Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

ПЯЛЬКСТСТЬ МОКШЕНЬ И ЭРЗЯНЬ КЯЛЕНЬ И ЛИТЕРАТУРАНЬ СОДАЙХНЕ И КЕЛЬГИХНЕ

М.Е.Евсевьевонь лемса МГПИ-са
11-12 январьста Саранскяйса М.Е.Евсевьевонь лемса Мордовскяй государственнай педагогическяй институтть базанц видеса ётафтовсть Мордовскяй (мокшень, эрзянь) кяльть, родной (мокшень, эрзянь) кяльть и родной (мокшэрзянь) литературать коряс школаса тонафнихнень XXI Межрегиональнай олимпиадать республиканскяй этапоц, а стане жа татаронь кяльть и литературать коряс республиканскяй олимпиадась.
Мордовскяй государственнай педагогическяй институтть филологическяй факультетоц аф васенце кизось панчсесыне кенкшензон родной кялень и литературань кельгихненди и ванфтыхненди—Саранск ошень округонь и Мордовия Республикань сембе райоттнень школасост тонафниснонды, конат лиссть сяськикс олимпиадать муниципальнай этапсонза. Тядде конкурсонь участникокс арась 150 ломань.
Олимпиадать панжемаса примасть участия аф аньцек школаса тонафнихне, но и синь тядясна-алясна, учительсна, педагогическяй институтонь преподавательхне. Участникнень лемс приветствиянь валхт азсть филологическяй факультетонь деканць Л.В.Василькина, родной кялень и литературань кафедрань заведующайсь О.И.Налдеева, Мордовия Республикань Образованиянь министерствань Главнай специалистсь Н.В.Салмова. Олимпиадать етафтомста оцю лезкс макссть волонтёрхне—филологическяй факультетонь студенттне.
Олимпиадань ётафтыхне и участникне оцю мяльса корхнесть массовай информациянь средствань представительхнень мархта, макссесть теест интервьют.
Кода содавсь, участникнень эзда ламотне ерайхть поступамс педагогическяй институту. Тя олимпиадань сяськихнень и призерхнень МГПИ-в поступамста улихть преимуществасна. Мелянь кизонь олимпиадатнень ламоц сяськисна тонафнихть ни тя вузть филологическяй факультетсонза: Лямбирскяй муниципальнай райононь Пензяткань средняй школань шумордайсь Айлина Качкова, Ромодановскяй муниципальнай райононь Алтарскяй средняй школань шумордайсь Регина Илькаева, Рузаевскяй муниципальнай райононь Трускляй велень средняй школань шумордайсь Вера Маскаева и лиятне.
Тядде олимпиадань заданиятне салсесть мяль аф фкя лацонь ширеснон мархта. Тяфта, 3-7 классонь тонафнихне ся школатнень эзда, конатнень эса мокшень и эрзянь кяльхне тонафневихть кода государственнайхть, тисть тестт, полаткшнезь ушетф валрисьмотнень, тяштсть аф оцю азкс мокшень или эрзянь кяльса и стак тов.
9-11 класса тонафнихне оцю мяльса пялькстсть родной (татаронь) кяльть и литературать содамаса.
М.Е.Евсевьевонь лемса Мордовскяй государственнай педагогическяй институтсь олимпиадань ётафтома вастокс кочкаф аф стак. Тя вузса лама киза мельцек улендихть оцю пуромкст, тяса работай преподавательхнень пяк козят и крхкат научно-методическяй содамошисна. Тяда башка, тяниень пингть эряви тиемс воспитандамань од методикат, конат тисазь семботь национальнай культурать ванфтоманц инкса, путыхть ушеткс этническяй самоидентификацияти. Тянь коряс оцю тев мольфти педагогическяй институтонь филологическяй факультетсь. Сонь лангсонза ащи оцю ответственность мокшэрзятнень и татархнень эсь лацонь культураснон, кяльснон и койснон ванфтомаснон и виияфтомаснон инкса.
Т.ВЛАДИМИРОВА.
 

18.01.2019 №
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин