Сергей Емелин: «Оцю мялезе сатомс медаль Олимпийскяй налхкоматнень эса»

Сон шачсь и кассь простой рабочаень семьяса. Аляц— строитель, тядяц—продавец. Идькс пингоцка ульсь кода кизосонза ламоц лия шабатнень. И киньге пряска, улема, эста ашезь сашенда, што етайхть кизот и мезьсовок сельмос аф пови церокшсь арай содафокс марнек мирса-масторса. Но сон сатозе тянь, и тячи инксонза маряй гордость аф аньцек мокшэрзянь крайсь, но и сембе странась. Корхтамась мольфтеви Рузаевкань од церать Сергей Емелинонь колга, кона аф кунара сяськсь Венгриянь Будапешт ошса етафтф греко-римскяй бароцямать коряс Миронь чемпионатса. Турнирса земляконьке няфтсь афкуксонь боецонь характер. Фкя-фкянь мельге Мордовиянь спортсменть кеме кядензон ала «прашендсть» Белоруссиянь, Египетонь, Севернай Кореянь, Казахстанонь, Молдавиянь бароцяйхне. 60 сталмос молемс категорияса мокшэрзянь церать коряс сяда таза борец ашезь мув сембе мирса!
Кода мярьгсь Мордовиянь Оцюнясь В.Д.Волков Миронь чемпионатта меле етафтф пуромксса, тя сяськомать  эсь лацонь «таньфоц», сяс мес сатф сон российскяй спортти аф теждя пингста, мзярда тяряфневи муворгофтомс спортсменоньконь аф честнай тюремаса, няфтемс синь лафчашиснон. Сергей Емелинонь сатфксоц тага весть кемокстазе мяльть, што нят шава корхнемат, а Россиянь, тяконь и лувксса и Мордовиянь спортсметтне инь виихне.
Ня шитнень Миронь од чемпионть мархта телефононь пачк удалась корхнесь минь корреспондентоньконди. Спортсменць пара мяльса отвечась сонь кизефксонзон лангс.
—Сергей, поздравляндатядязь Миронь чемпиононь титулть сатоманц мархта! Сяда товга кеняртьфнемасть тяфтама оцю сатфксса!
—Спасиба! Карман старандама одувок пяшкотькшнемс лангозон путневи надияматнень.
—Турнирда меле российскяй журналисттне пачфнесть эсь материалсост, што тон танка лаца етать сембе соперникнень ланга, васенце минутаста ни максомок шарьхкодемс, што аф сяськоват. Ширеста ванозь сяськомась максовсь тейть теждяста.
—Афолень мярьге, што теждяста. Сембе соперниконе ульсть достойнайхть, синь тюрсть сембе вийса. Кепотьксонди, финалса молдованинть Виктор Чобанунь мархта бароцямста мекольце минутас молемс ульсь пелема, што теенза удалай тиемс эсь лацонь трюконц, тяфта лемдеви «лиенди урнять», мзярда спортсменць юпади, а меле тии захват. Мон старандань вятемс прязень стане, штоба аф максомс возможность тиемс тянь.
—И тейть тя удалась. Кодамольхть сяськомада мельдень васенце мяльхне-арьсематне?
—Аф эстокиге сась шарьхкодемась, што арань Миронь чемпионкс. Меле валом-валом седиезе пяшкодсь кенярдемада, мес удалась пяшкодемс надияматнень. Личнай тренерозень, сборнаень тренерхнень,  главнай тренерть и Федерациянь президентть надиямаснон. Инь мялень кеподись, койсон, тя пяшкотьф долгонь мярямась.
—Сяськомацень мархта васенцекс телефононь пачк поздравлянданзе Мордовиянь Оцюнясь Владимир Волков. Мезе мярьгсь сон?
—Сон гайфтсь, мзярда мон етань допинг-контроль. Меле гайфтсь оду, поздравляндамань монь и Артем Сурковонь. Мярьгсь, што пяк тусть мялезонза выступленияньке. Кле, Мордовиянь кафта цератне примасть участия мировой турнирса и арасть чемпионкс! Тяфта лиссь васенцеда республикать историяса.
—Лятфтак, пожалуйста, кода сать спортти?
—Монь личнай тренерозе Николай Викторович Слесарев якась школатнень ланга и кочкась группа греко-римскяй бароцяманкса. Тейне эста ульсть кемонь кизот. Алязе шабакс аф кржа азонкшнесь тейне бароцямать колга. Сон армияв тумозонза занцесь пря спортонь тя видть мархта. Ся пингти, мзярда васедень тренерть мархта, мон содань ни кой-мезе бароцямать колга. Ульсь интересна васенце шиста сявомок, саворне усковонь и тяни бароцямась тейне и профессия, и кельгома тев.
—Тренировкатне лама пинге занцихть?
—Шити аф ниле частта кржа. А сборхнень пингста сядовок лама.
—Лисенди, кемголмува киза ни эряфце сотнеф греко-римскяй бароцямать мархта. Тя пингста вестевок ашезь эвондакшне мяль кадомс?
—Тяфтама вестевок ашель. Ульсть стака пинкт, но мон эстовок ашине нолне спортть мархта явомать коряс мяльхнень-арьсематнень. Афи шарьхкодьса, кодама лия тевса мулине эсь вастозень.
—Мзярда шарьхкодить, што арат профессиональнай борецокс?
—2010 кизоня юниорхнень еткса  греко-римскяй бароцямать коряс Россиянь первенстваса сяськомада меле. Тя сатфкссь пяк кеподезе мялезень.
—Кельгома спортсметтне улихть?
—Кельгома борецозе аш, но ули тренерозе, конань лангс мон надиян, кулхцондса  эрь валонц. Семботь, мезе мярьгонди тренерсь, мон пяшкотькшнеса. Содаса: кда кулхондса, кармайхть  результатоне.
—Сергей, тонь ули емла дуганце. Сонга занци пря бароцямаса?
—Сон тонафни ветеце  класса и кунара ни арась ялгакс спортть мархта. Хуш оцю сатфксонза нинге аш, но тевоц лисенди аф кальдявста.
—Спортта башка кельгома тевце ули?
—Кельгса книгань лувомазень. Башка мяль шарфнян спортсметтнень автобиографияснонды.
—Миронь чемпионатса сяськоманкса Мордовиянь Оцюнясь макссь тейть и борец ялгацти Артем Сурковонди премият—3 миллиотт цалковаень. Мезень лангс арьсят карьхцямс ня ярмакнень?
—Ярмакти васта фалу муви. (Рахай). Кепотьксонди, аш монцень эряма вастозе, эрян Рузаевкаса рабочай квартираса. Шять, тя кизефксть удалай решандамс.
—Аш кода аф максомс кизефксть, кона таколфты, улема, аф фкя од стирь: рьвяямс аф срхкат?
—Мзярс аф арьсян тянь колга, хуш ладяй кандидатура ули ни.
—Сяда товолдонь платтне кодамот?
—Оцю мялезе примамс участия Олимпийскяй налхкоматнень эса, конат кармайхть 2020 кизоня Япониянь Токио ошса. И, конешна, аф лядомс медальфтома.
—Пяшкодевост сембе арьсематне!

О.ЕВДОКИМОВА.