Российскяй Федерациянь Финно-угорскяй культурань центрать руководителец Т.Т.Барахова:«СЯДОНГА МАЛАДОМС ФКЯ-ФКЯНДИ!»

Международнай фестивальда мельдень интервью
—Татьяна Тихоновна, кодама тефт мольфти Российскяй Федерациянь Финно-угорскяй культурань центрась Россияса и омба масторонь финно-угорскяй мирса?
—Тя кизефксть коряс корхтамста, васенцекс азома: Центраньконь Коми Республикань Сыктывкар ошса кефкие кизода инголе тиезе-панжезе и макссь теенза федеральнай статус эсь Указсонза Россиянь Президентсь В.В.Путин. Сяс минь вятьсаськ тевоньконь  Россиянь эрь регионца, коса эряйхть финно-угорскяй и самодийскяй наротт. Мероприятияньконь вельде ванфтсаськ и виияфтсаськ национальнай культураснон, кяльснон, койснон, искусстваснон, ремесласнон и стак тов.
Омба масторонь финно-угорскяй мирса тостонь этнокультурнай и лия организациятнень мархта тяфта жа ётафнетяма культурнай, информационнай, выставочнай, презентационнай марстонь мероприятият. Синь аф аньцек виияфтсазь финно-угорскяй нароттнень культураснон, но и тисазь синь фкя-фкянди сяда шарьхкодевикс, малакс и, мярьголень, ламода сяда кельговикс и питникс.
—Мархтот корхнетяма эста, мзярда Мордовиянь национальнай драматическяй театраса аньцек аделавсь «Финно-угорский транзит: музыка и      этностиль» Искусствань и народнай творчествань Международнай фестивальть мекольце этапоц. Сяс лувиеньконди пара улель кулемс сяда келиста тя фестивальть эвондаманц, этнокультурнай тевонзон и эрявиксшинц колга.
—«Финно-угорский транзит» Искусствань и народнай творчествань международнай фестивальть кемонь кизода инголе арьсезь и тиезь Российскяй Федерациянь Культурань министерствась, Российскяй Федерациянь Финно-угорскяй культурань центрась и Российскяй Федерациянь Финно-угорскяй нароттнень Ассоциациясна.
Ся пингста сявомок, Международнай фестивальсь эрь кизоня ётни Россиянь регионга, коса эряйхть финно-угорскяй и самодийскяй наротт. Эрь кизоня полафневи сонь темац. Тянь вельде няфнесаськ финно-угорскяй и лия нароттненди культураньконь сембе ширдень мазышинзон.
Тяддень Международнай фестивальсь лемтьфоль финно-угорскяй народонь национальнай музыкати и щапненди. Ушедомок эсь кинц Коми Республикаса, международнай фестивальсь ётафтозень эсь этапонзон Карелия Республикаса, Марий Элса, Пермскяй краень Коми-Пермяцкяй округса и Россиянь лия региоттнень эса, коса эряйхть финно-угорскяй наротт. И, кода тячи няеськ, Международнай фестивальсь келиста и мазыста ётафтозе эсь мекольце этапонц Мордовия Республикаса.
Международнай фестивальть мекольце этапонц анокламста и ётафтомста оцю лезксонкса азондан оцюдонга оцю спасиба Мордовия Республикань Культурань, национальнай политикань, туризмань и архивнай тевонь министерствати, Финно-угорскяй  народонь культурань Поволжскяй центрати и Мордовиянь национальнай драматическяй театрати.
—Татьяна Тихоновна, мес Мордовия Республикаса ётафтость «Финно-угорский транзит: музыка и этностиль» Искусствань и народнай творчествань Международнай фестивальть мекольце этапонц?
—Международнай фестивальть мекольце этапонц  Мордовия Республикаса ётафтоськ аф стак. Содасаськ кодама регионца панжемс фестивальть, коса ломаттне тисазь семботь сонь цебярьста анокламанц и келиста и мазыста панжевоманц инкса. Тяфта и ульсь Коми Республикаса, коса тядде панжевсь Международнай фестивальсь.
Мордовия Республикаса тяфта жа тифоль сембось Международнай фестивальть тёкшенц мазыста и келиста ётафтоманц инкса. Тянь лангс аф аньцек надияме, но и, мярьголень, содаськ, што Мордовия Республикаса Международнай фестивальть мекольце «нотац» кайгозеви инь мазыста и кайгиста. Тяфта и лиссь.
—Национальнай театрать залса, коса кайгсь Международнай фестивальть мекольце «нотац», ульсть мокшет, эрзят, руст, татархт и российскяй нациянь лия народонь представительхть. Сяс, койсон, Татьяна Тихоновна, ули кода азомс: финно-угорскяй народонь Искусствань и народнай творчествань Международнай фестивальсь эсь тевонзон вельде тяфта жа кемокстасыне российскяй нациянь нароттнень ёткса межкультурнай и межнациональнай соткснень.
—Тя афкукс тяфта. Кемонь кизоста, мзярс ётафневи Международнай тя фестивальсь, этапонза васенда ётафневсть Россиянь финно-угорскяй эрь регионца. Сяльде «Финно-угорскяй транзитть» этапонза ушедсть ётафневома Россиянь лия региоттнень эса, коса компактнайста эряйхть финно-угорскяй народонь представительхть. И, синдедост башка, мероприятиясонк, конешна, улендихть российскяй нациянь лия нароттнень представительсна. Шарьхкотьф: тяда меле теест арсихть сяда шарьхкодевикс и финно-угорскяй народонь национальнай культуратне, и финно-угорскяй ваймоньке.
Тяда башка, тяни кой-кона региоттнень эса, коса компактнайста эряйхть финно-уграт, тостонь, кода тячи корхнихть, титульнай народсь эсь мяленц коряс няфнесы эсь национальнай культуранц «Финно-угорский транзит» мероприятияса. Тя койсь ладявсь ниле кизода тяда инголе Башкортостанца, коса компактнайста эряйхть мокшэрзят, удмуртт, мариецт и финно-угорскяй лия народонь представительхть.
Сяс тейне ули кода азомс: Искусствань и народнай творчествань финно-угорскяй Международнай фестивальсь валом-валом арси эсеннекс российскяй нациянь лия нароттнендивок. И тянь мархта, конешна, кемокстасыне синь ётксост аф аньцек межкультурнай и межнациональнай, но и межрелигиознай соткснень.
—Татьяна Тихоновна, кода латцевихть тевонза Российскяй Федерациянь Финно-угорскяй культурань центрать финно-угорскяй народонь лия организациятнень мархта?
—Койсон, минь, Россиянь финно-угорскяй народонь сембе организациятне, тихтяма марстонь фкя тев—ванфттама и виияфттама странань финно-угорскяй нароттнень национальнай культураснон, кяльснон, койснон, ремесласнон, промысласнон и синценьге нароттнень эса. Сяс мероприятияньконь анокламста и ётафтомста федеральнай уровеньца и эрь регионца финно-угорскяй народонь организациятне фалу тейнек макссесть и макссихть эрявикс лезкс.
Оцюдонга оцю лезкс тейнек фалу максси Российскяй Федерациянь Финно-угорскяй нароттнень Ассоциациясна, конань штаб-квартирац тяни Мордовиять столицаса. Тяфта жа тейнек лездыхть Финно-угорскяй народонь культурань Поволжскяй центрась и Мокшэрзянь народть Межрегиональнай общественнай организацияц и сонь региональнай отделениянза.
Ули кода азомс: Россиянь финно-угорскяй содружествась тячи вииякшни Мордовия Республикать вельде.
—Международнай фестивальсь аделавсь. Кодама, койсот, сонь инь оцю итогоц?
—Тяддень Международнай фестивальсь аделавсь. Сонь мекольце этапонц ётафтомста тага няеськ, конашкава мазыхть минь, Россиянь финно-угратнень, национальнай культураньконь сембе ширенза—мороньке и музыканьке, щамоньке и ремесланьке, кштиманьке. Синь эряйхть и, койсон, кармайхть эряма фалу!
Тя мяльсь—Международнай фестивальть инь оцю итогоц!
В.НЕСТЕРОВ.