Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

РОШТУВАНЬ КУД

  Роштувань Сочельниконь шиста, 6-це январьста, уликс койть коряс, велень шабатне  иляденди щашендыхть лангозост национальнай щапт и якайхть калядама Левжа велеть эзга. Эрь кудса ломаттне весяласта и пара мяльса васьфнесазь и кулхцондсазь калядайхнень мороснон, каванякшнесазь танцтиняса, макссихть ярмакт или конфетат. Роштувань шиста, 7-це январьста, велень ломаттне пуромкшнихть Культурань куду Роштувань куд илань етафтома. Эрь кизоня илась етни эсь лацонза, весяласта. Культурань куду пуромкшнихть велень эряйхне, да и аф аньцек эсь велень, сашендыхть лия велеста, Рузаевка ошста инжихть. Тядде, Роштувань кудса пуромфнень каванязь пачаса, пярякаса и кургоняса. Меле ушедсь концерт, конань пингста сценать лангса кайгсть «Ару лихтибря» народнай фольклорнай коллективть, а стане жа «Пайгонят» идень образцовай коллективть моросна. Морась Рузаевскяй райононь Огарево велеста «Мокшаночка» народнай коллективсь, Лямбирскяй райононь «Пизелнэ» ансамбльсь, а Рузаевскяй райононь Татаронь Пишля велеста гармонистсь Равиль Кулаев и Левжа велень гармонистсь Вячеслав Порватов кштифтезь и морафтозь Культурань куду пуромфнень гармониять коряс. Поздравляндамань валхт азсь Мордовия Республикань Рузаевскяй райононь социальнай кизефкснень коряс оцюнять заместителец О.П.Костровась. Ольга Петровна азсь оцю спасиба Левжа велень эряйхненди, сяс мес ванфтсазь национальнай обуцяснон, койснон.
Роштувань кудса ломаттне пуромкшнесть Роштувань хороводс, кштисть, морасть сиде моронят, няезь сотцематнень, конат етнихть Роштуваста сявомок и Кльхчяняти молемс. Велень эряйхнень пароль мялезост, што Левжа велеса ули тяфтама цебярь кой, коса велень сембе эряйхне кочксевихть марс.
М.Учватова.
 

07.02.2019 №5
 
 
 

 
НОВОСТИ
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин