Поиск по сайту: 
 

Архив
 декабрь 
 2019 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Рузаевский район: высокоскоростной интернет в каждую школу

ПАНЧФТ И КАЗНЕТ—РЕСПУБЛИКАНЬ АВАТНЕНДИ!

—Самай тинь пяшкотькшнесасть эряфоньконь мазышиса и минь тинь инксонт аноктама сяськондемс всякай сталмотнень, тиендемс инь цебярь тефнень. Благодарностень башка валхт мялезе азомс ся аватненди, конат кирдезь войнань кизонь стакатнень-сталмотнень. Сятненди, кит эряфснон оцю пяльксснон лемдезь войнада мельдень кизотнень странать и родной республикать одукс кеподеманцты. Ламотне, юмафтомок родной ломаньцнон, путозь пильге лангс идьснон, тонафтозь синь трудти,—мярьгсь Владимир Дмитриевич.
 
Республикань Оцюнять валонзон коряс, тяниень пингонь аватненди вийс коре ламось: сатнемс сатфкст профессияса, творчестваса, общественнай тевса и бизнесса, тиендемс уют кудса, воспитандамс шабат.
 
Мекольдень кизотнень Мордовияса виияфтфт идь мархта семьятнень социальнай ширень кирдемаснон коряс мератне. Эряфс ётафневихть социальнай программатне, конат водендафт тядяксшить и идень пингть ванфтомаснонды, лафчста обеспечендаф и од семьятнень ширень кирдемаснонды, тяконь лувксса и эряма вастонь макссемать   коряс. Касы лама идень семьятнень лувкссна. Лама удалась сатомс Россиянь Президентть В.В.Путинонь колмоце идть ширенц кирдеманц коряс инициативанц вельде.
 
Мялень кеподи, цебярь казнекс арась стихотворениясь, конань лувозе республикань Оцюнясь В.Д.Волков. Автороц—содаф поэтсь Эдуард Асадов. «И кда алять эса аш рыцарень ширет, тя корхтай сянь колга, што питнец сонь трёшник»—вов фкя валрисьмось тя стихста. И эсонза азф мяльсь пяк и пяк виде.
 
Сяда тов В.Д.Волков казсь государственнай казнет. Эздост ульсь аф кржа. Мордовия Республикань Оцюнять Указонц коряс, Мордовия Республикать инголе оцю сатфксонкса Славань III степенень орденца казьф Ичалковскяй муниципальнай райононь оцюнясь Валентина Григорьевна Дмитриева. Республикань агропромышленнай комплексса лама киза финансовай тевонь вятеманкса Славань III степенень орденца казьф Лямбирскяй райононь «Октябрьская» агрофирмань главнай бухгалтерсь Татьяна Александровна Игошева.
 
Местнай самоуправлениять виияфтоманцты оцю путксонкса и седикс-ваймокс лама киза работаманкса «Мордовия Республикань местнай самоуправлениянь органонь Заслуженнай работник» почётнай лем максф  Рузаевскяй райононь Хованщинскяй велень поселениянь оцюняти Нина Ивановна Романовати. Казнет получасть тядятне и синь асу стирьсна, конат тиезь содафокс Мордовиять культураса, образованияса, наукаса, спортса, искусстваса. Залу пуромф аватненди казьфтольхть панчфт Мордовия Республикань Оцюнять В.Д.Волковонь эзда. Меле ульсь оцю концерт.
 
                                                                                                                                        Т.АЛЬШИНА.
 

14.03.2019 №10
 
 
 

 
НОВОСТИ
 
 
 
 
 
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин