Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

М.А.Алямкина:«МОКШЕНЬ ПРАВДАСЬ» ЛЕЗДЫ ВАНФТОМС РОДНОЙ ВАЛТЬ»

Тячи минь корхни ялганьке—Марфа Александровна Алямкинась. Шачсь-кассь сон и эряй Старошайговскяй райононь Сарга велеса. Пцтай сембе эсь эряфонц лемдезе библиотечнай тевти. Лама киза мельцек ульсь Саргань библиотекаса заведующайкс. «Минь Александровнаньке»—тячемс тяфта  кельгомга лемнесазь сонь велеряйхне.
Тяни Марфа Александровна кунара ни пенсияса. Но стак ащема сон аф содай, най заняф тевса-заботаса.
…Чакатама кудонь кенкшенцты. Кульсаськ, кода аф эряскодозь, валом сон аськоляй кенкшть шири. Аф ламос возсемда меле кенкшсь панжевсь.
—Вай, аф ли инжихть? Етада, етада…
Азоравась весялгодсь. Шаманц валдоптозе кати-кодама потма валдоня.
—Ну, кода эрят-ащат, Марфа Александровна? Кода шумбрашись?—кизефнесаськ молембачк.
—Кодама ни тяни шумбраши… Кизотне содайхть етама, синцень сявихть,—ня валхнень азомда меле корхтайсь аф ламода лоткась, а сяльде сетьмоняста поладозе:
—Спасиба хуш шабатне аф юкснесамазь. Ня шитнень Надя стирезе сашендсь Саранскяйста, а тяда инголе отпусксоль ширесон Сашка церазе Питерста…
Озаме диван лангс, корхнетяма.   М.А.Алямкинать мархта корхнемста васендакиге сашендат мяльс, што инголет ащи ломань, кона пяк кельгсы эсь шачема-касома краенц, родной кяленц, эсь лацонь культураньконь, национальнай газетатнень, журналхнень, мокшень и эрзянь писательхнень пераснон алда лисьф произведениятнень.
А ушетфоль велеть эзда, сянь, мезсь тячи сембодонга таколфтсы и пичефтьсы тястонь эряйть.
—Да, кржа лядсь Саргаса эряйда. А вдь инголи велесь ломанюволь. Тяфта?—макссетяма кизефкс Марфа Александровнанди.
—Виденц азость. Мзярда-бди эздонк тежянть малава ульсь,—кувакаста куфкстозь мярьгсь сон.—Пцтай эрь кудсоль 6-7 шаба. А оцю семьятнень эса вейхксонь, кемонень и сяда ламонь.
Саргаса ульсь коса работамска. Тясоль колхоз—«Красное Знамякс» лемневсь. Финцне покодсть фермаса, омбонцне—паксяса. Тяда башка, ульсь миньцонк промартельге. Пароль лемоцка—«Валда ян». Тевонь лац содай мастерхт трудендасть тоса. Синь аноклакшнесть алашань нуртт, крандаст, дрогат, шарыхть, догат и лия эрявикс паршихть.
Тяни етат велень ульцятнень эзга и седиезт арси аф пара. И тя сяс, мес ламоц куттнень вальмасна шобдат, эсост аш эряйхть, аф кулят ни идень вайгяльхть. И тя пяк таколфты и пичефти.
Сяльде лятфтафоль Саргань хорть колга. И тя аф случайна. Сон ульсь велети, марнек Сире Шайгавонь районти, прянь шнафтома вастокс, гордостекс.
—Ламотне тячемс лажадозь лятфнесазь 50-60-це кизотнень, мзярда велень клубть сценаса эрь праздниконь карша кайгсь эсь самодеятельнай артистоньконь цефксонь лаца вайгяльсна,—сяда тов азонды Марфа Александровна.—Синь морсесть аф аньцек Саргаса, райцентраса, но и республиканьконь столицаса—Саранскяйса. Морама и кштима оцю маштомошиснон няфнезь нльне Москуса, Кремлевскяй дворецть сценаса, Варшаваса, лия вастса.
Хорть репертуарсонза оцю васта занцесть мокшень народнай моротне, сиде моронятне, кштиматне.
Корхтамашовор саворне етаме лия темас.
—Марфа Александровна, а виде ли, што, кле, тейть инь кельгома газетакс най ульсь и ляткшни минцень «Мокшень правда» газетаньке. Кда «да», то азка, мзярда кармать сонь лувондомонза?
—Марнек модать лангса ули аньцек фкя мокшень газета—тя «Мокшень правдась». Сон «корхтай» лувихнень мархта мокшень ару кяльса, цебярь ялгакс, ёню советонь максыкс, интереснай кулянь пачфникс,—отвечай сон.—Аф кельгомс сонь аш кода. Монць кармань лувондомонза и кельгомонза нинге шабакс. Цебярь и кельгома инжикс мокшень газетась фалу ульсь  марнек семьясонк. Эрь номеронц саманц оцю мяльса учсезь и лажаткшнесть теенза монь алязе, велень учительсь Александр Федорович Алямкин и тядязе, кудазоравась Дарья Романовна.
—А мезсь сембодонга тушенды мялезт мокшень газетаса?
—Монь мяльсон, эрь мокшень ломанти сон эряви стане, кода кожфсь ваймонь тарксемс. Луват статьятнень эса и кеподи мяльце. Вдь тядянь-алянь кяльса серматфсь и шарьхкодеви сяда лац. Кажнайсь мушенды газетать страницанзон эзда интереснай, мялень салай. «Мокшень правдась» сидеста уленди велеса, пачфни велеряйхнень аф аньцек работаснон, но и эряфснон-ащефснон, пичефксснон и таколдомаснон колга. Башка мяль газетаса шарфневи национальнайти. Кода ванфтомс кяленьконь, аф юкстамс культураньконь, коеньконь-обуцяньконь—вов мезть колга мольфтеви корхтамась эсонза. А тячи тя тейнек, мокшетненди и эрзятненди, пяк и пяк эряви, пяк важна, кда мяленьке ванфтомс нацияньконь сонцень шамаликонц, аф «соламс» лия нациятнень еткс.
Минь, эряфкшу кизонь ломаттне, оцю мяльса лувондсаськ газетаса макссеви рецепттнень, советтнень. Содаф, кодамот питнесна тяниень ламоц лекарстватнень—пенсияце аф сатфтови. А вов эсь кядьса эрявикс тишенятнень-меснень кочкамс виеньке сатни. Аф етнетяма и пеетькшнематнень-сингоряматнень вакска. Пеетьксне, рахафты азксне кепсесазь мяленьконь.
—Хуш тяни шуроста, но сембе сяка кой-коста сашендови кулендемс: ну кинди и мезенди эрявихть национальнай газетатне и журналхне. Кие морафнесыне синь!
—Аш месть сепондомс, улихть нинге етксонк стама ломатть, конат копорь пяльде шарфтсть эсь культураснонды, озадонь седихть ваныхть эсь литератураснон лангс, аф серматфнихть и аф лувондыхть национальнай газетат и журналхт, а кой-конат нльне виздихть тядянь-алянь кяльса корхтамаснон. Лиякс мярьгомс, синь аерткшнихть сембе роднойть, тейнек маладонга малать, питнидонга питнить эзда.
Монь койсон, тяфтама ломаттненди мезевок святой аш, синь семботь лангс «тюфиихть». А вдь роднойсь фалу родной, сон мезьсовок аф полафтови. Мярьктяма,  корхтат тядянь-алянь кяльса-валса, кулхцондат мокшень народнай морот и ваймозт арси теждя, сяда лямбе, лад. Мон азса тяфта: эрь еню и ару вайме ломанць кельгсы родной кяленц, эсь народонц культуранц. Да и эздонза мзярдовок аф кульсак, што аф эрявихть мокшень моротне, книгатне, журналхне и стак тов.
А кда корхтамс «Мокшень правдать» колга, сон кельгови, тушенды сембонь мяльс, кие сонь серматфнесы и лувондсы. Эряви азомс сяньге, што кизоста кизос мокшень газетаньке арси коль сяда мазыкс и интереснайкс.
—А мезе азат кяльть колга? Кой-кона мокшетне пеняцяйхть, кле, газетаса серматфсь и лацкас аф лувови, и лацкас аф шарьхкодеви.
—Ся ломаттне, конат аф маштыхть мокшекс лувома, аф шарьхкодихть мокшень серматфса, тейне ужяльхть. Теест должен улемс визькс, што аф содасазь ся кяльть, кона  кажнайти   макссеви тядянь лофцть мархта. Синь, улема, кядезостка аф сявондихть аф мокшень газета, аф журнал, аф книга.
—И мекольцесь. Мезе азолеть «Мокшень правдать» лувиензонды?
—«Мокшень правдась»—мокшень кяльть ванфтыец и виияфтыец, национальнай культурать кеподиец. Сон эряви кельгомс и кородозь ванфтомс. Пяк пара улель, кда кажнайсь эздонк серматфтоль сай кизонди «Мокшень правда». Тянь мархта тихтяма цебярь и эстейнек, и газетати.
 
И.Степанов.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022