Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наши мокшанские сыновья и дочери

В.М.Имярековати—85 киза

Велеста—наукань тёкшненди
Ня шитнень васьфтезе эсь 85 кизонь юбилеенц мокшень содаф учёнайсь, языковедсь, Н.П.Огаревонь лемса Мордовскяй госуниверситетонь мокшень кялень кафедрань доцентсь В.М.Имярекова. Тя мокшавать эряфоц ащи примеркс од ломаттненди, од учёнайхненди. Сонь книганзон коряс тянемс тонафнихть школаса, вузса, училищаса. Сонь научнай трудонза нолявихть тевс од, тяниень пингонь тонафнемань книгань сёрмадомста. Учёнайхне сидеста лятфнесазь вузса, лия вастса лекциянь лувомста. И пяк куватьс кармайхть эряма, служама мокшень кяльть тонафнемста. Од ученайхне кармайхть кирдема мяльса кандидатскяй, докторскяй диссертациянь араламста, научнай трудонь сёрмадомста. Валентина Михайловнань колга сёрматф пяк кржа. И тя шарьхкотьф. Сембе эсь эряфонц максозе наукати, Мордовскяй госуниверситетти. Сон лувсь лекцият студенттненди, тонафтсь мокшень кялень содама, кельгома велень стирьхнень и цёратнень эса. Оцю авторитетоцоль кафедраса. Ульсь цебярь ялгакс эряфкшу учёнайхненди, нежедема, пшкядема вастокс оттненди. Кажнайть аноколь кулхцондомс, максомс ёню советт, панжемс ваймонц. Валентина Михайловна ульсь и тянемс ляткшни ару вайме, панжада седи ломанькс.
Шачсь и кассь В.М.Имярекова странаньконь инь стака пингстонза 1933 кизонь 28 декабрьста Куйбышевскяй областень Хворостянскяй райононь Чувичи велеса. Пингсь афкукс стакаль. Теенза кафкса кизонятольхть, мзярда ушедсь Великай Отечественнай войнась. Семьясна оцюволь. Аф ваномок ашу эряфть лангс, Валентина Михайловна тонафнесь школаса. 1953 кизоня шумордазе Зубова Полянань педагогическяй училищать, 1958 кизоня—Мордовскяй госуниверситетонь филологическяй факультетть. Вете кизот работась старшай научнай сотрудникокс республиканскяй краеведческяй музейса. МНИИЯЛИЭ-ть видеса тонафнесь аспирантураса. Тяка жа пингть институтса языкознаниянь секторса ульсь старшай научнай сотрудникокс. Сембе одонь, инь павазу кизонзон Валентина Михайловна лемдезень тонафнемати, наукати. 1972 кизоня В.М.Имярекова сась трудендама Н.П.Огаревонь лемса Мордовскяй госуниверситетонь филологическяй факультету мокшень и эрзянь кялень кафедрав. И пцтай колмогемоньда лама киза покодсь вузса. Филологическяй наукань кандидатсь ульсь старшай преподавателькс, мордовскяй (мокшень и эрзянь) кялень кафедрань доцентокс.
Прянь шнафтозь и гордостень марязь азса, што Валентина Михайловна тонафнемань моньге, колмоце курсса лувозе «Синтаксисонь» курсть. Тя ульсь пяк интереснай пинге монь эряфсон, ётай веконь кафксогемонце кизотнень песна. Эста тонафтыеньке ульсь од, отькорь. Лекциянзон ётафнезень интереснайста, мялень салайста.
А васенцеда Валентина Михайловнань васьфтине 1984 кизонь июль ковста. Аделайне школать. Арьсень поступамс Н.П.Огаревонь лемса Мордовскяй госуниверситетонь филологическяй факультету. Эста ашельхть    ЕГЭ-т. Школада башка максоме экзаметт и вузса. Васенце экзаменоньке ульсь мокшень кяльса. Школань тонафтыеньке фалу эвфнесть эсонк. Мольхтяда вузу, тостонь преподавательхне аф кода минь, каяфтсазь кедентень. Кяжихть, вешихть пяк лама. И вов васенце консультацияньке васенце экзаменонь карша. Консультациянь ётафтома сась Валентина Михайловна. И ёфси сон аф кяжиель. Ляпе седи, ару вайме ломань. Вестевок ашезь пешкода лангозонк. Меколанкт, эрь кизефксть лангс отвечсесь кафксть, колмоксть. Корхтась, што виздемс аф эряви, вятема пряньке сяда отькорьста. Школатнень эса мокшень кяльсь тонафневсь аф фкя лаца. Но карматада, кле, тонафнема вузса, сембе лафча васттне лядыхть фталу. Но тяда инголе старандама, штоба максомс экзаметтнень.
Мон тяштень мокшень кяльса диктант, литератураса—сочинения. Инголе нинге кафта экзаметтольхть. Сань приёмнай комиссияв колмоце экзаменонди направлениянкса, а кагодне кати-косот, аф мувихть кодавок. Эводень нльне. Приёмнай комиссияса ломаньда ламоль. Тясоль Валентина Михайловнавок.
—Афи содаса, мезе отвечамс,—мярьгсь сон.—Учт аф ламос, курок деканць Д.В.Цыганкин сай. Сон содасы семботь, отвечай эрь кизефксцень лангс.
Аф куватьс савсь учемс.
—Дмитрий Васильевич, цёрать кагодонза ков-бди юмасть,—пшкядсь Имярековась.
«Хэ-хэ-хэ» каршек рахазевсь деканць.
—Ков шта юмасть?! Поступась тонафнема. Кафта «ветет» сявсь. Ляды экзаметтне максомс аф эрявихть.
—Улель монь волязе, ня кафттненьге афолине максфта,—мярьгсь Валентина Михайловна.
—Тяфтапт вузу поступамань правилатне. Аф минь мархтот арьсеськ.
Васенце курсса кураторкс тейнек ульсь содаф учёнайсь М.Г.Имяреков, Валентина Михайловнань мирдец. Михаил Герасимович ульсь тейнек, велень стирьхненди-цёратненди, омбоце алякс, Валентина Михайловна—тядякс. Кода аньцек маштсь, лезнесь мирденцты. Сувсесь группазонк пяк сидеста. Кизефнезе, кода эрятама-ащетяма, тонафнетяма. Лезнесь, кирнезе ширеньконь, пшкятькшнесь инксонк кинди эряви.
Валентина Михайловна лия автор мархта сермадсь пособият: «Мокшэрзянь кяльхнень грамматикасна» (1980 к.), «Мокшэрзянь кяльхнень эса определеннай валонь сочетаниятне» (1984 к.), «Мокшень кяль: фонетика и лексика» ветеце классонди тонафнемань книга. Работась мокшень-рузонь валксть лангса. Кепотьксонди, ветеце классонди тонафнема книгать сёрмадозь-аноклазь монь землякозень, войнань ветеранть, Мордовскяй АССР-нь школань Заслуженнай учительть М.В.Кондрашкинонь мархта. Вов мезе Михаил Васильевич корхнесь марстонь тевснон колга:
—Мон работань лама автор мархта. Но Валентина Михайловнань кодяма цебярь ломань васьфнень пяк шуроста. Сонь пяк крхкатольхть содамошинза, козя опытоц. Лац содазе материалть. Мон шарьхкотькшнине, што учёнайхне пяк заняф ломатть. Но аф ваномок тянь лангс, мушендсь пинге лездомс тееньге. Макссесь цебярь советт. Сон учёнай, а мон велень простой учителян. Лац содайне и мирденц, Михаил Герасимовичень. Имярекофненди мон цебярь ялгалень. И тя ялгаксшись тейне пяк лама макссь.
2018 кизоня топодсь 20 киза, кода нолдаф «Мокшень-рузонь валкссь». Сонь тиемстонза аф кржа вий макссь и В.М.Имярекова. Мархтонза работасть Н.С.Алямкин, М.И. Липатов, П.Г.Матюшкин, О.Е.Поляков, В.И.Щанкина, А.Н.Келина и ламотне лиятне. Ламотне синь эздост Валентина Михайловнань мархта 30-40 киза покодсть фкя кафедраса, ульсть цебярь ялгакс. Ужяленди, ламотне пяк рана тусть эряфста, кадсть книгат, научнай работат.
Мокшень содаф журналистсь А.М.Терентьев «Велеста—наукань тёкшненди» Имярекофнень колга очерксонза, кона печатлафоль «Мокшень правдать» 1998 кизонь 8 октябрень номерсонза, сермады: «Мокша ломаттне корхнихть, кле, ворста вор и шачи, плотниконь цёрась ули плотникокс. А Имярекофнень цёрасна—учёнай».
И афкукс, Сергей Михайлович—экономическяй наукань доктор, лама книгань автор. Валентина Михайловнань надияма и прянь шнафтома вастоц. Колма уноконза, улихть уноконь иденза. Тянь ширдевок Валентина Михайловна пяк павазу ломань, кельгома баба.
Оцю юбилей мархта, Валентина Михайловна! «Мокшень правдань», кельгома газетацень, покодихне седи ваксста арьсихть тейть кеме шумбраши, тёждя эряф. Катк фалу кеняртьфнетядязь эсь сатфксснон мархта цёраце, унокне, уноконь  иттне, аф юкснетядязь ялгатне, студенттне, конатненди тон улеть аф аньцек цебярь тонафтыкс, но и омбоце тядякс.
Илья ВЕШКИН,
Россиянь Писателень союзонь член.

10.01.2019 №1
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин