Поиск по сайту: 
 

Архив
 июнь 
 2019 
пн вт ср чт пт сб вс
     12
3456789
10111213141516
17181920212223
24252627282930

 
 

 

Наши мокшанские сыновья и дочери

СТИХОНЗА ЭЖДИХТЬ ВАЙМЕ

Минь газетаньконь лувиензонды лац содаф мокшень поэтессать Полина Алешинать лемоц. Сонь стихонза ламоксть ни печатлакшневсть «Мокшень правдаса». Синь кельговихть сембонди, сяс мес сёрматфт мокшень ару и образнай кяльса-валса. Сонь поэзияц мала лувити, лац шарьхкодеви. Полина Алешинать стихонза аф аньцек сонь, поэтть, эряфонц, мялензон-арьсеманзон колга, но и мокшень ломаттнень мяльснон-кенярдемаснон, пичефксснон колга. Эсьотям саят мяльс, мзярда лувсайть Полина Владимировнань седиень токай стихонзон: минь тежятть киза эряме и карматама эряма тя модать лангса, кда улихть тяфтама ломаненьке, поэтоньке, конат сембе эсь вийснон, ваймоснон путнесазь сембе минценнеть, мокшэрзяннеть ванфтоманц и виияфтоманц инкса. Нюрьхкяняста лятфтасаськ: Полина Алешинась шачсь-кассь Ковылкинскяй райононь Ежка велеса оцю семьяса. Тястонь средняй школать аделамда меле тонафнесь  Н.П.Огаревонь лемса Мордовскяй госуниверситетонь филологическяй факультетса. Высшай образованиянь получамда меле оцю мяльса кярьмодсь педагогическяй тевти. Нильгемонь киза эсь эряфстонза Полина Владимировна макссь Ковылкинань 6№ СПТУ-ти (тяни колледж). Тя кувака пингста тись лама, пуроптсь козя опыт. Училищаса тонафнихнень мархта панчсь музей—«Мокшень куд», коса тежяньда лама экспонат: севонень кядьгонят, мокшень щапт, ингольдень самовархт и стак тов. Пуроптсь училищать видеса фольклорнай ансамбль. Педагогическяй и воспитательнай тевса оцю сатфкснень инкса П.В.Алешинась казьфоль аф кржа казнеса. Сон Мордовия Республикань образованиянь Заслуженнай работник, Россиянь начальнай профессиональнай образованиянь почетнай работник, педагогическяй трудонь ветеран. Сяльде Полина Владимировна тонафтсь студентт Н.П.Огаревонь лемса МГУ-нь Ковылкинскяй филиалса. Содамошинь макссемада башка, кода и инголи, оцю мяль шарфнесь од ломаттнень патриотическяй воспитанияснонды, национальнай культурати. Кода  поэтесса, общественнай деятель, Алешинась эрь кизоня етафни колмогемоньда лама творческяй васедема. Сидеста уленди республикань райоттнень и велетнень эса. Сонь кенярдезь васьфнесазь эсь райононь Герасимовка, Порапа, Волгапино, Сире Пшень, Троця, Рыбкино  и ламоц лия велетнень, Ковылкина ошень школатнень эса. Эрь выступлениядонза меле ломаттне пуромкшнихть перьфканза и азонкшнихть теенза седиста моли лама валда. Стане жа аф шуроста уленди Инсарскяй районца, Саранскяйса, Пензаса, Оренбургса, Москуса, лия вастова и пара мяльса выступандакшни тостонь эряйхнень инголе. И синьге васьфнесазь пяк  лямбоста и спасибайхть творчестванц инкса. Тияк азсаськ, што поэтессать ламоц стихонза етафтфт эстонскяй, венгерскяй, финскяй, карельскяй и лия кяльс. И тя сяс, мес Полина Владимировнань стихонза киньге аф кадондсазь озадонь седихть ащема, кандыхть эсь мархтост тядянь лямбе и кельгома. Синь ащихть сембонди тейнек седиень и ваймонь эжди толнякс.  
 
Седисот аш тейне васта
Аф удан веньберьф:
 
учан ни кода
Васедемс тонь
мархтот, улемс
                       марса,
Тон тянь колга
 мезевок аф содат,
 Тон тянь колга
 мезевок аф арьсят.
  Прясон сяка мяльсь. 
 Аш кода панемс,
Виздезь маланязт
 монць ожу шаштан,
 Лангозон аф варжакстат,
 аф ванат.
Седисот аш тейне,
 вдна, васта.
  Няйхте, аньцек сельмованф
тейть казян,
Ётамбачк цють лоткан ваксозт—
сави,
Аньцек, кода келькте, сянь аф азан,
 Кода инксот  седиезе палы.
  Тоньфтомот тейне кода
 эрямс—кати?..
Кода тейне павазукс най улемс?
 Ёфси тонь юкстамс
ни сяда курок,
Но сянь тиемс виезе
аф саты.
А ульцяса конашкава
шобда,
Сельмоведьса шамазень мон
 штайне.
 Салаване, Шкайти
 аньцек содаф,
 Ламос валда тяшттнень
 лувондсайне.

 

07.02.2019 №5
 
 
 

 
НОВОСТИ
 
 
 

«Рузаевкаса мольфтевихть анокламатне стекольнай заводть панжеманцты»

Мордовиянь Оцюнясь Владимир Волков:
Мордовиянь Оцюнясь Владимир Волков 29 майста ётафтсь рабочай васедема Рузаевскяй райононь руководительть Вячеслав Кормилицынонь мархта. Ванондовсть территориять социально-экономическяй виияфтоманц коряс кизефксне. Тяконь лувксса корхтамась мольфтевсь социальнай объекттнень строямаснонды анокламать колга: Рузаевкаса Паровознай ульцяса 160 вастонди идень садть, Татаронь Пишляса 250 вастонди школать, фельдшерско-акушерскяй пункттнень.
Ванондовсть районца водоснабжениянь и водоотведениянь систематнень одкстоптомаснон, а стане жа «Безопасные и качественные автомобильные дороги» национальнай проектть эряфс ётафтоманц рамкаса китнень строямаснон и петемаснон коряс кизефксне. Тядде, кода отмечазе Вячеслав Кормилицын, петевихть-одкстоптовихть 13 вайгяльбень кувалмоса кит.
06.06.2019  № 22
 

Аделсеви «Мокшень правдати» сёрматфтомась

Эряскодода!
Кельгома ялгат!
2019 кизоть омбоце пяленцты «Мокшень правдати» сёрматфтомать шумордамс ляткшни аньцек кафта недялят.  И ули тячи мяленьке нинге весть азомс нюрьхкяняста: мес именна «Мокшень правда» эряви тинь семьянтенди.
Кода аф ужяль, мокшэрзятнень лувкссна стаки кири. А «Мокшень правдась» семботь тиендьсы сянкса, штоба аф нолдамс тянь. Кода ванфтомс и виияфтомс кяленьконь, культураньконь, аф юкстамс эсь коеньконь-обуцяньконь—вов мезть колга мольфтеви корхтамась сонь лопанянзон эса. Пцтай эрь номерса макссевихть материалхт мокшэрзятнень историяснон, содаф ломаньцнон колга, азонкшневи народоньконь арьсеманзон и пичефксонзон колга.
«Мокшень правдаса» макссевихть медицинскяй темас советт и рекомендацият, советт перень сёронь касфнихненди и жувата мельге якайхненди. Эрь номерса ули юморонь и сатирань уженя, рузонь кяльса печатлакшневихть недялянди ламоц телевизионнай программатне.
«Мокшень правдась» республиканскяй газетатнень эзда фкя инь интереснай и уцез газетась. Сон нльне сяда уцез ламоц «районкатнень» коряс.
Теенза тяшфтемать питнец:
6 ковонди—336 цалковай,
3 ковонди—168 цалковай.
Газетать индексоц П4719.
 Эряскодода почтав. Тоса учихть эсонт. Пингсь содай ётаманц.
06.06.2019  № 22
 
 
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин