Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Письма из села

ИСАВЕЛЕСЬ ТЯЧИ

—Тячиень шити минь велесонк эряй 200 малава ломань,—азонды Исавелень администрациянь ведущай специалистсь И.А.Кижаева.—Школаса тонафни 42 шаба, кой-конат эздост тяза усксевихть шабрань велетнень эзда. Минь велесонк тифт сембе условиятне работамс, эрямс, трямс итть, якамс спортивнай залу эрь кодама секцияс, анокламс и няфнемс концертт. Аньцек аф кунара тяса ётафтовсть футболса зональнай пялькстомат, коса примасть участия командат и лама лия райоттнень эзда. Пялькстоматне лемтьфтольхть велень Почётнай ломанти Николай Иванович Меркушкинонди. Спортивнай илас пуромкшнесть сядода лама участник, велеряйхть, ширеста саф инжихть.
 
 Ёфси аф кунара велеса панчф идень сад, коса заведующайкс покоди эсь тевонь кельги авась Мария Ивановна Чумбаевась и од воспитательсь Наталья Михайловна Кудряшовась. Тячиень шити садику якай велень кемгафтува идь. Маластонь пингть синь лувкссна касы, улихть велеса стама ават, конатнень аделсеви декретнай отпусксна. Идень садса улихть сембе условиятне, штоба шабатне касольхть павазуста, шумбраста, эсь пингстонза анневольхть, мархтост ётафневольхть эрь кодама занятият, праздниконь утренникт.
 
Лама шнама валда велеряйхне азондыхть од специалистть, фельдшерть Виктор Павлович Бузаковонь колга. Вели сон сась семьянц мархта кафта кизода инголе. Велень администрациясь саф семьяти макссь од квартираста панжемат, лездсь мебелень рамамать  мархта, лия социальнай кизефксонь пяшкодемаса. Виктор Бузаковонди аньцек 25 киза, сон аделазе Саранск ошень медицинскяй колледжть, тяни етай курст, тонафни Н.П.Огарёвонь лемса госуниверситетонь медицинскяй институтса. Мялец од алять нолдамс Исавелеса кеме юрхт, эсь содамошинзон няфнемс эрь шинь работаса, лездомс велеряйхнень шумбрашиснон кемокстамаса. Катк сонь мяленза-арьсеманза ётафтовихть эряфс.
 
                                                                                                        Н.ЛОБАНОВ. Фототне авторть.
 

28.02.2019 №8
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин