Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Национальная тематика

МАЗЫХТЬ МОКШЕНЬ СТИРЕНЬКЕ

Мастор лангса лама мазы стирьда, но мокшень стирьхнень лаца удалафта кржа. Виде ронгсна, валда менель лаца ару ванфсна, кайги вайгяльсна, мярьгат, пайгоня, трвасна якстерьхть, ёфси кстынят… Аф топодят ваномс лангозост! Кельгсазь мокшень стирьхне покодемаснон, сафтсазь эрь кодама тевса. Мезьс афольхть кярьмоде, сембось стиреньконди тиевомшка. И пидихть-панихть, и штайхть-муськихть, и стайхть-кодайхть, и кштийхть-морайхть. Газетаньконь тячиень номерсонза азонттама асу мокшень стирть—Татьяна Лафуткинать колга, конанди пяк ладяйхть вяре азф валхне.   Шачсь Таня Торбеевскяй райононь Салазгорь велеса, кона тя аймакса лувондови фкя инь оцюкс. Шабакс пингстокиге няевсь, што Таня тевонь кельги. Кудса лездсь стане, нльне кельгома тядянцты тевге ашезь лядонда. Кота кизоса ни маштсь модамарень чистендама, а аф ламода касомок, ушедсь каванякшнема семьяснон танцти ярхцамбяльса. Тянивок, кда саят пялонза инжикс, меки вачеда аф туят. Школаса Таня Лафуткинать  лятфнесазь пара валса. Старандась, тонафнесь цебярьста, сембоса ульсь васенцетнень ёткса. Сидеста примсесь участия творческяй конкурснень эса. Таня пяк лац морай, вайгялец кайги, ару. Морай рузонь, мокшень морот, но мекольцетне теенза сядовок малат. Стирсь арьси, што мокшень моротне сембода мазыхне, токасазь ломанть седиенц. Но аф аньцек горняй пайгоня лаца вайгяльса казезе Шкабавазсь Танять. Оцю сонь асувоц и тяштемань тевса. Сон тяшти стихотвореният, азкст, ёфкст. Эсь тяштьф моронзон, конат лемтьфт кельгомати, ялгаксшити, стирсь морсесыне гитарать корява.
Идькс пингста сон арьсекшнесь мялень салай ёфкскат, ёмла стихотвореният, тяшнезень синь тетрадезонза. Сяльде кой-конатнень кармась кучсемост «Торбеевские новости» районнай газетав и «Мокша» журналу. Ламоть тяштьфонц эзда Таня Лафуткина лемнесы кельгома тядянцты, тяконь лувксса «Спасиба, тядят!» стихотворениять:
Спасиба, тядят, лямбе
седить инкса!
Тинь ётафнесасть арьсемаса веть,
 Иднятнень инкса пичеттяда, и синь
инксост
Путтада седи. Макстада совет
 Эрь тевсост. И эрь
озондомась инксост
Синь павазшиснон
колга.
Шумбраши Синдеест анатада,
 кенярттяда инксост
Катк эряфсост Шкайсь максы валда кит.
 Спасиба, тядят, валда эряфть инкса!
 Сюкпря тиндеенть!
 Кеме шумбраши!
Тячиень героиняньконь аф емлат сатфксонза спортса.Варжазе прянц пцтай сембоса: теннисса, дартсса, волейболса, ласькомаса и спортонь лия виттнень эса. Кельгсы соксса и конькаса курькснеманц. Аф весть примсесь участия пялькстоматнень эса, коса занцесь призовой вастт. Татьяна Лафуткинась лямбе седи, пара вайме ломань, кельгсы лезнемс лиятненди. Стирсь заняф волонтеронь тевса. Школаса поисковай отрядть лувксса якась велева и лезнесь сире бабатненди-атятненди. Тя арась теенза эсь лацонь койкс, сон мзярдовок аф ётай зиянц повфть вакска, путсыне сембе виензон лездоманкса.
Тяни Таня касфнесыне содамошинзон Н.П.Огаревонь лемса Мордовскяй госуниверситетонь филологическяй факультетса. Тонафнесыне мокшень и рузонь кяльхнень. Университетса тонафни лац, тонафтыенза фалу шнайхть эсонза. Тясовок прянц няфнесы активисткакс: примси участия конкурснень эса, морси «Нармоннят» фольклорнай вокальнай коллективса. Сонь ули мялец—арамс пара учителькс и лама цебярьда кандомс эсь шачема масторонцты.
К.САЙГУТИНА.
 

07.02.2019 №5
 
 
 

 
НОВОСТИ
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин