Поиск по сайту: 
 

Архив
 ноябрь 
 2019 
пн вт ср чт пт сб вс
    123
45678910
11121314151617
18192021222324
252627282930 

 
 

 

Национальная тематика

ШАЧСЬ ХУДОЖНИКОКС

 
Нинге шабакс Ю.С.Бакаева кельгозе рисавамать, сон тянь колга пачфтсь художественнай школань директорти и няфтезень теенза рисунканзон. Сонь примазь тя школав, коса маштозь пяшкотькшнезень сембе заданиятнень. Учителец—Владимир Иванович Колмыков—фалу  шарфнесь мяль сянь лангс, што Юлия аф пели трудта. Группаста ськамонза каннесь пяк лама рисунка, конат тифтольхть каникуласта.
 
1991 кизоня поступась Ф.В.Сычковонь лемса Саранск ошень художественнай училищать оформительскяй отделениязонза. Шумордамдонза меле од художниксь ушедсь работама школаса дополнительнай образованиянь педагогокс. Но стирть ульсь оцю мялец тонафнемс сяда тов, крхкалгофнемс содамошинзон. А школаса работамста тянди пцтай ашезь ляткшне пингоц. Иденц шачфтомда меле Юлия ашезь мрда школав. Тя пингть васьфтезе кунардонь ялганц, Оксана Егоровать, конань мархта тонафнесть художественнай школаса и художественнай училищаса. Оксана и Юлия ушедсть марса якама этюдонь тиема, работаснон няфнема. Марса састь Рузаевкань  Выставочнай залу, творчествась сядовок кемокстазень ялгаксшинь сотксснон. Меле сотцесть Художниконь союзса региональнай и российскяй выставкатнень колга, усксезь тоза работаснон. Ю.С.Бакаевась кельгозе выставкаса улендеманц, морять трваса ваймосеманц, а стане жа кунардонь велетненди якаманц.
 
«Шуфтонь куднятне, эшихне, тишень капатне, пирьфса кирдеви жувататне—тя башка шире»,—мярьгсь сон. Художниксь кельгсыне козя история и архитектура мархта ошнень. Тя сембось максси теенза творческяй од мяльхть-арьсемат. Ламоксть улендсь Москуса, Санкт-Петербургса, Нижняй Новгородса, Казаньца.
 
Картинанзон колга азонкшни оцю мяльса. Портретонза, натюрмортонза,  пейзаженза, лия жанрань работанза—бта иденза.
 
Юлия Станиславовнань работанза 2002 кизоста сявомок няфневихть родной ошсонза, меле—Саранскяйса, сяда тов—Саратовса, Нижняй Новгородса и аф весть Москуса.
 
Оцю лезкс теенза макссесть и пленэрхне, коса ульсь кода ваномс лия художникнень работаснон мельге. Лама мезти удалась тонадомс тевонь содай художникнень И.Сидельниковонь, В.Бобриконь, М.Ямбушевонь эзда.
 
2014 кизоня оцю делегация якась пленэрс Подлесная Тавла вели. Делегаттнень еткса ульсь Ю.С.Бакаева. Синь эрясть В.И.Ромашкинонь лемса «Этно-кудо» музейса. Художникнень пяк лямбоста васьфтезь, анокласть концерт. Пленэрть шумордамдонза меле участникнень ашель мяльсна тумс.
 
2017 кизоня Юлия Станиславовна Бакаева примафоль Мордовиянь Художниконь союзу. Тяда меле работанзон сявозь «Большая Волга» Всероссийскяй выставкати.
 
Рузаевка ошень художниксь Ю.С. Бакаева эсь творчествасонза мяль шарфни и национальнай ширети. Тянь лац няфнесазь «Мокшанка», «Эрзянки», «Девушка-мокшанка» и лия работанза.
 
«Крещенский вечерок» работанц ваномста мялезт эстокиге лядихть сотцематне. Вельдест стирьхне и цератне ерасть содамс сай пингснон, кодама эряф синь учсыне.
Юлия Станиславовна Бакаевать лама творческяй пландонза. Инголе сонь учсазь выставкат, пленэрхт, васедемат. Арьсетяма Рузаевкань художникти оцю сатфкст и сембе цебярть!                 
 
                                                                                                                                            Т.Альшина.
 

14.03.2019 №10
 
 
 

 
НОВОСТИ
 
 

ЭСОНЗА АФ МАДОНДЫ ТОЛКС ЮРНАЙ МИНЦЕННЕТИ КЕЛЬГОМАСЬ

 
Родной кялень кельги, национальнай коень-обуцянь ванфты, афкуксонь патриот. Тянь ули кода азомс Мордовиянь Инсарскяй райононь Пою велеса шачф-касф мокшавать Анастасия Афанасьевна Шумкинать (Акшаевать) колга. Аф ваномок сянь лангс, што сон лама киза ни аф эряй мокшэрзянь масторса, эсонза аф мадонды толкс юрнай семботи минценнети кельгомась. Мзярда корхнень Анастасия Афанасьевнань мархта, тя шарьхкодевсь эстокиге. А ушедозе азондомать аф эсь колганза, а ёмла родинанц эзда.

 

Уликс легендать мяльс сявозь, атянзон атясна эрясть оцю губор лангса, конань лемоцоль Ош панда ляй, кона кафта ширде шарфоль вирьхнень мархта, а нинге кафта ширде ульсть сери крутоярхт, конатнень ала шудесь Исса ляйсь. Пингонь ётазь карафне ушедсть пяярема и ляйсь полафтозе ведень шудема вастонц, вов эста родонь плямась сась мяльс ётамс эряма такор вастти, коса ульсь кода касфнемс козя урожай, а Иссать трвава кассь поювонь оцю и туста вирь. Вельденза алятне шапондсть од кутт семьяснонды. Тяфта и эвондась велеть лемоц—Пою.

 

Школаса тонафнемстонза Анастасия сидеста ванондсь раскопкатнень мельге, конатнень Ош панда ляйса ётафнезь Мордовскяй госуниверситетонь студенттне и преподавательхне. Синь мушендсть сёвонень кядьгонь пакшт, трудонь кевонь орудият, налонь пет, авань мазоптомат, монетат и лама мезе лия. Кунардонь эряма вастста ламоц муфкснень ули кода няемс Саранск ошса Краеведческяй музейса, улихть синь и велень школань музейса.

 

24.10.2019  № 42
 
 
 

Россиянь и Мордовиянь Народнай артисткась, Мордовия Республикань Почётнай гражданинць Александра КУЛИКОВА:

 «ПАВАЗУВАН, МЕС ЭРЯН МОРДОВИЯСА!»
 
Тячи республиканьконь столицаса, Саранскяйса, ушедсы эсь работанц Мордовскяй (мокшень и эрзянь) народть Межрегиональнай общественнай организациянц Всероссийскяй VII съездоц. Пингстонза вановихть кизефксне, конат оржаста ащихть мокшэрзянь нациять инголе. Тя оцю пуромксть карша тейнек удалась корхнемс Россиянь и Мордовиянь Народнай артисткать, Мордовия Республикань Государственнай премиянь лауреатть, Славань III степенень орденонь кавалерть, Мордовия Республикань, Рузаевкань и Темников ошень почётнай гражданинть Александра Куликовать мархта. Александра Николаевна сувси съездонь делегаттнень лувксс.

 

Александра Куликовать лемоц лац содаф аф аньцек эсь республикасонк, но и ламоц лия вастова. Вии, седиень-ваймонь токай вайгялец лездсь велень стирняти арамс кельговиксокс тежятть ваныти. Эсь творческяй кинц артисткась ушедозе 1962 кизоня «Умарина» моронь и кштимань государственнай ансамбльса. Лама киза А.Куликова кеняртьфнесыне ломаттнень сольнай мораманц мархта.

 

Александра Николаевнань творческяй киц козя гастролень ширде. Вайгялец кайгсь аф аньцек Россияса, но и лия ширеса: Германияса, Чехословакияса, Финляндияса, Польшаса, Венгрияса, Китайса, Белоруссияса, Украинаса, Молдавияса, Киргизияса, Таджикистанца, Чувашияса. Лия регионца и нльне омба масторса улемста артисткати удалси васьфнемс-корхнемс тоса эряй мокшетнень и эрзятнень мархта, а сяс аф кулемас коре содасы, мезсь синь пичефтьсыне-таколфтсыне.

 

Корреспондентоньконь мархта корхнемста артисткась азозе, мезе ученды мокшэрзятнень оцю пуромксснон эзда, мезть колга мялец корхтамс сонцень, а стане жа отвечась и лия кизефкснень лангс.

 

 

 
24.10.2019  № 42
 
 
 

МОКШЕНЬ И ЭРЗЯНЬ КЯЛЬХНЕ ТОНАФНЕВИХТЬ ШКОЛАТНЕНЬ

Понедельникста Саранск ошень округонь Администрацияса ётафтф оперативнай совещанияса ванондовсь лама кизефкс. Башка мяль шарфтфоль Мордовскяй (мокшень и эрзянь) народть Межрегиональнай общественнай организациянц VII съездонцты анокламати. Тяса азфоль, што Саранскяень 45 сембе школатнень эса 2 класста сявомок 7 классти молемс тонафневихть мокшень и эрзянь кяльхне. Тя тевса заняф 94 педагог. Тонафнемаса фатяф 17916 ученик. Недяляти макссеви 1-2 част. Тяда башка, тяконди водендафт кружокне, музейхне. Саранскяень идень сембе саттнень эса тевс ноляви «Минь эрятама Мордовияса» этнокультурнай компонентсь. Дошкольнай учреждениятнень эса мокшэрзянь народть историянц, коензон-обуцянзон и культуранц мархта иттне содафневихть культорологическяй аспектть, налхксематнень вельде. Стане жа работай этнокультурнай (кштимань, музыкальнай, народнай творчествань) 93 кружок, коса заняф 2160 шаба. Тянь и ламоть лиять колга заседанияса пачфтсь социальнай политикать коряс Департаментть директоронц заместителец—Образованиянь управлениять начальникоц Оксана Шуляпова.

 

24.10.2019
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин