Шуфтста тиенди мазыши

Сараефнень семьясна оцюволь. Петр Алексеевич и Мария Васильевна касфтсть кефкие идь. Тонафтозь синь трудонь кельгома, фкя-фкянди и лия ломаненди лездома. Тяфта тевсь ащи тянемс. Гордостень и прянь шнафтома вастокс ащихть 90 кизоса Мария Васильевна Сараевати кемонь иденза. Аф ваномок кизонзон лангс, мокшавать тянемс оржа  енец, мяляфтсыне мокшень сембе моротнень, морсесыне синь праздникнень пингста, мзярда шрать ваксс пуромкшнихть мала ломаненза, инжихне.
Церац, Петр Петрович, тонафнесь эсь велень школаса, меле—строителькс училищаса. Сяда тов Саранскяйса шумордазе культурань и искусствань училищать. Работась колхозса, Мокшень Ювнянь Культурань кудонь директороль, морсесь хорса.
П.П.Сараев сась мяльс пуроптомс ансамбль велень стирьхнень и аватнень эзда, конанди кочкасть «Мокшаночка» лем. Коллективсь ащесь кота ломаньцта. Мокшалясь налхксь гармонияса, стирьхне и аватне морасть кургса. Ансамбльсь морсесь велеса, районца, лия вастса етафневи пуромкснень пингста, лисендсь сяськикс и призеркс пялькстоматнень эса.
Петр Петрович сембе виензон макссезень Культурань кудса работамати. Тя ашезь ляда апак приметак и сон путфоль Культурань кудонь директоркс. Сидеста лятфнесы сянь, кода «Мокшаночка» коллективсь морсесь паксяса сёронь касфнихнень инголе. Ансамбльсь ерась кеподемс  труженикнень мяльснон, аф ламода ваймафтомс синь стака тевснон эзда. Сембода сидеста тяфта улендсь етай веконь 90-це кизотнень пингста, мзярда ломаттне работасть заработнай платань апак получак. И «Мокшаночкать» эрь выступлениянц, мораф эрь моронц васьфнезь кядень кайги цяпамаса.
Сяда тов Мокшень Ювнянь Культурань кудонь директоркс и «Мокшаночкати» руководителькс путфоль Мордовия Республикань культурань Заслуженнай работниксь Л.И.Аргузова. Лариса Ивановна тячиень шити заняф тя тевть мархта.
П.П.Сараев кой-мзяра пингс тушендсь Москуву ярмаконь добувама, сяс мес  эрявсь трямс семьянц. Рьвац—Мокшень Ювнянь мазыдонга мазы мокшавась, педагогсь, Галина Васильевна (тяни сон заняф мишендемань тевса). Мирдть и рьвять шачсь кафта идьсна: церасна Евгений и стирьсна Мария. Шарьхкотьф: тевонь кельги, семьянц инкса пичеди эрь алясь тисы семботь, штоба мала ломаненза эряльхть лац. Сяс ламотне, Петр Петровичень лаца, работасть ширеса.
Мокшалясь содазень плотниконь, строителень тефнень. Вов мезе тянь колга мярьгсь сонць: «Семьяньке оцюволь, аляньке, Петр Алексеевич, цебярь плотниколь. Тя тевти тонафтомазь миньге—церанзон. Аньцек тонадоме кядьсонк узерень и лия инструментонь кирдема, ушедоме якама мархтонза лездыкс—марстонь вийса стройсема велеса кутт. Ся пингста сявомок шуфтть мархта работамась арась тейне эряфонь кельгома тевкс».
Стакаста таргайне ваймозень, мзярда пачкодень ня валрисьмотненди. Афкукс, тянь колга тяштемс аф пяк теждя. 2011 кизоня Петр Петровичень мархта лиссь зиян. Сон юмафтозень кафцьке кядьстонза суронзон. Удалась ванфтомс аньцек фкя оцю суронц. Мезе тиемс? Кода эрямс сяда тов? Кодама тевс кярьмодемс? И кода? Ня кизефксне, бта мешвеле, шинек-венек шарсть мокшалять пряса. Меле Петр Петрович эстеенза мярьгсь, што эряви тонафнемс эряма одукс. Тячи—куцювонь, шаванянь кирдема, ванды—сави озамс рульть ваксс. И семботь тянь тиезе. Кода тя теенза удалась—содасы аньцек сонць. Но тянь лангс    мокшалять ашель мялец лоткамс. Содазе, што виец саты и лия, сяда оцю тевонди. Кярьмодсь циркуляркати, и валом-валом ушедсь ноляма тевс кельгома техниканц. Строясь баня, кудонц малас беседка, тись мебель. Ломаттне ушедсть шарфнема мяль сембе тя мазышить лангс и эняльтькшнесть Петр Петровиченди заказ мархта. И сон аф атказакшни, а эстокиге кярьмотькшни, мярьктяма, куцемань, беседкань, мебелень тиема.
Аф ваномок ся зиянть лангс, кона лиссь мархтонза, мокшалясь П.П.Сараев стакатненди-сталмотненди ашезь мяндев. Сон стаки заняф кельгома тевонц—шуфтста керсемать мархта. Кой-коста кядезонза сявондьсы гармониять. Виде, налхконды сяда нюрьхкяня и теждя мелодият, но синь молихть ваймостонза.
Вов тяфтама сон, Мокшень Ювнянь мокшалясь Петр Петрович Сараев.
Т.Альшина.