Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Как жили и живут мокшане

Саргась

Кафксошка вайгяльбень вастса Сире Шайгавть—райцентрать эзда срафтозень эсь ульцянзон мокшень велесь—Саргась. Велесь аф оцю, но мокшэрзянь крайсонк сон лац содаф, колганза моли пара слава. И тя сяс, мес тяса шачсь-кассь лама талантливай, пси седи, тевонь кельги и тевонь содай ломаньда, кит тиезь и тиендьсазь эсь велеснон сяда содафокс и кельговикс. Синь етксост улихть разнай рангонь руководительхть, ученайхть, писательхть, педагокт, журналистт, врачт, агронопт, инженерхт, лия специалистт.
Мзярдонга, кепотьксонди, аф юкставихть лемсна Алексей Степанович Чалдаевонь и  Иван Петрович Алямкинонь. Кафцьке синь занцесть служебнай оцю должностть, тисть лама цебярь тевда эсь республикаснонды, кадсть эсь колгаст цебярь лятфнемат. Алексей Степанович лама киза ульсь КПСС-нь Мордовскяй обкомонь секретарькс и республикань народнай контролень комитетти председателькс, Иван Петрович—партиянь райкомонь омбоце секретарькс, Болдовскяй, Инсарскяй, Рузаевскяй районнай исполкомтненди председателькс, Мордовскяй   АССР-нь Верховнай Советть Президиумса организационнай отделти заведующайкс.
 
Гордостень марязь велеряйхне кунцесазь эсь землякснон А.В.Пьянзинонь лемонц. Сон занцесь пяк ответственнай должность, ульсь пароходствать видеса Дальневосточнай спутниковай космическяй связень радиостанцияса начальникокс. Кода аф ужяль, аф кунара Анатолий Викторович тусь эряфста.
 
Аш кода аф лятфтамс ученайхнень, вузонь преподавательхнень. Нят—Н.П.Огаревонь лемса Мордовскяй      госуниверситетонь профессорсь Н.С.Алямкин, васенце рангонь капитанць, военнай наукань кандидатсь М.П.Пьянзин, наукань кандидатсь , Тимирязевонь лемса велень хозяйствань академиянь преподавательсь А.Ф.Чалдаева.
Аньцек пара валхт можна азомс тястонь писательхнень—Г.А.Пьянзинонь и Ф.Ф.Пьянзинонь колга. Синь пераснон алда лиссь лама талантливай, седиень токай произведенияда. Коль сяда и сяда содафокс и кельговикс арси поэтессать Р.К.Орловать творчествац. Сонь кайги вайгялец пачкотькшни аф аньцек эсь мокшень ломаненьконди, лама стихоц етафтф рузонь, лия кяльс.
 
Саргать колга азондомста аш кода аф лятфтамс велень хорть колга, конань колга славась мольсь 50-60 кизотнень. Хорсь лисендсь сяськикс республиканскяй и межзональнай конкурснень эса. Саргань мокшень аватненди и стирьхненди максфоль оцю честь выступандамс нльне Москуса, странань Кремлевскяй дворецса, М.В.Ломоносовонь лемса Московскяй      госуниверситетса. Столицастонк мрдасть лауреатокс. Хорсь няфтезе эсь маштомошинц и омба масторса—Польшаса. Оцю оценка макссть выступлениянцты Варшавань эряйхне.
 
Лиякс мярьгомс, Саргати ули мезьса шнафтомс пря, ули кинь инкса марямс гордость.
А мзярда и кода эвондась сонць Саргась?
 
Мзярда стяшенды кизефкссь тянь колга, велеряйхне лятфнесазь тястонь краеведть Ф.И.Пьянзинонь азксонц. Федор Иванович корхнесь, што атянь атянц семьяц и нинге кафта семьят састь тяза Лемдяй велеста. Од вастсь мялезост тусь: перьфпяльге вирь, зверьда эсонза лама. Ляйнять ваксса шяйса пефтомоль яксяркта, хуш байдекса шавондыть.
 
Алятне васенда ерасть строямс сяда вярьгак вастс, но кармасть шувома эши—ведь аш. Савсь теест валгомс ляйнять трвас, косьфтамс шяйть и путомс кутт.
 
Саргать шачема пингокс лувондови 18 векть омбоце пялец. Сонь эряенза ульсть государственнай крестьятт и сембе ярмаконь и натуральнай налокнень паннезь государственнай имуществань ведомствати. Крепостной правать полафтомда инголе синь ульсть серматфт Починковскяй алашань заводти и сембе ярмаконь и натуральнай налокне макссевсть тоза.
 
1870 кизоти самс велень эряйхне сувсесть Лемдяень церькаву, а 1870 кизоня синь ульсть етафтфт Леткань церькавти, коза сувсесть 1924 кизоти. Тя пингоня Саргаса путфоль шуфтонь аф оцю церькавня (Покровскяй).
 
Эрясть Саргаса аф пяк ашуста и аф пяк козяста. Ломаттне кельгозь модать и, хуш тястонь васттне ульсть  ляюфт, соксесть паксят, касфнесть серот. Тяда башка, ламотне заняфтольхть кустарнай промысласа. Велеть маласа тянемс таргави тумонь вирь. Сон кафта ширде перясы велеть, араласы якшама ширдень и западнай варматнень эзда.
 
Революцияда инголе Саргаса сяда кемоньшка кудоль, вельхтяфтольхть шужярьса. Аньцек ниле кудазорхт добувакшнесть жесть. 1932 кизоня велеса пуроптфоль колхоз, кочкафоль актив. Васенце активистокс ульсть Григорий Петрович Алямкин, Федор Федорович Алямкин и лиятне.
 
Финц велеряйхне работасть колхознай фермаса, омбонцне—паксяса. Тяда башка, ульсь тяса промартельге. Ащесь мазы вастса, оцю прудонь ваксса. Афкуксонь мастерхт покодсть тоса. Синь аноклакшнесть алашань нуртт, крандаст, дрогат, догат, шарыхть, парьнят, лия парши. Конашкава эрявсть синь эста. А аньцек эста ли? Тянивок теест вешфкссь аф емла. Сяка тев кулят: «Коста ба рамамс хуш фкя крандаскя или нурда?» Но мумс тяни пяк и пяк стака. Ашет синь, юкстаф тя тевське.
 
А эста власттнень мархта инголькиге лац-ряц апак арьсек, васенда селкфоль      промартельсь, а сяльде срафтфоль-калафтфоль колхозське. Месендема? Коза тумс? Ня кизефксне оржаста стясть велеряйхнень инголи. Васенда кармасть тушендома оттне, а мельгаст сяда эряфкшуфневок семьянь-семьянь. Финцне мусть эряма васта Саратовскяй областьса, омбонцне—Куйбышевскяйса (тяни Самарскяй), колмоцетне—Саранскяйса, райцентраса-коса. Шамсь велесь, лядсть тяза аньцек сят, кинди аш коза тумс, сиредсть.
 
Фкя пингть Саргать и сонь перьфканза ащи модатнень сявондезень арендас Саранскяй автотранспортнай пассажирскяй 1№ предприятиясь. Кой-мезе тиендевсь тяса  эряфть живолгофтоманкса, но сяда ичкози тевсь ашезь ту. Кода корхнихть, юмафтфть мрдафтомац пяк и пяк стака.
Но сембе сяка, тяза лятф велеряйхнень седиса-ваймоса ули нинге аф оцю надияма, што кельгома Сарга велесна аф юмай-арай. Кой-кодама цебярь лисьфкат улихть ни. Строявихть кафта од кутт. Рамсевихть кой-кона ташта куттне, штоба вастозост путомс отт.
 
                                                                                                                                            И.ЛУШКИН.  
 

Мокшень велетнень историяста
21.02.2019 №7
 
 
 

 
НОВОСТИ
 
 

ВЛАДИМИР ВОЛКОВ примась участия РФ-нь Правительствать вице-премьеронц Виталий Мутконь председательстванц ала совещанияса

14 майста Мордовиянь Оцюнясь Владимир Волков примась участия совещанияса, конань видеоконференциянь лаца ётафтозе РФ-нь Правительствань вице-премьерсь Виталий Мутко. Совещаниянь основной кизефксокс арасть уштомань пингонь ётай кизонь итокне.

 


Виталий Мутко отмечазе: ся региоттнень эса, коса губернаторхне шарфнихть башка мяль тя темати, сезонць ётась тапорксфтома. Но марнек,   ЖКХ-нь объекттнень эса чрезвычайнай ситуациянь лувкссь кассь, и главнай туфталсь—сеттнень таштомомасна. Вице-премьерсь отмечазе, што сай кизоста сявомок арьсекшневи нолдамс коммунальнай инфраструктурать, кона 60 процентта таштомсь, одкстоптоманц коряс федеральнай программать. Сяс региоттненди эряви максомс  РФ-нь Минстрои тяфтама объекттнень и капитальнай вложениятнень размерснон коряс, конат эрявихть тиемс нормативно-техническяй вешфксненди кондястикс, педа-пес кочкаф информация.

24.05.2019
 

Сёрматфтода «Мокшень правда» уцез (льготнай) питнеса

24.05.2019
 
 
 
 
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин