень колга поэма и иттненди поэма».
Эстокиге повсь сельминголен 1916 кизось? И вов мес. Илат Василий Афанасьевичень лемс ётафнеме сидеста. И най абонкшнеме, тапарякшнеме. 1916 кизоня или 1918 кизоня шачсь содаф земляконьке? Книгаса эльбятькс или аф? Гайфтень Волковонди, кизефтине. Сон васенда аф мяль вельде отвечась. А меколи ни азозе. Афкукс сон шачсь 1916 кизоня. А документонзонды сёрматф 1918 кизось. Эста ламотнень ульсь тяфта, кирьфнелезь, сёпондолезь кизоснон.
Аф ваномок стака кизотнень лангс, Василий Афанасьевич аделась школа, педтехникум. Аф лама пинге трудендась Атерень школаса. Эрясь тяниень Ленинонь лемса ульцяса. Тяни ся кудсь аш. Аф лама пинге работась Мокшень Козловкань школаса. Тяста и сявозь Сталинскяй лагерьхненди. Тяда меле тусь Сочи эряма. Кирдсь кеме соткст мокшэрзянь крайть мархта. Сашендсь. Атерьса сувсесь М.В.Кондрашкинонь пяли, Мокшень Козловкаса—войнань ветеранть И.И.Кичкаевонь пяли. Лац содазе Мордовскяй госуниверситетонь учёнайть, профессорть М.Г. Имярековонь. Сочиса учёнайть эрясь двоюроднай брадоц, эрь кизоня якась ваймама. Марса В.А.Волковонь мархта якасть эшеляма, калонь кунцема. Василий Афанасьевич содазень сембе калу васттнень. Пицесть калонь шонгарям. Михаил Герасимович аф весть азонкшнезе, што землякозе эрясь аф козяста. Содафтозе двоюроднай брадонц мархта, кона мясокомбинатса оцюняль. Ся весть аф весть лезнесь мокшень поэтти.
Видеста азомс, Михаил Герасимович и панжезе тейнек поэтть Василий Волковонь «Писательсь и эряфсь» книгасонза. Максозе творческяй портретонц, макссь оцю питне книганзонды, произведениянзонды, путозе фкя рядс содаф поэттнень и писательхнень мархта.
А сёрматфонза, стихонза и поэманза афкукс кеподихть мяль. «Раса лангса», «Толонь туцят», «Вирь мацихть», «Тумонят»—тяфтама лем ала лисендсть разнай кизотнень книганза. Теест редакторкс ульсть И.М.Девин, С.В.Кинякин, М.С.Моисеев, рецензентокс И.Н.Кудашкин и лиятне. Синь шнашендозь Волковонь, макссесть оцю оценка творчестванцты. Ужяль, конешна, што Василий Афанасьевичень творчествац лядсь педа-пес апак тонафнек. Кржа сёрмадсть литературнай критикне, содаф поэттне, писательхне. И тя нинге сяс, мес эряфонц оцюшканц ётафтозе Сочиса. Ашель Василий Афанасьевич аф Журналистонь, аф Писателень союзса. Виде, аф лама пинге сашендсь Саранскяи, сявондезь работама книгань издательствав. Корхтайхть, ужяльдезь, пенсияц пяк ёмлаль.
Шистонза Василий Афанасьевич сидеста пеняцякшнесь сянь лангс, што аф сембе стихонза, поэманза удаласть печатламс «Мокша» журналса, «Мокшень правдаса». Эста мокшень кяльса изданиятнень эса сидеста тиендевсть обзорхт кучф стихненди, поэматненди. Шнашендовсть цебярь произведениятне, няфневсть афсатыкссна. Ламоксть повондсть ня обзорхненди и Волковонь стихонза. Василий Афанасьевич телефонца сидеста тейне корхнесь: «Улелень сяда маланяса, кали афолень сува седикс-ваймокс корхнема, мяльнень-арьсеманень азома И.Н.Кудашкинонди, И.М. Девинонди, М.С.Моисеевонди, лиятненди. А тяни тянь квалма сашендови аньцек арьсекшнемс, аф пачфтевихть афкуксонь мяльне».
Эряви азомс, Сочиса эрязь В.А.Волков пяк кельгозе мокшень кяльть. И мзярда Россиянь каталогу ашезь сувафтов «Мокшень правдась», юмафтозе покоенц. Кучсесь сёрмат, гайфнесь редакцияв, тейне.
—Тяни месендян?—макссесь кизефкс поэтсь.—«Мокшень правдафтома» аделавсь эряфозе. Аф содаса, мезе тиендеви мокшэрзянь крайсон, шачема-касома велесон, районцон. Аф карман содамонза, кодама од книгат лиссть Мордовскяй книжнай издательстваса. Аф лувовихть и кучф эсь произведенияне.
Поэтти Сочив кучсесть газетат редакцияста. Тянь оцю мяльса тиендезе сёрмань отделть вятиец, печатень ветеранць Д.А.Любимкин. Сидеста тя тевса лезнень монга.
Тейне кучф сёрманзон эса Василий Афанасьевич азонкшнесь эсь эряфонц-ащефонц, сёрматфонзон колга. Кизефнезе, кода эряйхть-ащихть Атерсь, Мокшень Козловкась, Боражсь. Эняльдсь лемстонза азомс сюконямань валхт.
Кагодс коре В.А.Волков шачсь 1918 кизонь 12 августста. Тядде теенза топодсь 100 киза. А кулось 1995 кизонь 27 январьста. Од, 1995 кизонь карша, Василий Афанасьевич кучсь тейне поздравительнай открытка. Монцьке арьсень кеме шумбраши, од сатфкст тяштемань тевса. Мезеньге кальдявонь квалма ашень арьсекшне. А февральть ушетксста сась тейне  уноконц Олесянь эзда сёрма, коса пачфтезе, што Василий Афанасьевич кулось. Кулось больницяса инфарктта меле. Минь январьста уленди пяк якшама. А Сочиса тя шиня мольсь пизем. Поэтть цёрац вятсь куду священник. А тоса пиземсь лоткась, кеподсь шиня. Василий Афанасьевичень калмазь. Памятниконянц лангс сёрмадсть, што тя калмось мокшень содаф поэтть В.А.Волковонь.
Кучсень Олесянди сёрма кой-кодама эняльдема мархта.
Ушедсь од тонафнемань кизось. Арьсян, што Мокшень Козловкань и райононь лия школатнень эса отмечасазь поэтть 100 кизонь юбилеенц. Сонь творчествац козя, мялень салай, ули мезень колга корхтамс. Ули книгац и рузонь кяльса. Тяни тя В.А.Волковонди аф эряви. Тя эряви тейнек, мокшень кялень и мокшэрзянь литературань тонафнихненди, кельгихненди.