Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Ломанень кельги ломань

Ня шитнень содаф хирургсь, тевонь кельги мокшалясь М.Н.Царёв отмечасы эсь кодгемонь кизонь юбилеенц. Сон кельгома ломань, оцю авторитетоц Атюрьевскяй райононь эряйхнень ёткса. Ванат Максим Николаевичень лангс и дивандазеват, кода и мзярда сон семботь кенерькшни тиемс. Шиньберьф покодема вастса, примай сярядихть, лезды ломаттненди сяда курок пчкамс, стямс пильге лангс. Да и кудсовок аш мзярда ваймосемс. Кудонц фтала перец, каршесонза переняц. Кардсонза жуватанза. Аф стак васедема пингонди кочкаськ недляшить.
…Кенкшень панжема лиссь рьвац Татьяна Николаевна. Сон пцтай нильгемонь киза макссь медицинати, покодсь медсестракс Атерень районнай поликлиникаса. Аньцек аф кунара явсь кельгома тевонц мархта.
—Тяни афкукс пенсионеркан,—виденцясь мокшавась.—А пингсь сяка аф сатни. Аф кенерят пряцень шарфтомс, ванат, шоподсь ни. Тефненьге явфнесаськ кафтова. Азорти сатнихть сяда стакатне, тейне—сяда тёждятне.
Максим Николаевич, кода азоськ ни, трудонь кельгихнень эзда, аф пели и аф визди возсемс модаса, наземса. И тувот куяфты, и буканят касфты. Кона тевти афоль кярьмоде, кядьсонза лаказь-лакай. Кяденза золотаннет, аф тиевомшка тефт теенза аш. Да и миньге улемстонк лисьфоль жуватань вастонь урядама.
—Молян тердьса,—мярьгсь Татьяна Николаевна.—Кунара ни лисьф. Пади, тнярс ни тиезень сембе тевонзон.
Сувась Максим Николаевич. Шумбракстоме. Азоськ местема саме. Сон аф ламос арьсезевсь, а сяльде пеедезь мярьгсь:
—Монцьке аф верондан, што кодгемонь ни. Бта исяк сембось ульсь. Тонафнень школаса, вузса, сань покодема больницяв. И на тейть, пенсионеран ни.
—Лангозот ванозь, нильгемоньге аф максат. Тяфтама жа одат, отькорят. Сембось нинге инголе.
—Монга сякоть колга. Эряфсь бта аньцек ушеткшни. Иттне кассть, сембе вастоваст. Эрятама кафоненк. Ляткшни аньцек работамс и кеняртькшнемс эряфть лангс.
—Лисенди, кельгома тевцень аф кадсак. Кармат сяда товга трудендама, лездома эсь землякненди?
—Афкукс, мзярс сатыхть вийне, карман покодема, пчкафнема ломатть.
Шачсь и кассь Максим Николаевич Атерь велеса Царёфнень трудонь кельги оцю семьяса. Сембоц кафкса идьсноль. Сон семьяса сисемцесель. Аляц, Николай Максимович, ётазе Великай Отечественнай войнать, ульсь Ленинградскяй блокадаса. Войнада меле покодсь Атерень «Память Ильича» колхозса. Тядяц, Анастасия Васильевна, стане жа тевфтома ашезь лядонда, касфтсь итть. Максим Николаевич лац тонафнесь школаса. Класснай руководителец Е.П.Волкова колганза азсь лама шнамань вал.
—А мес кочкайть врачень профессиять?—кизефтине мокшалять.
—Виденц азомс, монцьке аф содаса,—мярьгсь корхни ялгазе.—Школаса тонафнема пингть сидеста мархтонк васьфнесть разнай профессиянь ломатть. Сашендсть и больницяста врачт. Мяляфтса, пяк мялезон эста тусь врачть-психиатрть В.М.Сиркинонь врачень профессиять колга азондомац. Арьсень эсь пачкан, мес аф молемс медфаку тонафнема. Конкурссь хуш оцюволь, но ётавомшкаль. Кудса, конешна, азыне ков ёран молемс тонафнема. Шнамазь, кирдезь ширезень.
1976 кизоня М.Н.Царёв поступась тонафнема Мордовскяй госуниверситетонь медицинскяй факультету. Тонафнемась мольсь аф кальдявста. Тяса васьфтсь лама содаф врачень, учёнаень мархта, конат макссть аф аньцек цебярь содамошит, но и тонафтозь сай пингонь профессиянь кельгома. Цебярь примеркс и наставникокс ульсь землякоц, медицинскяй наукань докторсь, профессорсь, кафедрань заведующайсь И.Н.Пиксин. Сон лама азондсь хирургонь профессиять колга. Корхнесь, што тонь кядьсот кармайхть ломанень эряфт. И кда лац аф кармат содама, мезе тиема тя или тона сярядить мархта, больницяса тиендемс аш мезе. Профессорть валонзон Максим Николаевич мяляфтсыне тячемс. Да и сонцьке Иван Никифорович тянемс стройса, кафедрань заведующай, аф ваномок эсь 84 кизонзон лангс.
Тонафнеманц аделазе 1982 кизоня. Покодема вастонди кочказе Атерень районнай больницянь хирургиянь отделениять. Од цёрать васьфтезь пяк лац. Васенце аськолксонь тиемста оцю лезкс макссесть опытнай хируркне С.С.Тишкин, Е.А.Десятников, В.А.Сидоров. Од хирургти синь верондасть, надиясть лангозонза. И ашесть эльбяде. Пингонь ётазь Максим Николаевич сонць кармась вятемонза хирургиянь отделениять. И сатфксонь сатозь вятезе 25 киза. Сон ульсь аф аньцек цебярь хирургокс, но и цебярь организаторкс и наставникокс. Сембе эсь содамошинзон, работань козя опытонц макссезе од хируркненди. Учениконзон ёткса ульсть А.Н.Гулин, И.П. Кижапкин, А.В.Игнатьев, П.Я. Пиксин и лиятне. Мзяра операция тись М.Н.Царёв 38 кизоста, мзяра ломанень эряф аралась тя оцю пингста, сембе афи лятфтавихть.
—Кизоньберьф тиендеме 350-да лама операция,—корхтай хирургсь.—Мезе аньцек ашель. Синтьф кятть, пилькт. Аварияса и стройкаса токаф ломатть. Пингсь тарксемс ашезь эряв, эрявсь курокстонь медицинскяй лезкс. Пара, мзярда операциясь планц коре. Тянди анокласак сярядить, анокласак эсь пряцень. Содасак, кода и мезе тиемс. А кда ломанть усксазь аварияста или ушеса тюрендемда меле. Состоянияц пяк стака. Аф содасак, кармай эряма или аф. Шить сембе хируркне, врачне вастсост. А кда веть тя отделенияса ськамотат. Сявсак сембе ответственностть эсь лангозт.
Тяфта М.Н.Царёвонь ульсь сидеста. Сембе, кинь эряфонц аралазе, афи лятфтавихть. Вов аньцек фкя случай. Ульсь праздник, 9 Майсь. Ломаттне ваймясть. Максим Николаевич дежурясь больницяса. Ускозь сярядить Андрей Ч-нь. Сон кулома лангсоль. Эрявсь эстокиге тиемс операция, ашель пинге тердемс лия хируркнень, медицинскяй лия работникнень. Операциянь тиема блоку сувась ськамонза. Тиезе операциять, вакссонза аньцек фкя медсестраль. Но ломанць пчкясь, стясь пильге лангс. И тяфтама случайда пяк ламоль.
Тяни Атерьса аш больниця, сонь ётафтозь Торбеевав. Максим Николаевич тевфтома ашезь ляда. Сон хирург шинь стационарса и районнай поликлиникаса. Тяфта жа максси медицинскяй лезкс ломаттненди. Оцю операцият, конешна, аф тиенди, но тевдонза сяда кржа ашезь ара.
М.Н.Царёвонь пяк цебярь семьяц. Рьванц, Татьяна Николаевнань, мархта марсот 38 киза. Сон Торбеевскяй райононь Мокшень Ювняста. Училищань аделамда меле крьвязсь ётксост кельгомань цятконя, налхксть весяла свадьба. Рьванц Максим Николаевич ускозе шачема-касома кудозонза. Касфтсть колма итть. Колмоцьконь высшай образованиясна. Оцю стирьсна, Марина Максимовна, тусь родителензон киге. Сон стане жа врач. Галина Максимовна аделазе Мордовскяй госуниверситетонь иностраннай кялень факультетть. Цёрасна, Николай Максимович, аделазе Мордовскяй госуниверситетонь юридическяй факультетть. Касыхть вете уноконясна, конатнень синь пяк кельгсазь.
Ня шитнень М.Н.Царёвонь лемс сашенды лама поздравленияда. Синь аф аньцек раднянзон, ялганзон и содафонзон эзда. Ашезь юкста и сят, кинди Максим Николаевич лездсь, казезе омбоце эряфть.
Миньге пара мяльса поздравляндасаськ мокшалять М.Н.Царёвонь юбилей мархта. Арьсетяма теенза кеме шумбраши и сатфкст аф тёждя, но ломаттненди пяк эрявикс тевсонза.
Илья ВЕШКИН,
Россиянь Писателень союзонь член.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022