Школась—велеть шамаликоц, ваймоц

Шавшиста, 9 апрельста, Мордовия Республикань Пресс-центраса ётась пресс-конференция, коса примасть участия МР-ть эзга РФ-нь МЧС-нь, республиканскяй аварийно-спасательнай службань представительхне. Корхтамась мольфтевсь тундань шадотненди республикать анокшинц колга.
Кода азозе МР-ть эзга РФ-нь МЧС-нь главнай управлениянь ведень       объекттнень лангса ломаттнень безопасностьснон коряс отделть начальникоц А.В.Романов, тундань шадотне тядде пелькс аф эвондафнихть. Эйсь пцтай сембе ляйхнень лангса солась ни, ведсь эсост кеподсь аньцек аф ламода. Пелькс вастокс мзярс лядондыхть эрьхкне и пруттне, сяс мес синь лангсост нинге ванфневи шуваня эйсь.

2 апрельста Мордовиянь Оцюнясь В.Д.Волков ульсь Н.П.Огаревонь лемса      МГУ-са, коса ванозе лекарственнай средствань технологиянь учебно-научнай лабораториять и корхнесь од ученайхнень и студенттнень мархта.
Лекарственнай средствань технологиянь учебно-научнай лабораториясь панчфоль Физикань и химиянь институтть видеса 2019 кизоня университетть и «Биохимик» АО-ть марстонь вийса. Тянкса нолдафоль пцтай 4 миллиотт цалковай (фкя миллион цалковайсь—предприятиять). Лабораториясь козякофтф тяниень пингонь оборудованияса, кона максси возможность етафнемс аф аньцек учебнай занятият, но и фармацевтическяй субстанциятнень и анок лекарственнай форматнень технологияснон анокламанц коряс научнай исследованият. Лабораторияса студенттненди ули кода пяшкодемс лекарственнай препараттнень производстваснон действующай веществать синтезонц эзда сявомок анок продукцияти молемс. Лиякс мярьгомс, тевса варчсесазь университетса получаф содамошитнень.

«Мокшень правдать» лувиензонды
Кельгома ялгат! 1 апрельста ушедсь 2019 кизоть омбоце пяленцты газетас и журналс, тяконь лувксса «Мокшень правда» родной кяльса-валса лисенди газетаньконди, сёрматфтомась.
Кафта кизода меле топоди 100 киза ёт кармась лисендема минь тинь мархтонт кельгома мокшень газетаньке. Сон лама лездсь эсь народонцты. Васенце номерстокиге лувихне газетать эзда няйсть пара ялга, тонафты, виень и содамошинь максси. Газетась лама тись национальнай культураньконь, кяленьконь кеподемаса-виияфтомаса, эсь лацонь коеньконь ванфтомаса, народоньконь духовнай козяшинзон азондомаса.
И тянивок сон эсь васень задачанц няйсы сянь эзда, штоба лездомс тейнек, мокшетненди, ванфтомс и виияфнемс родной кяленьконь, культураньконь, касфнемс национальнай самосознанияньконь и гордостеньконь.

Ёткшиста, 6 апрельста, Саранскяи рабочай поездка мархта сашендсь Российскяй Федерациянь просвещениянь министрть заместителец Т.Ю.Синюгина. Татьяна Юрьевна примась участия историять коряс школьниконь Всероссийскяй олимпиадать заключительнай  этапонц панжемаса, кона ётась И.М.Яушевонь лемса Государственнай музыкальнай театраса, а стане жа марса МР-нь Правительствать Председателенц заместителенц Г.А.Лотвановать и Мордовиянь образованиянь министрть Г.А.Явкинать мархта ванозень Саранскяень кой-кона образовательнай организациятнень.

29 мартста Саранскяйса Н.П.Огарёвонь лемса Мордовскяй государственнай университетть Культурань и искусствань Дворецсонза панжевсь «Адмирал Фёдор Ушаков:  уроки истории  и вызовы современности» лем ала Всероссийскяй научно-практическяй конференциясь, конань эса примасть участия Мордовия Республикань и Россиянь образовательнай и культурнай учреждениятнень, общественнай организациятнень специалистсна.
Аноклазь и ётафтозь вяре азф конференциять «Путь к знаниям» Научно-просветительскяй центрась, Н.П.Огарёвонь лемса Мордовскяй государственнай университетсь, М.Е.Евсевьевонь лемса Мордовскяй государственнай педагогическяй институтсь.