Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

В Правительстве РМ

ВЛАДИМИР ВОЛКОВ ВАСЕТЬКШНЕСЬ ТОРБЕЕВСКЯЙ РАЙОНОНЬ ОЦЮНЯТЬ МАРХТА

      Владимир Волков васетькшнесь Торбеевскяй муниципальнай райононь оцюнять Сергей Шичкинонь мархта. Ванондовсть территориять социально-экономическяй виияфтоманц коряс кизефксне, 2018 кизонь итокне, районть виияфтоманц коряс платтне.
     Сергей Шичкин азондсь региононь руководительти Торбеевскяй районть мелянь сатфксонзон колга. «Касома няеви пцтай сембе основной показательхнень коряс—собственнай дохоттнень уровеньцнон, эряма вастонь строямать коряс—прибавась 4,8 процентта етай кизонь уровенти, заработнай платать коряс—районть эзга средняйста 28 тёжянь цалковайда лама». Ульсь отмечаф, што эряма вастонь строямань показательть касомац 7,5 тёжянь квадратнай метрати молемс сатовсь индивидуальнай эряма вастонь строямать виияфтоманц инкса. «Районца тифт кафта оцю площадкат ИЖС-нь строямс Торбеевать и Дракинать ваксса—ня участкатнень минь карматама ноляма тевс и сяда товолдонь кизотнень. Строямась тоса мольфтеви ни активнайста и ули цебярь ушеткс маластонь кемонь кизотнень тя площадьса эряма вастонь строямать касфтоманкса. Сергей Шичкин эняльдсь лездомс республикань Оцюняти строяви площадкатнень эзда фкяти кинь инфраструктурань тиемаса. Владимир Волков надияфтсь максомс лезкс дорожнай проектть эряфс етафтомаса.
     
Васедемаса корхтамать пингста Сергей Шичкин спасибась Мордовиянь Оцюняти накаснень пяшкодеманкса, конат сашендсть региононь руководительть лемс райононь эряйхнень эзда. Тя—Торбеево поселкать эзда Кажлодка велети молемс кить строямац и Дракино велеса од школань строямась. Кить строямац ушедови лямботнень самаснон мархта, а школать строяманкса районти нолдави 66 миллион цалковай тядде и 111 миллион цалковай сай кизоня.  
        «2018 кизоня аделафт кафта оцю социальнай объектт—частнай-государственнай партнерствать рамкаса марса «Талина» агрохолдингть мархта строясть эень панжада корт Салазгорь велень эряйхненди—свет, цебярь покрытиянь, сембе эрявикс инфраструктурань мархта. Площадкась ноляви тевс пцтай сутканьберьф, и иттне, и оцюфне пяк довольнайхть»,—мярьгсь Сергей Шичкин. Тяда башка,  Торбееваса капитальнайста петьф Горькаень лемса культурань и ваймамань парксь—тяни тяса ваймаманди, районнай праздникнень ётафтомаснонды, творческяй коллектифнень выступандамаснонды улихть тяниень пингонь условият. Несколька киза мельцек районнай власттне эрь кизоня сявондихть эсь лангозост районнай идень садикнень реконструкцияснон и петемаснон коряс обязательстват. Тяфта петьфтольхть идень саттне Жуково велеса и Красноармейскяй поселкаса, планца тядде—анокламс идень садонь группать Салазгорьса. Владимир Волков мярьгсь, што райононь эряйхненди пяк важна тиемс аф аньцек трудонди условият, но и тяниень пингонь соцкультбытонь сфераса—аф сяда кальдяфт ошть коряс! «Тя, конешна, лезды цебярьгофтомс районть демографическяй показателензон»,—мярьгсь республикань Оцюнясь.  
 

14.02.2019 №6
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин