Поиск по сайту: 
 

Архив
 февраль 
 2019 
пн вт ср чт пт сб вс
    123
45678910
11121314151617
18192021222324
25262728   

 
 

 

Ветеранам о ветеранах

ТЯДА ЮКСНЕ СИРЕНЯТНЕНЬ КОЛГА

Тяштемс тя заметкать кошардомань кафта од аватнень
мархта корхнемазе.
Весть васьфтине содафозень, од авать, кона сельмоведень пачк пеняцясь сире бабанц лангс. Семботь, кле, тисы эсь лацонза, оттнень аф кулхцондсыне и стак тов. Лац содаса, кода вятьсазь пряснон сиретне, сяс тейне тя од авась няевсь ужялькс. Но сядовок аф пароль кулемс бабать лемс тяфтама валхнень: «Мзярда ина сонь Шкабавазсь эсь ширезонза сявсы». Вдь сиренясь, улемок одкс, лядсь удавакс колма шаба мархта, касфтозень синь цебярь ломанькс и тячемс лезни аф оцю пенсиянц мархта уноконзонды. Но аф тейне судендамс од ломаттнень.
Омбоце корхнемазе стане жа ульсь од ава мархта, кона стама лямбоста азондсь эсь бабанц колга, нльне моньге ваймозе эжсь. Корхнеманьконь шумордамста сон мярьгсь: «Лама киза ни аш шиса кельгома бабазе, а мон тячемс мяляфтса сонь. Мяляфтса, кода понцень теенза сералхт и тиендень прическат, а сон аньцек весяласта рахсесь. Мяляфтсайне аф аньцек лямбе кядензон, нльне мяляфтса эрь сурнянц. Тейне сон тяфта аф сатни…»
Ня корхнемада меле ётась лама пинге, но тейне синь тячемс аф юкставихть. Седиезе ушеткшни сядовок вишкста шавома, мзярда лятфнеса эсь идькс пингозень. Минь ашель аф бабаньке, аф атяньке. Синь пяк рана тусть эряфста. А монь пяк мялезель, штоба синь улельхть маласон.
Шабравакс тейнек ульсь сире ава, конань вииста трнатсть кяденза и пряц. Оцюфне азонкшнезь, што сельминголенза керсезь мирденц и церанц, но кие тянь тиезе, аф мяляфтса. Тейнек оцю павазкс ульсь аннемс Поля бабань, лезнемс сембоса. Минь, шабатне, каннеме теенза ярхцамбяльхть, конатнень макссезь тядяньке-аляньке, тиендеме аруши комнатасонза, акшепнеськ стенатнень, шташендоськ киякснень.
А нинге ульсь Марина двоюроднай бабаньке. Сон эрясь цёранц семьянц мархта, коса синцень кафкса шабасноль, но сон примсемазь миньге. Кодама танцти лям пицекшнесь Марина баба! Сон фалу сатнекшнесь сембонди, хуш вастта шра ваксса кржаль и кой-кинди сашендовсь ярхцамс стяда ащезь. Тянь, мярьгат, кивок афи приметнезе, сембонди сиренять ширеса ульсь лямбе и пара. Мон аф весть эняльтькшнень родительненди сявомс Марина бабань эсь ширезонк, мзярда няендине, што кивок шабатнень эзда обжазе сонь. Пяк мялезель, штоба кудса учендолемань бабазе, и, сашендомок школаста, арьсекшнень, кода сон кармай каванямон, а мадома карша азонды тейне ёфкс.
Улема, сяс мон ламос аф юкстасайне бабатнень колга корхнематнень. Оцю мялезе, штоба шабатне кельголезь и шарьхкотькшнелезь эсь бабаснон и атяснон, конатненди аш мезевок уноконяснон коряс сяда питни. Кда аф поздна ни, гайфтеда теест, тяштеда. Вдь тя аф стака—фалу мяляфтомс колгаст и лезнемс теест.
Н.ГЛАДКИХ.

17.01.2019 №2
 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин