Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

КУВАКА ПОСТОНЬ МОРОТ

—Эрьда ина, простиндакшнетяма!—И эрть паласы, а сяльде мярьги:—Тинцьке фкя-фкянь мархта простиндада…
 
Шобдава  стяфтсамазь тядязень вайгялец:
 
—Стяда ни! Мзярс удотада, сембе паршить кочкасазь губорбряста, теенть мезевок аф ляды.
 
И виде, шабатне ласькондсть ляйть тона ширезонза, коса шобда илядьс тюренькшнесть алятне, ласькондеме и мезевок мушендоме.
 
Пянакудса толсь ни юрнась, тядязе цюгунонзон-пачкалгонзон плхнезень якстерьгодомозост, стане эздост палондсь вайсь.
 
Минь, шабатнень, андомазь праздниконь лятф ярхцамбяльда, а эстеест—кеднек модамарьхть капста или куяр мархта. Ся шити мярьгондихть «чистай понедельник». Шобдава рана ломанень пяльге афольхть яка. Лисендяряй мезевок осал семьяса, корхнельхть, кле, стака пильге ломань васенцекс сувсесь пялонк чистай понедельниконь шиня. Эста и ушеткшнесь оцю постсь. И стирьхне аньцек недляшинь илядня ушеткшнезь ся постонь мороснон. Морсекшнезь стирь ялгаснон, цератнень, од аватнень. Вяри касыксне—эсь ялгаснон, сяда емлатне—синценнетнень. Мярьгондельхть тянди «Дали-дали тернема»:
 
—Вай, дали-дали, даль—Ягоркань Аленась, шачф кяднязе-сурнязе, мешавань сурбрянязе!
 
Вай, дали-дали, даль—Иванонь Просанясь, весяланя-соланя, тундань солаф тишеня! Вай, дали-дали, даль—Дрьгожень Полянясь, постуфтфтома учанясь, авафтома вероскясь.
Вай, дали-дали, даль—Ягоронь Васютась вакскат етай аф корхтай, фталот шары сусктанза, кида шири усктанза.
 
Вай, дали-дали, даль—Семань Аксюнясь, иса пряса сязьгатась, кува люкай чикорды, етайхть-потайхть кичкорды.
 
Вай, дали-дали, даль—Паволонь Дарюнясь, ведь трваса шоварнясь, кие аф етай—нярьги, пасиба аф мярьги. Вай, дали-дали, даль—Сергеень Матренась эсь сересонза-пондсонза, левоженнет понксонза.
 
Вай, дали-дали, даль—Ефремонь Марюнясь аф тифти-эфти, цёлак шинц аф няфти.
 
Вай, дали-дали, даль—Серафимонь Феданясь, кочкарява палянясь, сурбенява ожанясь.
Вай, дали-дали, даль—Василень Аннанясь, дуга алдонь пайгонясь, горяйбайге вайгяльнясь. Вай, дали-дали, даль—Василень Настянясь аф оцюня-емланя, пяк уряднай ломання.
 Вай, дали-дали, даль—Тимошкань Маньканясь, оржа васоньбеельнясь, сюрькифтома керынясь.
Вай, дали-дали, даль—Степанонь Натанясь, горенцяса  шаванясь, мазы баяраванясь.
Вай, дали-дали, даль—Иванонь Нинанясь, сятявдонга сятявнясь, сятяв кудонь гуленясь.
 Вай, дали-дали, даль—Паволонь Катянясь, вальмялангонь няканясь, варявготянь сяканясь.
Вай, дали-дали, даль—Иванонь Аннанясь,  Шкайсь сюдозе-кадозе, кинди надияфтозе.
 
Тяфтама морсематне сатнесть оцю велень лама стирень, эрть лама ликонц, тевонц, прянь вятеманц няфнемс. Кяжияк, тят кяжия, а кульк и содак эсь пряцень, кода няеват ломаттненди.
 
Морсекшнезь цератненьге. Эрь ломанть обуцянц, тевонц, смузенц. Кальдявсь кичкорявсь, цебярсь шнакшневсь.
 
Ёр-ёр-ёруша, ёр-весела голова, тюри атякш, веры сюрьхцем, ся Ерошкань Ягорнясь.
 Ёр-ёр-ёруша, ёр-весела голова, эши лангонь рдазу пурхцсь, ся Васелень Иваннясь.
 Ёр-ёр-ёруша, ёр-весела голова,  вярьге карксаф од поп цера, ся Гаразень Ильканясь.
Ёр-ёр-ёруша, ёр-весела голова,  стирень пряса якстерь шальвай, ся Ягоронь Митянясь.
 Ёр-ёр-ёруша, ёр-весела голова,  стирень сурса сиянь суркскясь, ся Тимошкань Тишканясь.
Ёр-ёр-ёруша, ёр-весела голова,   вярьге лии кирьхксонь нили, ся Андреень Федюнясь.
 Ёр-ёр-ёруша, ёр-весела голова,   корхтамстонза капстат валы, ся Алешкань Федюнясь.
 Ёр-ёр-ёруша, ёр-весела голова,   кува якай тяри, эшиня лангс сяри, ся Паволонь Семанясь.
 Ёр-ёр-ёруша, ёр-весела голова,   зрнянь-сиянь кяденза, моросот иляденза, ся Василень Гришанясь.
Морсекшнезь од аватненьге:
Крайса-райса—Серафиморясь—ива!
Вяльдярьма панкс—Михалорясь—ива! Сура пулфкясь—Федорорясь—ива!
 Чавкань кяльнясь—Иванорясь—ива!
 Бодра лишмось—Митюворясь—ива!
 Шкай ликонясь—Михаларясь—ива!
 Горбон офта—Пятружерясь—ива!
 Цёлак пеня—Андреерясь—ива!
 Кашан лишме—Паволорясь—ива!
 Почка пильге—Алдонькарясь—ива!
Маконь панчфкясь—Тихонорясь—ива!
 Нола эльде—Степанорясь—ива!
Соду канда—Гавриларясь—ива!
Тишень тяльмось—Максиморясь—ива!
Морянь шоряй—Дрьгожерясь—ива!
Васоньбеельсь—Антожерясь—ива!
Варма ённясь—Игнаторясь—ива!
Кичкор шяням—Василькарясь—ива!
 Шачф-удалаф—Микулорясь—ива!
Синдерьмарьнясь—Иважерясь—ива!
 Вармань крандазсь—Тиможерясь—ива!
Вов тяфтама морот-ювадемат морсесть кувака постста.
 
                                                                                                                                  Полина Родькина.  
 

14.03.2019 №10
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин