Поиск по сайту: 
 

Архив
 декабрь 
 2019 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Рузаевский район: высокоскоростной интернет в каждую школу

РОССИЯТЬ КЕЛЬГОМА ЦЁРАЦ

Юрий Алексеевич Гагарин шачсь 1934 кизонь 9 мартста Смоленскяй областень Гжатскяй райононь Клушина велеса, колхозниконь семьяса.
 
1951 кизоня отличия мархта аделазе Люберцы ошса ремесленнай училищать и тяка пингть рабочай од ломанень школать, мезьда меле прважафоль Саратовскяй индустриальнай техникуму, конань тяфта жа аделазе цебярь оценка мархта.
 
Одкспингстокиге Юрий Алексеевич арьсесь арамс пилотокс. Авиацияти кельгомась вятезе сонь васенда Саратовскяй аэроклубу, а сяльде—летчиконь Чкаловскяй военнай авиационнай училищав. Училищать аделамда меле 1957 кизоня сон служась Севернай флотонь истребительскяй авиациянь частьтнень эса.
 
Ю.А.Гагарин, кода фкя инь талантливай и мужественнай летчиксь-истребительсь, сувафтфоль космонавтонь отрядти. Тяса сембода лац няевсть сонь цебярь качестванза. Трудонь кельгомась, настойчивайкс улемась и смелшись лездсть Юрий Алексеевиченди нюрьхкяня пингста  тонадомс пяк сложнай космическяй техникать, цебярьста пяшкодемс специальнай, лётнай и  парашютнай подготовкань оцю программать.
Самай теенза Родинась максозе честть васенцеда кеподемс космосу.
 
1961 кизонь 12 апрельста васенцеда мирса минь странань гражданинць Ю.А.Гагарин «Восток» космическяй корабльса лийкстась Модать перьф и цебярьста валгсь Родинаньконь инголькиге арьсеф точказонза. Тя ульсь ломанть оцюдонга оцю сяськомац, сон няфтезень наукань и техникань оцю сатфкснень.
 
Ю.А.Гагаринонь оцюдонга оцю подвигонц седишкава шназь советскяй народсь и сембе миронь нароттне. Теенза максфоль Советскяй Союзонь Героень оцю лем. Сонь стане жа казезь ламоц лия государстватне.
 
Кода летчик-космонавт Ю.А.Гагарин апак лотксек  касфнезе эсь мастерстванц, сембе вийса вешендсь одня авиационнай и космическяй техникаса. Сон активнайста примсесь участия космонавтонь экипашнень тонафнемаса  и тренировандамаса, космическяй корабльхнень лангса управлениянь мольфтемаса, маштозь азонкшнезе эсь опытонц ялганзонды, мезть инкса сонь седишкава кельгозь сембе космонавттне. 1968 кизоня сон отличия мархта аделазе Жуковскяень лемса Военно-Воздушнай инженернай академиять.
 
Ю.А.Гагарин мольфтсь оцю общественнай работа, васетькшнесь миронь лама странань тежятть ломанень мархта и сембе вастова азонкшнезень правдань валхнень минь великай Родинаньконь, космость тонафнемаса сатфксоньконь колга.
 
1968 кизонь 27 мартста шить СССР-нь летчиксь-космонавтсь,  полковниксь Ю.А.Гагарин кеподсь очередной полетс подмосковнай аэродромста инструкторть, 1-це классонь летчикть-испытательть В.С.Серегинонь мархта кафта  вастонди реактивнай учебно-тренировочнай самолетса, штоба тонафнемс пилотированиянь техникать.
 
Лиендемань зонаса учебнай заданиять пяшкодемда меле, аэродрому мрдамста, самолетсь повсь катастрофас аф ичкозе Владимирскяй областень Новоселова велеть эзда. Катастрофать пингста шавовсть мирса васенце летчиксь-космонавтсь, Советскяй Союзонь Геройсь, полковниксь Ю.А.Гагарин и инженерсь-полковниксь В.С.Серегин.
 
Ю.А.Гагаринонь трагическяйста юмамац сярятьфтезень минь странасонк и сембе мастор лангса миллиотт и миллиотт ломанень седить.
 
Народоньконь кельгома церанц, мирса космость васенце сяськиенц колга лятфнемась мзярдонга аф етай седистонк и ваймостонк. Ю.А.Гагаринонь эряфоц ащи сембонди тейнек цебярь примеркс Отчизнати  служамаса, героизмань, мужествань  няфнемаса, терни од  сатфксненди, од подвикненди.    
 

Ю.А.Гагаринонь шачема шистонза топодсь 85 киза
14.03.2019 №10
 
 
 

 
НОВОСТИ
 
 
 
 
 
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин