Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Юмор и сатира

КДА УЛЕЛЕНЬ СЯДА КОЗЯНЯ

Михаил Иванович шачсь мокшень ашу семьяса. Шабакскиге отькорель, ёнюволь, венемсь содамошитненди. Озай курнянь алятнень ёткс, нолдай эсь паньфкять эзда кафтошка стопканя, ляпоми, ушеды азондома эсь аф тёждя эряфонц колга.
—Кда улелень сяда козяня, аф тинь вакссонт улель монь вастозе,—корхтай алятненди.
—А коса ина, Иваныч?—кизефнесазь сят.
—Кодамовок акша кудса.
—Тянивок кудце акша. Ётак сембе ульцять, лия лацонза аф муят.
—Мон аф тянь кирдине мяльсон. Кодамовок министерстваса или оцю ошень больницяса покоделень.
—И видекс, сюлеканявок афолеть сява, мархтонк афолеть копорда.
—Ктор-ктор..,—рахай Михаил Иванович.—Тинь мархтонт  да стопканя аф нолдамс. Тя аф алякс.
—Лац калякондат, Иваныч. Тянкса сави нинге фкя стопканя нюрьхтямс.
«Сяпинясь» гастясы алять, ушеды лятфнемост одонь кизонзон.
—Мзяра гуленя, цёрат, порьф, вай-вай-вай…
—Кали ни тяшкава вачедолеть?
—Кода ина. Студентолень вдь.
И виде. Школать аделамда меле Михаил Ивановичень направлениянь коряс кучезь Горькаи медицинскяй институту тонафнема. Тумстонза аляц мярьгсь:
—Тевсь тонь. Ярмаконе тонафнемозт аш.
Эста сембе ашуста эрясть. Кярькс идь кудса. Лишнай трёшниксь менельста ашезь прашенда. Мишавок и вагононь шамнема якась, и санитароль больницяса, и преподавательхненди лезнесь кудонь, дачань тевсост. Конашкава тя шорясь тонафнемати, содасы аньцек сонць. Но вачашись аф акаце, пекське эрявсь андомс. Мушендсь и стирня-студентканя. Стирнясь пиди-пани, Михаланьге андсы.
—Монцьке парцень аф юкстаса,—корхнесь мокшень цёрась.—Молян куду, велень гостинец ускан.
—«И какой гостинец?»—кизефнесы стирь ялгац.
—Курмозь канцёр или вирень кекараж.
—А вирень кекаражсь тя мезе?—кизефнесазь алятне.
—Мезевок аш. Кулендине кати бабазень, кати щавазень эзда. Сайхть пялонк инжикс, а минь ласьктяма каршезост: «Щавай, щавай, мезе кандоть?» А щавазе срмасы конянц и отвечай: «Вирень кекараж». Мокшекс азомс, мезевок аш.
Михалань стирь ялгацка учсь, учсь, ашезь учев вирень кекаражец. Лоткась мархтонза ялгафнемда. Цёрась ашезь кяжия. Шутендазь азозе:
—Аф тяфтама Матрёна нинге муян.
Ульсть эряфсонза Матрёнат. Лятфнесыне синь прянь шнафтозь.
—Лисенди, тон, Иваныч, альфонсолеть?—шутендайхть цёратне.
—Кда улелень альфонсокс, тонафнемазеньге аделалине, а тяни…
—Тянивок тевце аф кальдяволь. Най лямбе вастоняса покодеть.
—Покодень ни, лиянь мяльхть ванондонь, лиянь тефт тиендень. Шава пря ялгане аделазь тонафнемаснон гуленя лямсовок, а монь айдямазь.
—Тонга ина гуленят кунцелеть…
—Гуленят кунцень, да аф ся кастрюлятненди кайсине. Марнек Горькаень паркнень аропнине. Аф ськамон, конешна, ялганевок мархтон якасть. Сатама охотаста, урядасаськ нармоненьконь, оцю кастрюляс и—газть лангс. А фкя стирнясь, кода шарьхкодеськ, козятнень эздоль. Таргасаськ кастрюлястонза сарасканц, вастозонза гуленя. Весть, кафксть, колмоксть. Ашезе шарьхкоде рахсеманьконь, пеняцясь алянцты. А аляц шабра областень прокурор. Сась ректорти. Ся мархтонковок корхтама ашезь карма. Кие? Вергаскин… Сумкацень кавлалот и ласькозь куду кли прянь вятема аф маштат.
—Вдь кяльготнят. Кали прокуроронь стирьхневок общежитияса эрясть?
—Эста эрясть. А тяни аф содаса.
Аделазь ялганза медицинскяй институтть. Састь больницяв покодема. Моли Пужалань Ромкась, сонць аф сонць, ломань инголенза аф няи. А Михаил Ивановичень пекурма музе. Сувась ширезонза: «Лезтт, Ромка! Мзяра гуленя кядьстот порьфтень, пантк парозень». А ся каршезонза:
—Ха-ха-ха,—кторды.—Лездан, конешна, Петьколь, но васенда катк лима-сюнокс тарксетянза.
Ши пчкафты эсонза, кафта, колма. А мзярда ёфси кальдяв арась, рьвац тердсь «скорай помощь». Веньгучкать сявозь больницяв. Эста и содавсь, што Иванычень аппендицит и сон лопадема лангса.
—Панарса шачеть, аля,—мярьгсь хирургсь.—Нинге таргалить пингть и вастце улель кальнятнень ала.
Ламос Михаил Иванович пчксесь больницяса. Сувсесь ваномонза и Пужалань Ромкаське. Сонць фалу низелды, кургоц пиледа пилес.
—Шисат, Петьколь?—кизефнесамань студент ялгазе.
—Шисан, Пужала.
—Пчкафтонь, пчкафтонь эсот, а тон, няк, кода.
—Пчкафтомайть ни, куломозон парцень аф юкстаса. Нинге аф лама пингоня и кулолень.
—Аф кулофокс ащат, сельмотне толкс палыхть,    щёка-прятне якстерьхть, хуш сардоня крьвястть.
Алятне эрекласть:
—Тюфаделеть шамазонза тяфта пчкафтомда.
—Тюфаделень. А сон мувору? Горькайса стирьхнень мельге ласькондсь, профессорхненди дачат стройсесь. А содамошинза аш. Тейневок арьсефтемаль, содамаль, кинди молемс. Пингонь ётазь содамошит кочкась, оцюнянь васттка занцесь. Пялонга аф весть сувсесь. Сяка лятфтамац-пеедемац: «Кулофтонь, кулофтонь эсот, Петьколь, а тон кшникс ащат, мондедон тазат». А мон поладыне:
—Стакан «кяжинять» верок алкс нильса. А тейть тя симомбяльняське аф ладяй: то таргозят, то штатол лаца солат.
Омбоце студент ялгац покодсь республиканскяй больницяса. Вестевок Михаил Иванович ашезь яка лезксонкса. Сиредембяльхть савсь сувамс. Кальдяв урма педсь эзонза. Акша халатсось содаф доктор, профессор. Ванозень кагодонзон и корхтай:
—Тя урмать мархта, Петьколь, ламос аф эрят.
—Кие содасы, эрян или аф эрян. И тонга вдь аф Шкаят.
—Шкайсь тяса аф лезды. И докторондивок урмаце аф пчкафтови.
—Мон, няк, эрян. Мархтонт нинге копорян. А профессорозе кунара ни тю-тю. Кулось ветешка ни киза, мяляфтыецка аш.
—Ну, Михаил Иванович, конашкава маштат азондома. Нинге стопканя нюрьхтятама.
—Каяда, тянь кальдявоц аш.
Илья ВЕШКИН.

11.10.2018 №40
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин