Н.С.Русейкин: «КАТК «МОКШЕНЬ ПРАВДАСЬ» АРАЙ ЯЛГАКС МОКШЕНЬ ЭРЬ СЕМЬЯТИ»

Николай Сергеевич Русейкин—медицинскяй наукань кандидат, профессор, Н.П.Огарёвонь лемса Мордовскяй государственнай университетонь Медицинскяй институтонь гигиенань курс мархта нормальнай и патологическяй физиологиянь кафедрань заведующай. Мокшень тя ломанць лемдсь медицинати 50-да лама киза! Тя пингста аралась аф фкя ломанень эряф, мезенкса марясы прянц пяк павазуста. Врачень тевсь, содаф, аф тёждятнень эзда. Штоба мумс ломанть урманц и пчкафтомс сонь, эряви путомс аф кржа вий-эрьгя и Николай Сергеевич тянь ширде эсь прянц ашезе ужяле. Пачкодемок пенсиянь кизотненди сон лоткась покодемда больницяса, сяда шуроста кармась шарома сярядихнень ёткса, но университетса работанц ашезе када.
Эсь крхка содамошинзон Николай Сергеевич тячивок  макссесыне од ломаттненди, сай пингонь врачненди. Тяда башка, профессорть лама мяльс туф тевдонза: шарфни мяль политикати, лувонды аф кржа научнай литература и, конешна, мзярдовок аф юксни родной кяльса лисенди «Мокшень правда» газетать колга.
Аф кунара мокшалять мархта васетькшнесь минь корреспондентоньке и эняльдсь отвечамс кизефксонзон лангс.
—Николай Сергеевич, азонтт аф лама эсь колгат.
—Шачема-касома уженязе—Краснослободскяй райононь Од Синдру велесь. Тя вастсь тейне фалу ульсь и лядонды фкя инь мазыкс и кельговикс. Тячивок онцтон няендьса тостонь седиень пети перьфпяльть, кона мрдафни эсон весяла идькс пингозти. Аф юкстави и школав вяти кинясь, конань тапсине сисем кизот, а меле нинге колма кизот якань содамошинкса шабрань Сире Синдру вели. Школать аделамда меле поступань Саратовскяй медицинскяй институту и шумордайне сонь аньцек цебярь оценкаса.
—Мезсь кошардонзе кочкамс врачень профессиять?
—Васендакиге—алязень пингта инголе эряфста тумац. Сон работась велеса ёмла классонь тонафтыкс. А учительхне, кода содаф, эрь кизоня ётнихть медосмотра. Вов тяфта сонга няфтсь пря враченди, макссь эрявикс аналист, а куду мрдамста, алашаса ардомста, кулось. Мезьсоль туфталсь, киндивок аф содафоль, сяс мон, штоба мумс ответ тя кизефксть лангс, арьсень сотомс эряфозень медицинать мархта. Тияк азса, што семьясонк пцтай сембе учительхть, кафкса сазорнень и браднень ёткста ськамон тунь лия киге и тянь колга нинге вестевок ашень ужяльде. Врачень тевть лувондса фкя инь цебярькс и эрявиксокс.
—Лама киза работат од ломаттнень мархта. Мезе азолеть тячиень стирьхнень-цёратнень, сай пингонь врачнень содамошиснон колга?
—Сембе пинкнень тонафнихне аф фкя лацоннетольхть, вов и тянивок кие-бди ёткстост сяда вии, а кие нинге лафченя. Тяфтамотнень лангс старандат шарфтомс башка мяль, лездомс теест. Целайнек, койсон, надиямс ули кинь лангс. Тячи од ломаттнень эряфс кемоста сувась Интернетсь. Стирьхне-цератне тонадсть мушендомс эздонза ответт сембе кизефксснон лангс. Но, арьсян, сяда пара, мзярда ломанць работафтсы эсь пряуенц.
—Мокшет улихть тонафнихнень ёткса?
—Пяк лама. Пяк мялезон, мзярда ширезон сувай студентсь пшкятькшни мокшекс. Аф карман сепондома, што тяни, эрямок Саранскяйса, тейне сяда сидеста сашендови корхнемс рузкс, но мзярда васьфнян мокшень ломань мархта, рузонь валхне прястон эстокиге тушендыхть. Старандан фалу кирнемс мокшень студенттнень ширеснон. Тейнек, мокшень ломаттненди, кирдема марса, лезнема фкя-фкянди.
—Тядде Саранскяйса ульсь спортонь оцюдонга оцю ила—футболть коряс Миронь чемпионатсь. Якать налхкоматнень ванома?
—Молемс матчненди ашезь удала, но сянь, мезе ульсь чемпионатонь шитнень ошса, няине эсь сельмосон. Саранскяйса азорондась международнай оцю праздник. Аньцек коста ашесть сашенда ширезонк инжихть. Деряй арьсекшнефоль мзярдовок, што республиканьке арай мировой спортонь столицакс. Но тяфта лиссь, и мон марян Мордовиять инкса оцю гордость. Чемпионатти анокламста Саранскяйсь ламода полафтсь. Пангокс кассть эрямань од куттне, гостиницатне, спортивнай объекттне, строявсть кит. Сят, кит кунара ашесть уленде ошса, тяни сонь, улема, афи содасазь.
—Николай Сергеевич, тон лама киза ни лувондсак «Мокшень правда» газетать. Мезе азолеть сонь и лувиензон лемс?
—Васендакиге азса, што «Мокшень правдась» пяк тушенды мялезон. Ётка пингста фалу старандан сонь лувондомс. Арьсян, штоба газетась араль пара ялгакс мокшень эрь семьяти и мзярдовок афолезе юмафне национальнай шамаликонц. Катк сон ули сядонга интереснай и кеняртьфни эсонк од и од информацияса. А лувихненди мярьголень эряскодомс почтав, вдь пингта газетать сёрматфтомс ляткшни ни аф сяшкава лама.
—Спасиба.
О.ЕВДОКИМОВА.