Поиск по сайту: 
 

Архив
 май 
 2019 
пн вт ср чт пт сб вс
  12345
6789101112
13141516171819
20212223242526
2728293031  

 
 

 

Национальная тематика

КАТК СЯДА ТОВГА КАЙГИХТЬ «МОКШАВАНЯТЬ» МОРОНЗА

Сире Синдрунь ансамбльсь вятьсы эсь историянц кунардонь пинкнень эзда, мзярда аньцек панчсевсть куттне-читальнятне и якстерь уженятне. Тоса и кочксевсть мокшаватне, морсесть мокшень морот, мокшень ломаттнень колга сиде моронят.
 
Савор-савор мокшавань коллективсь кассь оцю хорс, коса меле ни морсесть аф аньцек мокшень фольклорнай, но и патриотическяй морот, конатнень мархта кепсезь ломаттнень мяльснон покодемс.
 
Пингсь мольсь, мархтонза полафнесь коллективть составоц. Но кие афоль са ансамбльти морсема, сембе синь эсь кялень, коень-обуцянь, культурань кельги ломатть, конат кородозь ванфтсазь национальнай козяшить. Эряви азомс, аватне тя пингс ванфтозь сире пингонь мокшень панархнень, конатнень эсь кядьсост стазь-аноклазь синь бабасна-щавасна. Панархне оцю козяшикс ванфтовихть велень Культурань кудть музейса. Тяфта мокшаватнень мяльсна пачфтемс тяниень од ломаттненди афкуксонь мокшень щамть мазышинц. 1992 кизоня коллективти вятикс арась Анастасия Павловна Рябова, кона и максозе ансамбльти тячиень мазы лемонц—«Мокшаваня».
 
Ансамбльса 10 морайхть. Ламонцне эздост пенсионерхт. Стане жа етксост улихть образованиянь, торговлянь, медицинань работникт. Сембе ня аватне, велень кельги ломатть, аф няйсазь эряфснон мокшень морофтома. Коллективса колма солисткат: А.П.Рябова—ансамбльть вятиец, В.Г.Романова—Сире Синдрунь Культурань кудть оцюняц и           Т.И.Анашкина—ансамбльть активнай участницац. Коллективти аф явфтови пяльксокс ащи В.В.Кидяйкин, кона мазопнесыне ансамбльть выступлениянзон гармонияса и баянца моразь.
 
«Мокшаваня» ансамбльть лама сатфкстонза. Кефкие кизода ламос ни коллективсь арси лауреатокс и дипломантокс районнай и республиканскяй творческяй фестивальхнень эса. Кельговикс арась тя коллективти «Шумбрат, Мордовия!» народнай творчествань республиканскяй фестивальсь, коса примсихть участия эрь кизоня. А 2011 кизоня «Мокшаваня» фольклорнай ансамбльти максф «Народнай коллектив» лем.
 
«Мокшаванясь» примси участия фестивальхнень эса, конат ётнихть аф аньцек Мордовияса. Тяфта, 2010 кизоня Мордовиянь делегациять лувксса коллективсь ульсь Моску ошса, коса ётафтфоль Мокшэрзянь народть Российскяй государствань нароттнень мархта ладязь эрямстост 1000 кизонь топодемати лемтьф ила. 2018 кизоня удалась улемс «Валда шиня» мокшэрзянь народть фестивальсонза, кона ётась Татарстан Республикань Тетюшскяй райононь Кильдюшево велеса. Кода ни азоськ вяре, вятьсы коллективть асу            мокшавась А.П.Рябова. Анастасия Павловнань Шкабавазсь казезе аф аньцек мазы вайгяльса, но и сермадомань асуса. Сон тяштсь комозьда лама мора мокшень и рузонь кяльса, конатнень морсекшнесыне кода «Мокшаванясь», стане и сонць ськамонза. А.П.Рябова эсь моронзон эса азонды кулхцондыхненди мокшэрзянь масторть мазышинц и козяшинц колга, тяса эряй пара вайме ломаттнень квалма. Аф кржа сёрматфоц лемтьф тядяти и кельгомати. Кода цебярь руководителенди и асу мораенди теенза 2011 кизоня максфоль «Мордовия Республикань культурань Заслуженнай работник» лем.
 
Авань Международнай шинь карша арьсетяма «Мокшаваня» народнай фольклорнай ансамблень аватненди кеме шумбраши, творческяй виияма, кельгома и паваз!                             
 
                                                                                                                                   К.САЙГУТИНА.
 

07.03.2019 №9
 
 
 

 
НОВОСТИ
 
 
 
 
 
 
 
 

Полафтови пенсиятненди социальнай доплатань максомась

Ня шитнень Мордовия Республикать эзга Россиянь Пенсионнай фондть Отделениясонза ётась пресс-конференция, конань вятезе Управляющайсь В.И.Василькин.
Пуромксть панжемста Владимир Ильич азозе, што аф кунара Россиянь Пенсионнай фондсь тись итокт 2018 кизонь работать коряс ПФР-нь инь цебярь территориальнай органть кочкаманкса конкурсти. Мордовиянь Отделениясь азф инь цебярькс Приволжскяй федеральнай округса и сувафтф ПФР-нь фкя инь цебярь отделениятнень лувксс Российскяй Федерацияса.
Сяда тов пачфтьфоль аф работай пенсионерхненди, конатнень пенсиясна регионца ладяф прожиточнай минимумда кржа, социальнай доплататнень максомаснон полафтоманц и пенсияснонды индексациянь тиемать колга. «Государственнай социальнай лезксть колга» и «Российскяй Федерацияса прожиточнай минимумть колга» федеральнай закоттненди сувафтф полафткснень мяльс сявозь прожиточнай минимумда кржа пенсияти индексациясь тяни тиеви тяфта. Васенда аф работай пенсионерть доходоц пачфтеви прожиточнай минимумть лувксс пенсияти социальнай доплатать вельде (кда сявомс Мордовиять, пенсиясь касфтови 8522 цалковайс) и аньцек тяда меле тиеви индексация пенсияти и эрь ковонь ярмаконь выплататненди (кда тяфтамот пандовихть пенсионерти). Тяфта, индексациять вельде сатф суммась кармай сяда оцю регионца ладяф прожиточнай минимумть коряс. Мордовияса пенсиятнень перерасчетсна тиеви майста ни. Республикаса прибавка получайхть 24 тёжянь пенсионерсь.
30.04.2019  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин