Поиск по сайту: 
 

Архив
 март 
 2019 
пн вт ср чт пт сб вс
    123
45678910
11121314151617
18192021222324
25262728293031

 
 

 

Юмор и сатира

Аф ся баярнятне

Лашмань Матрёнась киндивок ашезе макссе прянц обжамс. Покодсь Лямбоня велень администрацияса, вятезень бухгалтериянь тефнень. Ревизорхт сашендсть сидеста. И пцтай сембонь мархта мушендсь марстонь кяль. А весть авать сяшкава обжазь, што аноколь пикссемс кияксонь штайснон Лужань Аксють.
А лиссь вов мезе. Матрёна Зина ялганц мархта учсть ревизия. Аноклазь каготтнень. Тяда башка, кочкасть шраня. Рамасть сюлеканявок. Сяпиняфтома кодама каваняма, кяльцевок аф шарфневи.
Ревизор алясь тиезе эсь тевонц.
—А тяни чайда сиптяма,—азозе Матрёна.
—Чайда, тк чайда,—низелдозь отвечась инжись.
Аватне лихтезь ярхцамбяльснон, таргазь сюлекаснон.
—Тяса аф аньцек чай,—шутендась ревизорсь,—ёнень шоряфтынявок ули. Мес ба аф нилемс стопканя ня удалаф аванятнень мархта.
Аляти нюрьхтясть стопканя.
—А эстеенть?—кизефтезень инжись.
—А минць чайняда. Пост моли.
—Тевсь тинь. А мон фкя стопканя нолдан.
Алясь нилезе стопканять. Ктр-ктр-ктр,—рахазевсь.—Коста тяшкава кяжи  симомбяльть рамасть?
—Содаф ни коста, лавкаста.
—Ожу-ка, нинге фкя стопканя нюрьхтян,—мярьгсь Матрёна.—Ату мезе фкя стопканясь алянди.
—Хэ-хэ-хэ,—ревизорсь.—Панде, аф эряви сяда лама. Ату  иретьфтьсамасть, цифратнень шорясайне, аф стама кагод сёрмадан, кяжиятада лангозон.
—Сёрматт ни цебярь кагод, ату айдясамазь покодема вастстонк. Ков мольхтяма велеса работама.
Ревизорсь «хэ-хэ-хэ» да «хэ-хэ-хэ». Пеедезь и тусь.
—Матрёна, мес тяшкава весяла  инжиеньке?—кизефтезе Зина.
—А тонць аф шарьхкодьсак мес? Сялондомста васенцетама, а каваняма аф машттама. Бе да ме. А сон алясь ошень, лама цебярь вастса ульсь, аф минь лацонк паршихть каванякшнезь.
Тумдонза меле ушедсть шрань урядама. Матрёна никсазе сюлекать.
—Ожу-ка, Зина, симомбяленьконь вина шинецка аш.
Зина токафтозе кяленц, варжазе кяжинять.
—Афкукс, Матрёна, ведь. Вов тиеме тев, каваняськ инжиеньконь. Сясы кторды лангсонк.
—Тя лавкаса ни, што ли, васькафтомазь?
—Аха, лавкаса. Улихть тяса васькафтыхть. Кабинетонь урядайсь, Лужань Аксюсь, стопканкса эшис комоти.
—И вдь виде. А мон тянь квалма ашень арьсе. Кадыне сюлекать няеви вастс.
Сась Аксю кияксонь штама. Аватне цють аф сивода кундасзь.
—Виденцяк, инекуень потма, тон водканьконь мамайть?
Авась виденцясь. Простямасть, кле, пожалняста. Зарплатаста пандса питненц.
И тевсь ёфси аф пандомаса. Тиезень аватнень рахсема вастокс и цебярь.
Тя историясь рахсемакс и лядсь. А тяка жа Лямбоня велень администрациянь оцюнять Пипкин ялгать ёрасазь покодема вастста панемс. Сембе ой да вай, мезе лиссь Михаил Васильевичень мархта, кодама шта аф цебярь историяс повсь. А историясь сяка жа.
Михаил Васильевичень цёрац покоди Москуса следователькс. Аф генерал, конешна, но тевонь тиема-якафтома машты. Паронь пандомс кандсь кие-бди питни коньяк. Кле, омба масторста мянь ускф, аф кось-мось. Сюлекась, конешна, мазы, а мезе сюлекаса, кивок аф содасы.
Витёк каваняманц ускозе вели алянцты. Михала ванондсь, нолязень сельгонзон сюлекать лангс, а панжемс ужяленди арась.
—Лучи райононь оцюнять Ветрилкинонь каваняса,—мярьгсь цёранцты.
Лямбоня велеса оцю илаль. Ошста концерт мархта састь артистт. Сась колхозонь председательсь, школань директорсь, пуромсть райцентраста баярнят. Надияфнесь самс и Ветрилкин. Аф стак Пипкин ласькфтозе сюлеканц, путозе шрать лангс. Баярнятне эрекласть, ушедсть кзняфнема сельмоснон. Маматама, кле, тячи коньяконяда.
Пипкин учсь, учсь, ашезь учев Ветрилкин. Аньцек аделавсь илась, ласькозь столоваи. Фатязе сюлеканц, врхтадсь ушу.
—Тон ков, Василич?—пешкодсть мельганза.—Панчк сюлекацень, каваняйть баярня ялгатнень.
—Оду каванясайне. Тячи аф ся баярнятне састь.
Кие ктордсь лангсонза, а кие и кяжиясь.
Омбоцеда пуромсть Лямбоня вели колхозонь председательхне. Ветрилкин надияфнесь самс, но вастозонза кучезе Курташкин полафтыенц. Пипкин тага ашезе панже сюлеканц. Аф ся баярнятне.
Учевсь и ся шись, мзярда састь ся баярнятне. Тев мельге Лямбоня вели сась Ветрилкин, мархтонза ускозе образованиянь министрть Тучковонь. Анокласть шра. Шра лангс путозь Михалань коньяконц. Панжезь сюлекать, а эсонза кодамовок аф коньяк, а чай.
—Тон месть, Пипкин, рахсемс лангсонк ёрать?—цють  аф сивода кундазе Ветрилкин.
—Мон… мон…
—Тонць мамак ошксцень, пади, ёният. Визькс шама тиемайть Тучковонь ингольде.
А ся аньцек «хэ-хэ-хэ» лангозост да «хэ-хэ-хэ».
Ветрилкин сяшкава кяжиясь, што обедтонга атказась. Пипкинонь гразязе, аф алякс тиендеманкса, патте, кле, работаста. Вов и якай кафта пяли, васта эстеенза аф мушенды. Мярьгондсть баярня ялганза и панжемаль. Мезевок и афоль лисе. А тяни аф ся баярнятне, аф ся баярнятне.
Сембодонга пяк кенярдсть тя историяти ся баярнятне, конатнень ёразень аердамс Пипкин эсь сюлеканц мархта. Кулясь Ветрилкинонь каваняманц колга пачкодсь вишкста. Администрацияса сяка корхтамась:
—Кулить, маряйть, кода Пипкин оцю баярнятнень каванязень,—рахсесть финцне.
—Мамафтозень чайняда,—корхтасть омбонцне.—Мезеньге кальдяв тяса аш. А коньякта оду симдьсыне.
—Оду, пади, Ветрилкин шра ваксозонзовок аф озай, рахсема вастокс тиезе Тучковонь ингольде.
—Ветрилкин пара ломанць, курокста кяжец ётай. Тяньге юкстасы.
Пингонь ётазь тяфта и ули. А мзярс Пипкинонь сельминголензонга афолезе няе. Михаил Васильевич сонцьке старандай ётнемс вакска. Ату кяжембачк кати-мезе лиси. Видекс айдятядязь покодема вастстот, велеса лия работавок аф муви.
Илья Вешкин.

10.01.2019 №1
 
 
 

 
НОВОСТИ
 
 
 
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин