Маластонь кота кизотнень Мордовияса кинь строяманкса нолдави пцтай 40 миллиард цалковай

19 октябрьста Рузонь Государственнай драматическяй театраса етась торжественнай собрания, кона лемтьфоль Дорожнай хозяйствань работниконь шити. Залу озсефнень профессиональнай праздникснон мархта поздравляндазь Мордовиянь Оцюнясь В.Д.Волков, Мордовия Республикань Правительствать Председателец В.Ф.Сушков.
—Дорожнай хозяйствань работниконь шись занци башка васта профессиональнай лия илатнень еткса,—мярьгсь В.Д.Волков.—Китне, синь качествасна и лувкссна—тя регионть шамаликоц. Синь корхтайхть обществать благополучиянц, территориять касондоманц вииякшнеманц колга.
Республикаса дорожнай хозяйствань отрасляса тяниень пингть трудендайхть Мордовиянь сембе строительхнень пцтай колмоцекс пялькссна. Региононь вятись отмечазень трудовой коллектифнень, конат фалу няфнихть цебярь результатт эсь работасост. Етксост «Мордовдорстрой», «МАПО-ТРАНС», «Мордовавтодор», «Мордовдорпроект» обществань, Ельниковскяй дорожно-строительнай передвижной механизированнай колоннань, Ичалковскяй дорожно-строительнай  передвижной механизированнай колоннань и лия предприятиянь работникне.
Оцю работа пяшкодсть республикань дорожникне 2018 кизонь футболть коряс Миронь чемпионатти анокламста: строяфоль и петьфоль лама ки кода Саранскяйса, стане и муниципальнай райоттнень эса. Саранск ошса тядде петьфоль 35 вайгяльбень кувалмоса кит. 13 вайгяльбень кувалмоса китненди тифоль ремонт Рузаевкаса. Сембоц Саранскяень и Рузаевкань китнень петеманкса нолдаф 1 миллиард 300 миллион цалковай.
Республикань Оцюнясь отмечазе, што оцю лезкс од кинь строямаса и уликснень петемаса максси федеральнай центрась. Аньцек мекольце колма кизотнень федеральнай бюджетста Мордовиянь китненди нолдафоль пцтай 7 миллиартт цалковай.
В.Д.Волков азозе, што Мордовиясь сувась ся региоттнень еткс, коса сай кизоть ушеды етафневома эряфс «Безопасные и качественные автомобильные дороги» приоритетнай проектсь. Проектть коряс эрь кизоня Мордовиянь автомобильнай китнень  петеманкса федеральнай бюджетста кармай нолневома 3 миллиартт цалковай. Сембоц кота кизоста (мзярс кармай етафневома эряфс проектсь) республикась получай 18 миллиард цалковай.
Региононь вятись китькстазе, што маластонь кота кизотнень Мордовиянь автомобильнай китнень строяманкса нолдави пцтай 40 миллиард цалковай.
Благодарностень башка валхт пуромксса азфтольхть ветераттнень лемс, конатненди казьфтольхть панчфт Мордовиянь Оцюнять эзда.
Дорожнай отраслянь инь цебярь работникне тя шиня получасть государственнай оцю казнет. Тяфта, кинь строямаса оцюдонга оцю сатфксонь сатнеманкса Славань II степенень орденца казьф «Мордовдорстрой» ООО-ть генеральнай директороц А.И.Мокшин, кона 18 киза трудендай кинь строямань отрасляса.
О.Евдокимова.