САРАНСКЯЙ ХУДОЖЕСТВЕННАЙ УЧИЛИЩАНЬ ПРЕПОДАВАТЕЛЬХНЕНЬ И СТУДЕНТТНЕНЬ ЩАМСНА ТУСТЬ СЕМБОНЬ МЯЛЬС

«Этно-Эрато 2018». Тяфтама лем каннесь национальнай костюмонь оцю модань Евразийскяй конкурссь, конань Гала-концертоц, а стане жа эсонза сяськихнень и лауреаттнень каземасна ётасть мелянь кизоть песта Москувонь Правительствать Оцю залсонза.
Конкурссь уленди эрь кизоня и пуропнесыне марс профессиональнай художникнень-модельерхнень, конат пялькстыхть фкя-фкянь мархта тяфтама номинациятнень коряс: «Инь цебярь восточнай костюмсь», «Финно-угорскяй нароттнень инь цебярь костюмсна», «Инь цебярь славянскяй костюмсь», «Конкурссь панчси од лепт», «Тяниень пингонь костюмса этническяй мотифне» и стак тов.
Общественнай тя проектсь кемокснесыне этнокультурнай общественнай объединениятнень, землячестватнень и национально-культурнай автономиятнень ёткса соткснень.
«Этно-Эрато 2018» национальнай костюмонь оцю модань Евразийскяй конкурсть ётафнесазь Национальносттнень Москувонь кудсна, «ЕврАзиянь аватнень форумсна» РОО-сь. Лезкс тя тевса максси Моску ошень Национальнай политикань и межрегиональнай сотксонь Департаментсь. Тядде конкурсть анокламаса примась  участия Евразиянь нароттнень Ассамблеясна.
Участникокс арась Россиянь пцтай ведьгемонь художник-модельер Дальняй Востокста сявомок Крымти молемс и омба масторста.
Мелянь декабрть песта ётась сяськихнень и лауреаттнень Гала-концертсна. Моску ошень Национальнай политикань и межрегиональнай сотксонь Департаментть руководителец В.И.Сучков азозе, што «Этно-Эрато» конкурсса примайхть участия Россиянь ичкозе эряма вастста ломаттне и СНГ-нь странатнень эзда.
Ульсть участникт Мордовияста. Москуву якась делегация Ф.В.Сычковонь лемса Саранскяй художественнай училищаста.
Кода азозе преподавательсь Светлана Сергеевна Тундавина, «Этно-Эрато» конкурсти синь аноклакшнесть сценическяй щапт Ю.А.Дыринонь живописнай произведениянзон мотивонзон коряс. Щамонь коллекциясь сатозе омбоце вастть вяре азф Евразийскяй конкурсса, «Этническяй инь цебярь сценическяй костюмсь» номинацияса. «Од Вирь» щамонь коллекциясь лиссь сяськикс тя пялькстомаса, теенза максфоль васенце вастсь. Костюпнень арьсезь и аноклазь Ф.В.Сычковонь лемса Саранскяй художественнай училищань декоративно-прикладной искусствань отделениянь   студенттне. Руководительсь—С.С.Тундавина, конструкторсь-технологсь И.В.Чудайкина. Синь азондыхть оцю спасиба Саранскяй художественнай училищать директоронцты Ю.А.Дыринонди Москуву якамста лезксонь максоманкса. «Этно-Эрато» конкурссь панчси од лепт. И пара, што ётксост земляконьке—Ф.В.Сычковонь лемса Саранскяй художественнай училищань преподавательхне и студенттне.
Конкурсти аноклаф щамснон дефиле лаца синь няфнезь Саранск ошень эряйхненди и инжихненди С.Д.Эрьзянь лемса музейса Мордовия Республикань Заслуженнай художникть Ю.А.Дыринонь «Мистерия зимних снов» выставканц панжемста.
Поздравляндасаськ Москуса «Этно-Эрато» конкурсса Мордовиять эзда сяськихнень оцю сатфксснон мархта!
Т.АЛЬШИНА.